"ވަން އައްޑޫ" ވެހިކަލް ބުރު އާދިއްތަ ދުވަހު ހަވީރު، އަވަސް އޭށުން، ޔޫއަސް އޭހެތި!

އައްޑޫ ސިޓީ ކައުންސިލުގެ ދަށުން އިދާރީ ގޮތުން ފޭދޫ ވަކިކޮށް، ވަކިވަކި ކައުންސިލެއް ހަދަން ފެނޭތޯ ބަލަން ނެގި ވޯޓުގައި، ފޭދޫ ރައްޔިތުން ސިޓީ ކައުންސިލްގެ ދަށުން އޮންނަން ނިންމި ނިންމުގެ އުފާ ފާޅުކުރުން އާދިއްތަ ދުވަހު ބާއްވާ ގޮތަށް ނިންމައިފި އެވެ.

އެގޮތުން "ވަން އައްޑޫ" ގެ ނަމުގައި ވެހިކަލް ބުރެއް އާދިއްތަ ދުވަހު ހަވީރު 16:00 އިން ފެށިގެން ކުރިއަށް ގެންދިއުމަށް ނިންމާފައިވާއިރު، މިވެހިކަލް ބުރުގައި ސިޓީގައި ހިމެނޭ ހިތަދޫ، މަރަދޫ އަދި މަރަދޫފޭދޫގެ ރައްޔިތުން ބައިވެރިވުމަށް މިކަން އިންތިޒާމްކުރާ ފަރާތުން ވަނީ ދައުވަތު ދީފަ އެވެ. ވެހިކަލް ބުރު ފެށުމަށް ހަމަޖެހިފައިވަނީ ފޭދޫ ބަނދަރު ސަރަހައްދުންނެ އެވެ.

25 އޮކްޓޯބަރ ގައި ބޭއްވި އާންމު ހިޔާލު ހޯދުމުގެ ވޯޓުން ބޮޑު ތަފާތަކުން ފޭދޫ ރައްޔިތުން ވަނީ ސިޓީ ކައުންސިލް އިން ވަކިނުވާން ނިންމާ ނޫނެކޭ ބުނެފަ އެވެ. ފޭދޫ ކައުންސިލް ވަކިން އޮންނަން ނުފެންނަ ކަމަށް 1782 ވޯޓު ދީފައިވާއިރު، ވަކި ކައުންސިލެއް ހަދަން ފެންނަ ކަމަށް 615 ވޯޓު ދީފައިވެ އެވެ.

ފޭދޫގައި 5810 މީހުންގެ އާބާދީއެއް އޮންނައިރު ސަރުކާރުން މިކަމުގައި ވަކި ސްޓޭންޑެއް ނެތް ކަމަށް ބުނި ނަމަވެސް ހޯމް މިނިސްޓަރު އަލީ އިހްސާން އާއި ރައްޔިތުން މަޖިލީހުގެ ފޭދޫ އަށް ނިސްބަތްވާ ދެ މެންބަރުން އިބްރާހިމް ދީދީ އާއި އިސްމާއިލް ނިޒާރު ކެމްޕޭން ކުރައްވަމުން ގެންދެވީ ފޭދޫ އައްޑޫ ސިޓީ ކައުންސިލްގެ ދަށުން ހިންގުން ވަކިކުރުމަށެވެ. ނަމަވެސް ފޭދޫ ރައްޔިތުން ވަނީ މިކަމަށް ބޮޑު ތަނުން ނޫނެކޭ ބުނެ ސަރުކާރު ލަދުގަންނަވާލާފަ އެވެ.

ފޭދޫ ރައްޔިތުންގެ މި ނިންމުމަށް އެ ސިޓީގެ އެހެން ރަށްރަށުގެ ރައްޔިތުން ވަނީ ހޫނު މަރުހަބާއެއް ކިޔާފަ އެވެ.