ފުރަތަމަ އަހަރު ފަށާނެ ކަމަށް ބުނި އައްޑޫ ބުރިޖުގެ މަސައްކަތް ދެވަނަ ބަޔަކާ ހަވާލުކޮށްފި
އައްޑޫ ސިޓީގެ ހިތަދު އާއި ހުޅުމީދޫ ގުޅުވައިދޭ ބްރިޖު މަޝްރޫއުގެ ޕްރިލިމިނަރީ ޑިޒައިން އަދި ސާވޭގެ މަސައްކަތުގެ އެއްބަސްވުމުގައި ފުރަތަމަ ސޮއިކުރީ 19 ފެބްރުއަރީ 2024 ގަ
ފުރަތަމަ އަހަރު ފަށާނެ ކަމަށް ބުނި އައްޑޫ ބުރިޖުގެ ސަރވޭގެ މަސައްކަތް އަދިވެސް ނުފެށޭ
އެންމެ ފުރަތަމަ ކޮޅު އަދި އެންމެ ފުރަތަމަ ހަފްތާގައި ވެސް އިނީޝިއަލް ވޯކް ކުރުމުގެ މަސައްކަތް ފެށޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި އައްޑޫގެ ހުޅުދޫ މީދޫ ބުރިޖުގެ މަސައްކަތް ދެވަނަ ބަޔަކާއި ހަވާލުކޮށްފި އެވެ.
އައްޑޫ ސިޓީގެ ހިތަދު އާއި ހުޅުމީދޫ ގުޅުވައިދޭ ބްރިޖު މަޝްރޫއުގެ ޕްރިލިމިނަރީ ޑިޒައިން އަދި ސާވޭގެ މަސައްކަތުގެ އެއްބަސްވުމުގައި ފުރަތަމަ ސޮއިކުރީ 19 ފެބްރުއަރީ 2024 ގަ އެވެ. މި މަސައްކަތް ފުރަތަމަ ހަވާލުކުރީ ދަ ޢަރަބް ކޮންޓްރެކްޓާސް އާ އެވެ. މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މިނިސްޓަ އޮފް ކޮންސްޓްރަކްޝަން އެންޑް އިންފްރާސްޓްރަކްޗަ ޑރ. އަބްދުﷲ މުއްތަލިބެވެ. ދަ އަރަބް ކޮންޓްރެކްޓާސްގެ ފަރާތުން ސޮއިކުރެއްވީ އެ ކުންފުނީގެ ބޯޑު މެންބަރު، އިންޖިނިއަ ހެބާ އަހުމަދު އަބޫ ލައިލާ އެވެ.
އެދުވަހުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ އުންމީދު ކުރައްވަނީ އަދި ޔަގީން ވެސް ކުރައްވަނީ، ސޮއިކުރެވުނު އެއްބަސްވުން، ދެން ބަދަލުވެގެންދާނީ ކޮންޓްރެކްޓަކަށް ކަމަށެވެ. އަދި އަމަލީ މަސައްކަތުގެ ކޮންޓްރެކްޓަކަށްވެ، އިރާދަކުރެއްވިއްޔާ ހަމަ މި އަހަރުގެ [2024 ވަނަ އަހަރު] ތެރޭގައި، އެ ބުރިޖުގެ ޢަމަލީ މަސައްކަތް ފައްޓަވާނެ ކަމަށެވެ. އަދި އެމަނިކުފާނުގެ އަންދާޒާއަކީ ގާތްގަނޑަކަށް ތިން އަހަރާއި ބައި، ހަތަރު އަހަރު ތެރޭގައި މަސައްކަތް ނިންމެވުން ކަމަށެވެ.
މެކްސިމަމް ފޯރ އިޔަރސް. އިރާދަކުރެއްވިއްޔާ މި ދައުރުގެ ތެރޭގައި މި މަސައްކަތް ނިންމައި، މި ސިޓީގެ ރައްޔިތުން ހިތަދޫން ހުޅުމީދު އަށް، ހުޅުމީދޫއިން ހިތަދު އަށް މުޅި ސިޓީއެކީ ގުޅި ލާމެހިގެން ގޮސް ދަތުރުކުރާ ތަން ފެނިގެންދާނެ. މިއީ، ހަމައެކަނި ޝަރަފަކަށްޓަކައި ކުރާ ކަމެއް ނޫން. އެންމެ މުހިންމީ އިޤްތިޞާދީ ކުރިއެރުމަށްޓަކައި ކުރާ ކަމަކަށް ވެގެންދިޔުން.19 ފެބްރުއަރީ 2024 - ރައީސް ޑރ. މުހައްމަދު މުއިއްޒު
އަދި 10 މާޗް 2024 ގައި އެއިރު ކޮންސްޓްރަކްޝަން މިނިސްޓްރީއިން ބުނެފައިވަނީ އަރަބް ކޮންޓްރެކްޓަރސް އާއި ހަވާލުކުރި ބުރިޖުގެ ޕްރިލިމިނިނަރީ ޑިޒައިންގެ އިނިޝިއަލް ސަރވޭގެ މަސައްކަތް ނިމިފައިވާ ކަމަށެވެ.
ނަމަވެސް ރައީސް މުއިއްޒު އައްޑޫގައި ވިދާޅުވި ގޮތަށް އަރަބް ކޮންޓްރެކްޓަރސް އާއި އެކު ސޮއިކުރެވުނު އެއްބަސްވުން، ކޮންޓްރެކްޓަކަށް ބަދަލު ނުވެ، މަސައްކަތުގެ އަމަލީ މަސައްކަތް ނުފެށި އޮއްވާ ސަރުކާރުން އާދިއްތަ ދުވަހު (26 އޮކްޓޯބަރު 2025) ވަނީ އައްޑޫ ސިޓީގެ އައްޑޫ ސިޓީ ހިތަދޫ ހުޅުދޫ - މީދޫ ލިންކް މަޝްރޫއު މަޝްރޫއުގެ ސަރވޭތައް ހެދުމާއި، ޑިޒައިން ތައްޔާރުކުރުމާއި، ޓެކްނިކަލް ސްޕެސިފިކޭޝަން އަދި ޢަމަލީ މަސައްކަތް ޓެންޑަރ ކުރުމަށް ބޭނުންވާ ލިޔެކިޔުންތައް ތައްޔާރުކުރުމުގެ ކޮންސަލްޓެންސީ އެއްބަސްވުމުގައި ޓީވައިލިން އިންޓަރނޭޝަނަލް އިންޖިނިއަރިންގ ކޮންސަލްޓިންގ (ޗައިނާ) ކޮމްޕެނީ ލިމިޓެޑް (ޓީވައިލިން) އާއެކު ސޮއިކޮށްފަ އެވެ.
މި އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ މިނިސްޓަރ ޑރ. ޢަބްދުﷲ މުއްތަލިބްއެވެ. އަދި ޓީވައިލިންގެ ފަރާތުން ސޮއި ކުރެއްވީ އެ ކުންފުނީގެ ޗައިނާ ބްރާންޗްގެ ޕްރެސިޑެންޓް ޗެން ޝީއޯހޫ އެވެ.
މި ކޮންޓްރެކްޓަރުގެ އަގަކީ 1،025،000 (އެއް މިލިއަން ފަންސަވީސް ހާސް) އެމެރިކާ ޑޮލަރު ނުވަތަ 15،805،500 (ފަނަރަ މިލިއަން އަށްލައްކަ ފަސް ހާސް ފައްސަތޭކަ) ދިވެހި ރުފިޔާ އެވެ. ކޮންޓްރެކްޓުގެ މުއްދަތަކީ 6 މަސް ދުވަހެވެ. މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ ސަރވޭތައް ހެދުމާއި، ޑިޒައިން ތައްޔާރުކުރުމާއި، ޓެކްނިކަލް ސްޕެސިފިކޭޝަން އަދި ޢަމަލީ މަސައްކަތް ޓެންޑަރ ކުރުމަށް ބޭނުންވާ ލިޔެކިޔުންތައް ތައްޔާރުކުރުމެވެ.
މިދިޔަ އަހަރު ފަށާނެ ކަމަށް ރައީސް މުއިއްޒު ވިދާޅުވި އައްޑޫ ބުރިޖުގެ މަސައްކަތަށް މިދިޔަ އަހަރުގެ ބަޖެޓުގައި 30 މިލިއަން ރުފިޔާ ކަނޑައަޅާފައި އޮތެވެ. ނަމަވެސް އެ ފައިސާ އިން ކުރިކަމެއް ސަރުކާރުން ހާމަނުކުރެ އެވެ. މިއީ ވެރިކަމުގެ ފުރަތަމަ 100 ދުވަހުގެ ތެރޭގައި މި މަސައްކަތް ފަށަން ސަރުކާރުގެ "ހަފުތާ14" ރޯޑުމެޕުގައި ހިމަނާފައިވާ ކަމެކެވެ.
ބޭރުގެ ދެ ކޮންޓްރެކްޓަރަކާ މިހާތަނަށް މި މަސައްކަތް ހަވާލު ކުރި އިރު އެއީ ކިހިނެއް ހޯދި ބައެއް ކަމެއް ވެސް ސަރުކާރުން ހާމަ ކޮށްފައެއް ނުވެއެވެ.
ރިޔާސީ އިންތިހާބުގެ ކެމްޕޭނުގެ ތެރޭގައި އައްޑޫ ސިޓީއަށް ވަޑައިގެން 27 ސެޕްޓެމްބަރު 2023ގައި ފޭދޫގައި ވާހަކަ ދައްކަވަމުން މުއިއްޒު ވިދާޅުވެފައި ވަނީ "އުއްމީދަކީ އަދި އަޒުމަކީ އެންމެ ފުރަތަމަ ކޮޅު އަދި އެންމެ ފުރަތަމަ ހަފްތާގައިވެސް އިނީޝިއަލް ވޯކް ކުރުމުގެ މަސައްކަތް ފެށޭނެ ކަމަށް ވާނެ، އެހެންނަމަވެސް އޭގެ ޑީޓެއިލް ޕްލޭން ހަދައި، އެކަމުގެ މައުލޫމާތު ރައްޔިތުންނާއި ހިއްސާ ކުރާނަން. އަޅުގަނޑު ބޭނުންވަނީ އިރާދަކުރެއްވިއްޔާ ފުރަތަމަ އަހަރު ދުވަހު ތެރޭ މަސައްކަތް ފެށުމަށް" ކަމަށެވެ.
