އައްޑޫ ސިޓީ ހިތަދޫ ގެއަކުން ދެމަފިރިއަކު މަރުވެފައި އޮއްވާ ފެނިއްޖެ އެވެ.

ރާއްޖެއެމްވީ އަށް މައުލޫމާތު ދެމުން ފުލުހުން ބުނެފައިވަނީ އައްޑޫ ސަިޓީ ހިތަދޫ ގެއެއްގައި ދެ މީހަކު މަރުވެފައި އޮތް މައްސަލައެއް ފުލުހުންނަށް ހުށަހެޅުމާއި ގުޅިގެން ހަރަކާތްތެރިވަމުންދާ ކަމަށެއެވެ. މަރުވެފައިވަނީ އަންހެނަކާއި ފިރިހެނެއް ކަމަށް ފުލުހުން މައުލޫމާތު ދެއެެވެ.

އިތުބާރު ހުރި ގޮތެއްގައި އެނގިފައިވަނީ މަރުވެފައިވަނީ ދެމަފިރިން ކަމަށެވެ.

މަރުވެފައި ތިއްބާ ފެނިފައިވަނީ ހިތަދޫ ކްރޭންގޭ އިބްރާހިމް އަބްދުﷲ ،60، އާއި މަރަދޫ ނާރެސް، ފަރުހަނާޒް ރަޝީދު ،52، ކަން ވަނީ ކަށަވަރު ކުރެވިފައެވެ.

ފުލުހުން ބުނީ މި މައްސަލާގައި މިހާތަނަށް ބެލި ބެލުމުން ތުހުމަތު ކުރެވޭ ކަމެއް ފާހަގަކުރެވިފައި ނުވާ ކަމަށެވެ.

މައުލޫމާތު ލިބިފައިވާ ގޮތުގައި އަންހެން މީހާ ނިސްބަތްވަނީ އައްޑޫ ސިޓީ މަރަދޫއަށެވެ. މިދެމީހުންގެ ހަށިގަނޑު މިހާރު ވަނީ އައްޑު އިކިއޮޓޯރިއަލް ހޮސްޕިޓަލްއަށް ގެންގިސްފައެވެ.

ރާއްޖެއެމްވީއަށް އިތުބާރު ހުރި ފަރާތަކުން މައުލޫމާތުދިން ގޮތުގައި މި ދެމަފިރިން ދިރިއުޅެމުން ދަނީ ވަކިން ކަމަށާއި ބުދަ ދުވަހުގެ ހެނދުނުން ފެށިގެން ހަބަރެއް ނުވެގެން އާއިލާއިން މަސައްކަތް ކުރުމަށްފަހު ފުލުހުންގެ އެހީތެރިކަމާއި އެކު އެގެއަށް ވަތްއިރު މި ދެމީހުން މަރުވެފައި ތިއްބާ ފެނުނީ އެގޭގެ ފާހަނާ ތެރެއިން ކަމަށެވެ.

ފިރިހެން މީހާގެ ބޮލުގައި ކޮންމެވެސް ވަރެއްގެ ޒަހަމްތަކެއް ހުރި ނަމަވެސް އަންހެން މީހާގެ ބޭރުފުށުން އެއްވެސް ޒަހަމެއް ފެންނަން ނެތް ކަމަށް މަންޒަރު ދުށް މީހުން ރާއްޖެއެމްވީ އާ ވާހަކަދައްކަމުން ބުންޏެވެ.