ގދ.ނަޑެއްލާގެ ނަރުދަމާ: ސަރުކާރަށް ދެ އަހަރުވީ އެންމެ 1000 މީޓަރުގެ ހޮޅި އެޅުމުގެ މަސައްކަތް ނުކުރެވި!
މި ސަރުކާރު އައި ފަހުން އެ ރަށުގައި އެއްވެސް މަސައްކަތެއް ކުރިއަށް ނުގެންދާކަމަށް ނަޑެއްލާ ކައުންސިލްގެ ރައީސް ވިދާޅުވި
ގދ.ނަޑެއްލާ ކައުންސިލްގެ ރައީސް މުހައްމަދު އަންޝައު ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަނީ 10.09.2025
މި ސަރުކާރު ވެރިކަމަށް އައި އިރު، ގދ.ނަޑެއްލާގެ ނަރުދަމާގެ ހޮޅި އެޅުމުގެ މަސައްކަތްތަކުގެ ތެރެއިން މި ވެރިކަން ފެށުނު އިރު ނުކުރެވި ވަނީ އެންމެ 1000 މީޓަރުގެ ހޮޅި ވަޅުލުމުގެ މަސައްކަތް ކަމަށާއި ސަރުކާރަށް ދެ އަހަރުވީ އެކަން ކޮށް ނުދެވި ކަމަށް ގދ.ނަޑެއްލާ ކައުންސިލްގެ ރައީސް މުހައްމަދު އަންޝައު ވިދާޅުވެއްޖެއެވެ.
އޭނާ އެފަދައިން ވިދާޅުވީ ހުކުރު ދުވަހު، ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ މި ސަރުކާރު އައި ފަހުން އެ ރަށުގައި އެއްވެސް މަސައްކަތެއް ކުރިއަށް ނުގެންދާ ކަމަށެވެ. ނިމިދިޔަ ސަރުކާރުން ފަށާފައިވާ މަޝްރޫޢުތައް ވެސް ކުރިއަށް ނުގެންގޮސް މަޑު ޖެހިފައިވާ ކަމަށް އޭނާ ވަނީ ވިދާޅުވެފައެވެ.
އެ ރަށަކީ ނަރުދަމާގެ މަސައްކަތުގެ ތެރެއިން ގާތްގަނޑަކަށް 7000 މީޓަރުގެ ހޮޅި ދެމުމަށް ހަމަޖެހިފައި އޮތް ރަށެއް ކަަމަށް ވާއިރު އޭގެ ތެރެއިން 6000 މީޓަރުގެ ހޮޅި ވަޅުލުމުގެ މަސައްކަތް ނިމިދިޔަ ސަރުކާރުން ވަނީ ކޮށްފައެވެ. ނަމަވެސް މި ސަރުކާރު އައި ފަހުން އެ މަސައްކަތް ވެސް ވަނީ އެއްކޮށް ހުއްޓިފައެވެ.
ކައުންސިލްގެ ރައީސް ވިދާޅުވީ އެ ރަށުގައި ހުރި އެހެނިހެން މަސައްކަތްތައް ވެސް ހުރީ ހުއްޓިފައި ކަމަށެވެ. އެގޮތުން އެ ރަށުގެ ސްކޫލްގެ މަސައްކަތް ފަދަ މަސައްކަތްތައް ވެސް ހުރީ ހުއްޓިފައި ކަމަށް އޭނާ ވިދާޅުވިއެވެ.
"ދެ އަހަރުވި އިރު މަސައްކަތްތައް ހުއްޓިފައި މަޑު ޖެހިފައި. ފެށިފަ މަޑުން ގޮސްސަ. މަޑު ޖެހިފައި. މިހެން ވަނީ." އޭނާ ވިދާޅުވިއެވެ.
2019 ވަނަ އަހަރު 22 މިލިއަން ރުފިޔާއަށް، 36 ރަށެއްގެ ފެނާއި ނަރުދަމާ ޑިޒައިން ކުރަން ބަޔަކާއި ވަނީ ހަވާލުކޮށްފައެވެ. އޭރު، ގއ. ދެއްވަދޫ، ގއ. ނިލަންދޫ، ގދ. ނަޑެއްލާ، ލ. ހިތަދޫ އަދި ލ. ކުނަހަންދޫގައި ފެނާއި ނަރުދަމާ ނިޒާމްގެ ޑިޒައިން މަސައްކަތް ކުރުމަށް ހަވާލުކޮށްފައި ވަނީ 3,229,800.00 ރުފިޔާއަށެވެ.
މި މަސައްކަތް ފަށާފައި ވަނީ 2022 ވަނަ އަހަރުއެވެ. އަދި އެއް އަހަރު ތެރޭގައި ނަރުދަމާގެ ހޮޅި އެޅުމުގެ 90% މަސައްކަތް ވަނީ ފުރިހަމަކޮށްފައެވެ. ދާދިފަހުން މަޖިލީހުގައި ވާހަކަދައްކަވަމުން މަޑަވެލި ދާއިރާގެ ޕީއެންސީ މެންބަރު، މުހައްމަދު ޝަމީޒް ވެސް ވަނީ އެ ރަށުގެ ނަރުދަމާގެ މަސައްކަތް ލަސްވާތީ އެކަމާއި މެދު ކަންބޮޑުވުން ފާޅުކުރައްވާފައެވެ.
އޭނާ ވިދާޅުވީ ގދ. ނަޑެއްލާ އާއި މަޑަވެލީގެ ނަރުދަމާގެ މަސައްކަތްތައް ފެށިތާ އެތައް ދުވަހެއް ފާއިތުވެފައިވީ ނަމަވެސް އަދިވެސް އެ މަސައްކަތްތައް ނިމޭނެ ދުވަހެއް ރައްޔިތުންނަށް ނޭނގޭ ކަމަށެވެ. އެ ކަމުގެ ޒިންމާ ނަގަން ޖެހެނީ ކޮން ސަރުކާރަކުންތޯ ސުވާލު އުފައްދާ އޭނާ ވާހަކަދައްކަވާފައި ވާއިރު އޭނާ ނިސްބަތްވެވަޑައިގަންނަވާ ޕީއެންސީގެ ސަރުކާރު އައި ފަހުން މިހާތަނަށް އެ މަސައްކަތް ކުރިއަށް ނުގެންގޮސް އޮތީ ހުއްޓާލާފައެވެ.
