މިސަރުކާރުން ހަރަދު ކުޑަކުރާ ކަމަށް ބުނެ، ރައްޔިތުންގެ ބާރުވެރިކަން މުށުތެރެއަށްލުމަށް ދަނީ މަސައްކަތް ކުރަމުން: މެންބަރު އަހުމަދު ދީދީ
މި ސަރުކާރުގެ ބޭފުޅުން ދައްކާ ވާހަކައާއި، އަމަލާ ދިމާނުވޭ
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އަހުމަދު ދީދީ ވާހަކަދައްކަވަނީ
މިސަރުކާރުން ހަރަދު ކުޑަކުރާ ކަމަށް ބުނެ، ރައްޔިތުންގެ ބާރުވެރިކަން މުށުތެރެއަށްލުމަށް ވަރަށް ގިނަ މަސައްކަތްތައް ކުރަމުންދާ ކަމަށް މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
އާދިއްތަ ދުވަހުގެ ރޭ ފަލަސުރުހީ ޕްރޮގްރާމްގައި މެންބަރު އަހުމަދު ދީދީ ވިދާޅުވީ މިސަރުކާރުގެ ބޭފުޅުން ދައްކާ ވާހަކައާއި، އަމަލާ ދިމާނުވާ ކަމަށާއި، އެކަން މިހާރު މުޅި ގައުމުން ފެންނަމުންދާ ކަމަށެވެ.
ހަރަދު ކުޑަކުރުމުގެ ނަމުގައި ރައްޔިތުންގެ ހުރިހާ ބާރެއް މުށުތެރެއަށްލުމުގެ މަސައްކަތް ކުރާކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ ކައުންސިލަރުން މަދުކޮށް، ޓެކްނިކަލް މުވައްޒަފުން އިތުރުކުރުމުން ހަރަދު ކުޑަނުވާނެ ކަމަށެވެ. އަދި ކައުންސިލްގެ ނިޒާމު ފުޑާލަނީ ރައްޔިތުންގެ ބާރުވެރިކަން ނައްތާލުމަށް ކަމަށް މެންބަރު އަހުމަދު ދީދީ ވިދާޅުވިއެވެ.
މިސާލަކަށް ކައުންސިލް ރޫޅާލަން ކައުންސިލްތައް ފުޑާލުމަށް މިކުރާ މަސައްކަތުގައި ވެސް ގާނޫނު އަސާސީގައި މިއޮންނަ ޑީސެންޓްރަލައިޒޭޝަން ނިޒާމު ފުޑާލުމަށްޓަކައި މިބޭފުޅުން ގެންނަ ހަމަ އެސްކިއުޒަކީ ހަރަދު މާ ބޮޑު ސިސްޓަމެކޭ. ހަރަދު ވަރަށް ބޮޑޭ. އެހެންނަމަވެސް އަޅުގަނޑުމެންނަށް ފެންނަ އޮތް ހަގީގަތަކީ ލާމަރުކަޒީ ނިޒާމަށް ބަލާއިރު ވެސް އެއީ މުޅި ބަޖެޓުގެ ފަސް ޕަސެންޓް. ކައުންސިލްތަކަށް މިދޭ ގްރާންޓަކީ. އެހެންނަމަވެސް މި ފަސް ޕަސެންޓާ އަޅައިގަނެގެން ހަމަ އަބަދުވެސް މިބޭފުޅުން ދައްކާ ވާހަކައެއް. މާހަރަދު ބޮޑު ނިޒާމެކޭ. އެހެންނަމަވެސް އަޅުގަނޑުމެންނަށް މި އުފެދޭ ސުވާލަކީ މިސާލަކަށް ކައުންސިލުން ކުޑަ ކުރާ ވާހަކަ ދައްކާފައި އަނެއްކާ އެކައުންސިލަށް ޓެކްނިކަލް ބޭފުޅުންނޭ ކިޔާފައި ހަމައެއަށްވުރެ ބޮޑު މުސާރަ ދީފައި އެތައް ބަޔަކު ނަގާ ވާހަކަ މިދައްކަނީ.މަރަދޫ ދާއިރާގެ މެންބަރު އަހުމަދު
މިހާރު ހުށަހަޅާފައިވާ މީޑިއާ ކޮންޓްރޯލް ކުރާ ބިލަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ މިއީ ވެސް ބާރުވެރިކަން މުށުތެރެއަށްލުމަށް ކުރާ މަސައްކަތެއް ކަމަށާއި، ސަރުކާރުން ބޭނުންވަނީ ސަރުކާރުގެ ޕްރޮޕެގެންޑާ މުޅި ގައުމުގައި ފަތުރައި، ހަގީގަތް ރައްޔިތުންނަށް އޮޅުވާލަން ކަމަށެވެ.
މެންބަރު އަހުމަދު ދީދީ ވިދާޅުވީ ބިލެއް ހުށަހަޅައި، ފާސް ކުރުމުގައި ސަރުކާރުގެ ހެޔޮ ނިޔަތެއް ނެތް ކަމަށާއި، ރައްޔިތުންގެ މަޖިލީހުގައި ކަސްތޮޅު އަޅުވާފައިވަނީ އެންޓި ޑިފެކްޝަން ގާނުނުން ކަމަށެވެ. އަދި މިގޮތަށް މީޑީއާ ކޮންޓްރޯލްކޮށް ފުޑާލުމަށް ސަރުކާރުން ހުރިހާ ގޮތަކަށް މަސައްކަތް ކުރާނެ ކަމަށް މެންބަރު އަހުމަދު ދީދީ ވިދާޅުވިއެވެ.
