ޖޯޖިއާގައި މިހާރު ކުރިއަށްދާ، ބަޓޫމީ ކަޕް - ޔޫތު އިންޓަރނޭޝަނަލް ބެޑްމިންޓަން މުބާރާތުގައި ވާދަ ކުރަމުން އަންނަ ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) މުބާރާތުގެ ތިން އިވެންޓުގެ ވެސް ސެމީ ފައިނަލްގެ ޖާގަ ހޯދައިފި އެވެ.

ހުކުރު ދުވަހުން ފެށިގެން ކުރިއަށް ދާ މި މުބާރާތުގައި ވާދަ ކުރަމުން އަންނަ ލައިބާ ވަނީ ސިންގަލްސް އިވެންޓުގެ އިތުރުން، ޑަބަލްސް އަދި މިކްސް ޑަބަލްސް އިވެންޓުގެ ސެމީ ފައިނަލް އިން ފުރުސަތު ހޯދައިފަ އެވެ.

ސިންގަލްސް އިވެންޓުގެ ކުއަޓަރ ފައިނަލްގައި ލައިބާ ނިކުމެފައި ވަނީ އަޒަރުބައިޖާންގެ 13 އަހަރުން ދަށުގެ ރޭންކިންގެ އެއް ވަނައިގައި އޮތް ކުޅުންތެރިޔާ އަޙުމަދްލީ ޑަނީޒްއާ ދެކޮޅަށެވެ. އެ މެޗު ލައިބާ ކާމިޔާބު ކޮށްފައި ވަނީ ސީދާ ދެ ސެޓުންނެވެ. މެޗުގެ ސެޓުތައް ލައިބާ ކާމިޔާބު ކޮށްފައި ވަނީ 15-11 އަދި 15-03 އިންނެވެ.

ސިންގަލްސް އިވެންޓުގެ ސެމީ ފައިނަލްގައި ލައިބާ ނިކުންނާނީ ކަޒަކިސްތާންގެ 13 އަހަރުން ދަށުގެ ރޭންކިންގެ އެއް ވަނަ ކުޅުންތެރިޔާ، ލެނޯވާ ސޯފިއާއާ ދެކޮޅަށެވެ.

ޖޯޖިިއާގެ ބަޓޫމީ ސިޓީގައި މި މުބާރާތް ކުރިއަށް ދަނީ އޮގަސްޓު މަހުގެ 22 ވަނަ ދުވަހުން، 24 ވަނަ ދުވަހުގެ ނިޔަލަށެވެ. މި މުބާރާތުގައި ތުރުކީ، ޖޯޖިއާ، ކަޒަކިސްތާން، އާމޭނިއާ، ލެޓްވިއާ، އަޒަރުބައިޖާން އަދި ދިވެހި ރާއްޖެ އިން ވެސް ވާދަ ކުރާނެ އެވެ.

މުބާރާތުގައި ޖުމުލަ 78 ކުޅުންތެރިން ވާދަ ކުރާއިރު، މުބާރާތުގައި 11 އަހަރުން ދަށުގެ އިތުރުން، 13 އަހަރުން ދަށް އަދި 15 އަހަރުން ދަށުގެ އުމުރު ފުރައިގެ ސިންގަލްސް، ޑަބަލްސް އަދި މިކްސް ޑަބަލްސްގެ ކުޅުން ކުރިއަށްދެ އެވެ. މިއީ ޖޯޖިއާގެ ޤައުމީ ބެޑްމިންޓަން ފެޑެރޭޝަން އިން އިންތިޒާމު ކޮށްގެން ބާއްވާ މުބާރާތެކެވެ.

ލައިބާ ވަނީ މިދިޔަ އަހަރު ވެސް މި މުބާރާތުގައި ވާދަކޮށްފަ އެވެ. އެ ފަހަރުގެ މުބާރާތުން ލައިބާ ވަނީ ދެ މެޑަލް ހޯދައިފަ އެވެ. އެއީ ސިންގަލްސް އިވެންޓުގެ ލޯ މެޑަލްގެ އިތުރުންމ ޑަބަލްސް އިވެންޓުގެ ރިހި މެޑަލް އެވެ.