ޣައްޒާ ގެ ރައްޔިތުންނަށް ވިޒިޓަރ ވިސާ ދޫކުރުން އެެމެރިކާ އިން ހުއްޓާލައިފި
ޣައްޒާގެ ރައްޔިތުންނަށް ވިޒިޓަރ ވިސާ ދޫކުރުން އެމެރިކާ އިން ހުއްޓާލުމުގެ ކުރިން، މެޑިކަލް ވިސާ މަދު މިންވަރަކަށް ދޫކުރަމުން ގެންގޮސްފައި ވެއެވެ. އިސްރާއީލުގެ ހަމަލާތަކުގައި 61،000 އަށްވުރެ ގިނަ ފަލަސްތީނުން ޝަހީދުވެފައި ވާއިރު، ޣައްޒާގެ ރެފިއުޖީން ބަލައިގަތުމަށް އެމެރިކާ އިން އެއްވެސް އިޝާރާތެއް ދީފައެއް ނުވެއެވެ.
ޔުނައިޓެޑް ސްޓޭޓްސް ސްޓޭޓް ޑިޕާޓްމަންޓުން ވަނީ ގާޒާގެ ރައްޔިތުންނަށް ވިޒިޓަރ ވިޒާ ދޫކުރުން ވަގުތީގޮތުން ހުއްޓާލާފައި
ފަރުވާ ހޯދުމަށް އެމެރިކާ އަށް ގެނައި ޒަޚަމްވެފައިވާ ފަލަސްތީނުގެ ދެ ޒުވާނަކު 2025 ވަނަ އަހަރުގެ އޮގަސްޓް މަހުގެ 9 ވަނަ ދުވަހު ވޮޝިންޓަންގެ ޑަލަސް އިންޓަނޭޝަނަލް އެއާޕޯޓުގެ އެރައިވަލްސް އޭރިއާ ގައި
އެމެރިކާ ގެ ސްޓޭޓް ޑިޕާޓްމަންޓުން ޣައްޒާ ގެ ފަލަސްތީން ރައްޔިތުންނަށް ވިޒިޓަރ ވިސާ ދޫކުރުން ވަގުތީގޮތުން ހުއްޓާލައިފިކަން އިއުލާނު ކޮށްފިއެވެ.
މި ނިންމުމަކީ "ފުރިހަމަ އަދި ތަފްސީލީ" މުރާޖަޢާ އެއް ކުރުމަށްޓަކައި ނިންމި ނިންމުމެއް ކަމަށް ސްޓޭޓް ޑިޕާޓްމަންޓުން ހޮނިހިރު ދުވަހު ބުނެފައިވެއެވެ.
ނަމަވެސް، ވޭތުވެދިޔަ ދުވަސްތަކުގައި މަދު އަދަދެއްގެ ވަގުތީ މެޑިކަލް-ހިއުމެނިޓޭރިއަން ވިސާ ދޫކޮށްފައިވާކަމަށް ޑިޕާޓްމަންޓުން ހާމަކުރިއެވެ. ނަމަވެސް ވަކި އަދަދެއް ބަޔާން ކޮށްފައެއް ނުވެއެވެ.
ސްޓޭޓް ޑިޕާޓްމަންޓްގެ ވެބްސައިޓުގައި މަހުން މަހަށް އަޕްޑޭޓް ކުރާ ތަފާސް ހިސާބުތަކަށް ބަލާއިރު، ޕެލެސްޓީނިއަން އޮތޯރިޓީގެ ޓްރެވަލް ޑޮކިއުމަންޓް ގެންގުޅޭ ފަރާތްތަކަށް 3،800 އަށް ވުރެ ގިނަ ވިޒިޓަރ ވިސާ ދޫކޮށްފައި ވެއެވެ. މީގެ ތެރޭގައި މެއި މަހު ދޫކުރި 640 ވިސާ ހިމެނެއެވެ. އެމެރިކާ އިން މިހާތަނަށް ވިސާ ދީފައިވަނީ، އިސްރާއީލުގެ ހަމަލާތަކުގެ ސީރިއަސް ޒަޚަމްތައް ލިބިފައިވާ ފަރާތްތަކަށާއި، ބޮޑެތި ބަލިތަކަށް ފަރުވާ ކުރަން ޖެހޭ މީހުންނަށް ކަމަށް ރިޕޯޓުތައް ބުނެއެވެ.
މި ނިންމުން ނިންމާފައި ވަނީ ރައީސް ޓްރަމްޕްގެ ބަސްމަގު ހިފާ، ހަރުކަށި އެކްޓިވިސްޓް ލައުރާ ލޫމަރ މިދިޔަ ހުކުރު ދުވަހު ސޯޝަލް މީޑިއާ ގައި ފަލަސްތީނުގެ "ރެފިއުޖީން" މި މަހު އެމެރިކާ އަށް ވަދެފައިވާ ކަމަށް ބުނެފައި ވަނިކޮށްނެވެ.
ލޫމަރގެ މި ވާހަކަ އާ ގުޅިގެން ބައެއް ރިޕަބްލިކަނުން ވަނީ ކަންބޮޑުވުން ފާޅުކޮށްފައެވެ. މިގޮތުން ޓެކްސަސްގެ ރެޕްރެޒެންޓެޓިވް ޗިޕް ރޯއީ ވަނީ މި މައްސަލަ ބަލާނެ ކަމަށް ބުނެފައެވެ. އަދި ފްލޮރިޑާގެ ރެޕްރެޒެންޓެޓިވް ރޭންޑީ ފައިން ވަނީ މިއީ "ގައުމީ ސަލާމަތަށް ނުރައްކަލެއް" ކަމަށް ބުނެފައެވެ.
ޣައްޒާގެ ހެލްތް މިނިސްޓްރީން ބުނާ ގޮތުގައި 2023 ވަނަ އަހަރުގެ އޮކްޓޯބަރ 7 ވަނަ ދުވަހުން ފެށިގެން އިސްރާއީލުން ޣައްޒާ އަށް ދެމުންދާ ހަމަލާތަކުގައި 61،000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދު ވެ، ލައްކަ އަކަށް ވުރެ ގިނަ މީހުން ޒަޚަމް ވެފައެވެ.
ޣައްޒާ ގެ ރެފިއުޖީން ބަލައިގަންނާނެ ކަމުގެ އެއްވެސް އިޝާރާތެއް އެމެރިކާ އިން ދީފައެއް ނުވެއެވެ. އަނެއްކޮޅުން، ރޮއިޓަރސް އަށް ލިބިފައިވާ މަޢުލޫމާތުން ދައްކާ ގޮތުގައި ފަލަސްތީނު ރައްޔިތުން ޣައްޒާ އިން ނެރެ ފޮނުވާލުމުގެ ޕްލޭނަކާ މެދު ދެކުނު ސޫދާން އާ އެކު އިސްރާއީލުން ގެންދަނީ މަޝްވަރާ ކުރަމުންނެވެ.
