ފަލަސްތީނުގެ ދައުލަތެއްގެ އުއްމީދު ފުނޑުކޮށްލާ ޕްލޭނަކަށް އިސްރާއީލުގެ ހައްދުފަހަނަ އެޅި ފިނޭންސް މިނިސްޓަރ ހުއްދަ ދީފި

ފަލަސްތީނުގެ މިނިވަން ދައުލަތަކަށް ކުރެވޭ އުއްމީދު ފުނޑުފުނޑުވާ ފަދަ ޕްލޭނަކަށް އިސްރާއީލުގެ ހައްދުފަހަނަ އެޅި ފިނޭންސް މިނިސްޓަރ ސްމޮޓްރިޗް ހުއްދަ ދީފިއެވެ.

އިސްރާއީލުގެ ހަރުކަށި ވަޒީރު މާލޭ އެޑްމިމް ގައި ހުރެ ބުނެފައި ވަނީ، ވެސްޓް ބޭންކް ބައިބައި ކޮށް، އިރުމަތީ ޖެރޫސަލަމް ވަކިކޮށްލާނެ ގިނަ ދުވަސްވެފައިވާ އާބާދު ކުރުމުގެ މަސައްކަތް ފެށޭނެ ކަމަށެވެ. މި ކަމަކީ ފަލަސްތީނު ދައުލަތެއްގެ ޚިޔާލު "ކަފުންކުރާނެ" ކަމެއް ކަމަށް އޭނާގެ އޮފީހުން ބުނެފައިވެއެވެ.

ސްމޮޓްރިޗް ބުނެފައި ވަނީ ބޮޑު ވަޒީރު ބެންޖަމިން ނެތަންޔާހޫ އާއި އެމެރިކާގެ ރައީސް ޑޮނަލްޑް ޓްރަމްޕް "އީ-ވަން" މަޝްރޫޢު އަލުން ފެށުމަށް އެއްބަސްވެފައިވާ ކަމަށެވެ.

"މިއަދު ދުނިޔޭގައި ފަލަސްތީނު ދައުލަތެއް ބަލައިގަންނަން މަސައްކަތްކުރާ ކޮންމެ ފަރާތަކަށް އަހަރެމެން ޖަވާބުދޭނީ ބިން ހޯދައިގެންނެވެ. ލިޔެކިޔުމަކުން ނޫނެވެ. ނިންމުންތަކަކުން ނުވަތަ ބަޔާން ތަކަކުން ނޫނެވެ. އެއާ ޚިލާފަށް ޙަޤީޤަތުންނެވެ. ގެދޮރު ބިނާ ކުރުމުގެ ޙަޤީޤަތުން، ނެއިބަރހުޑް ގެ ޙަޤީޤަތުންނެވެ،" ސްމޮޓްރިޗް ބުންޏެވެ.

އިސްރާއީލުން މާލޭ އެޑްމިމް ގައި އިމާރާތް ކުރުމުގެ ޕްލޭންތައް 2012 ގައި ހުއްޓާލިއެވެ. އަދި 2020 ގައި އަލުން ފެށުމަށްފަހު އަނެއްކާވެސް ހުއްޓާލިއެވެ. މިއީ އެމެރިކާ އާއި ޔޫރަޕުގެ ބައެއް ޤައުމުތަކާއި އެހެނިހެން ބާރުތަކުން އިއުތިރާޒު ކުރުމުގެ ސަބަބުންނެވެ. އެފަރާތްތަކުން މި މަޝްރޫޢު ދެކެނީ ފަލަސްތީނުގެ ދައުލަތެއް ބިނާ ކުރުމަށް ކުރިމަގުގެ ކޮންމެ ޕްލޭނަކަށް ހުރަސްއެޅޭނެ ކަމެއްގެ ގޮތުގައެވެ.

މި ފިޔަވަޅުގެ ސަބަބުން އިސްރާއީލް އިތުރަށް އެކަހެރިވެދާނެ ކަމަށް ބެލޭ ކަމަށް ރިޕޯޓް ތައް ބުނެއެވެ. ޙަމާސްއާ ދެކޮޅަށް އިސްރާއީލުން ކުރަމުންދާ ހަނގުރާމައިގައި ޣައްޒާގައި ހިންގަމުންދާ އަސްކަރީ ޙަރަކާތްތަކާ މެދު އިސްރާއީލުގެ ބައެއް ހަރުދަނާ އެކުވެރިން ވަރަށް ބޮޑަށް ނުރުހި އަދި ކުށްވެރި ކުރަމުންދާއިރު، ފަލަސްތީނު ދައުލަތެއް ބަލައިގަންނާނެކަން އެ ފަރާތްތަކުން ދަނީ އިއުލާނު ކުރަމުންނެވެ.

"ފަލަސްތީނު ދައުލަތެއްގެ ޚިޔާލު ވަޅުލުން" މި ސުރުޚީއަކާއެކު ނެރުނު ބަޔާނެއްގައި، ސްމޮޓްރިޗްގެ ތަރުޖަމާނު ބުނެފައި ވަނީ، ވެސްޓް ބޭންކުގައި މިހާރު ހުރި އާބާދީ ތަކާއި ޖެރޫސަލަމާ ދެމެދު އޮތް ސަރަހައްދު ގައި ޔަހޫދީން ވަޒަން ވެރި ކުރުވުމަށް 3,401 ގެ އިމާރާތްކުރުމުގެ ޕްލޭނަށް ވަޒީރު ހުއްދަދީފައިވާ ކަމަށެވެ.

މާލޭ އެޑްމިމް ގައި ސްމޮޓްރިޗް ރޮއިޓަރސް އަށް ބުނެފައި ވަނީ މި ޕްލޭނަށް ބުދަ ދުވަހު ޢަމަލީ ސިފަ އަންނާނެ ކަމަށެވެ. ނަމަވެސް ބުދަ ދުވަހު ހިނގާނެ ވަކި ކަމެއް ބުނެފައެއް ނުވެއެވެ.

ފަލަސްތީނުގެ ޚާރިޖީ ވުޒާރާ އިން މި ޕްލޭން ސިފަ ކޮށްފައިވަނީ ނަސްލު ނައްތާލުމާއި، ގަދަކަމުން އަސްލު ވަޒަންވެރިން ނެރެން މަޖުބޫރުކުރުވުމާއި، އަދި އެހެން ބައެއްގެ ބިންތައް ފޭރުމުގެ ކުށްތަކުގެ އިތުރު ފިޔަވަޅެއްގެ ގޮތުގައެވެ.

ޙަމާސް އިން މި ޕްލޭން ސިފަކޮށްފައި ވަނީ އިސްރާއީލުގެ "އިސްތިޢުމާރީ، ހަރުކަށި" ސިޔާސަތުތަކުގެ ބައެއްގެ ގޮތުގައެވެ. އަދި ފަލަސްތީނުގެ ރައްޔިތުންނަށް މިކަމާ ކުރިމަތިލުމަށް ގޮވާލާފައިވެއެވެ. އުރުދުން ގެ ޚާރިޖީ ވުޒާރާއިން މި ފިޔަވަޅު ކުށްވެރިކޮށް ބުނެފައި ވަނީ ބައިނަލްއަޤްވާމީ ޤާނޫނުތަކާ ކަނޑައެޅިގެން ޚިލާފު ކަމެއްގެ ގޮތުގައެވެ.

ވެސްޓް ބޭންކުގައި ވަޒަންވެރި ކުރުމުގެ ޙަރަކާތްތައް ދިރާސާކުރާ "ޕީސް ނައު" އިން ބުނެފައި ވަނީ އިމާރާތްކުރުމުގެ ކުރިން އަދިވެސް ބައެއް ފިޔަވަޅުތައް އަޅަންޖެހޭ ކަމަށެވެ. އޭގެ ތެރޭގައި އިސްރާއީލުގެ ހައި ޕްލޭނިންގ ކައުންސިލުގެ ހުއްދަ ހޯދުން ހިމެނެއެވެ. ނަމަވެސް ހުރިހާ ކަމެއް ކުރިއަށް ދާނަމަ، އަސާސީ ވަސީލަތްތަކުގެ މަސައްކަތް މަދު މަސްތަކެއްގެ ތެރޭގައި ފެށިދާނެ ކަމަށާއި، ގާތްގަނޑަކަށް އަހަހަރެއްހާ ދުވަހުގެ ތެރޭގައި ގެ އިމާރާތްކުރުން ފެށިދާނެ ކަމަށް ބުނެފައިވެއެވެ.