ހަނގުރާމައިގައި އިންޑިއާ ސިފައިން ޕާކިސްތާނުގެ ފަސް ޖެޓް ވައްޓާލި ކަމަށް ބުނެފި, ޕާކިސްތާނުން ދޮގު ކުރޭ!

މެއި މަހުގެ ކުރީކޮޅު އިންޑިއާ އާއި ޕާކިސްތާން އާ ދެމެދު ހިނގި ހަނގުރާމައިގައި އިންޑިއާ ސިފައިން ޕާކިސްތާނުގެ މަދުވެގެން ފަސް ހަނގުރާމަ މަތީ ޖެޓް ވައްޓާލާފައިވާ ކަމަށް ބުނެފިއެވެ.

އެހެން ނަމަވެސް ޕާކިސްތާނުން މިކަން ދޮގު ކުރެއެވެ.

އެއަރ ޗީފް މާޝަލް އޭޕީ ސިންގް ވިދާޅުވެފައިވަނީ މި ޖެޓްތައް ވައްޓާލެވުނީ ރަޝިޔާ ގައި އުފައްދާފައިވާ މިސައިލް ދިފާޢީ ނިޒާމެއް ކަމަށްވާ އެސް-400 ގެ އެހީގައި ކަމަށެވެ. އެމެރިކާގައި އުފައްދާފައިވާ އެފް-16 ހަނގުރާމަމަތީ ޖެޓްތައް ބަހައްޓާފައިވާ ހޭންގަރަކަށް ވެސް ޙަމަލާ ދެވުނު ކަމަށް ސިންގް ހޮނިހިރު ދުވަހު ބެންގަލޫރުގައި ވިދާޅުވިއެވެ.

"އަޅުގަނޑުމެންނަށް މަދުވެގެން ފަސް ޖެޓް ވައްޓާލެވުނުކަން ޔަޤީން ކުރެވިފައިވޭ، އަދި ބޮޑު މަތިންދާބޯޓެއް ވެސް ވައްޓާލެވުނު،" ސިންގް ވިދާޅުވިއެވެ. އެ ބޮޑު މަތިންދާބޯޓަކީ ފަހަރެއްގައި ވަރުގަދަ ރާޑާރެއް ހަރުކޮށްފައިވާ، ނުރައްކާތެރިކަން ދެނެގަތުމަށް ބޭނުން ކުރާ މަތިންދާބޯޓެއް ކަމަށް ވެދާނެ ކަމަށާއި، ނުވަތަ ދުޝްމަނުންގެ ރާޑާރާއި މުވާސަލާތުތައް ދެނެގަތުމަށް ނުވަތަ ހުއްޓުވުމަށް ބޭނުންކުރާ މަތިންދާބޯޓެއް ކަމަށް ވެދާނެ ކަމަށް ވެސް އޭނާ ވިދާޅުވިއެވެ.

މީގެ އިތުރުން، ކަރާޗީ ކައިރީގައިވާ ވައިގެ ބަނދަރެއްގައި ޕާކުކޮށްފައި އޮތް، ދުޝްމަނުންގެ މުވާސަލާތުތައް ހުއްޓުވުމަށް ބޭނުންކުރާ ޒަމާނީ ސާވެއިލަންސް މަތިންދާބޯޓަކަށް ވެސް ޙަމަލާ ދެވުނު ކަމަށް ސިންގް ވިދާޅުވިއެވެ.

ހޮނިހިރު ދުވަހުގެ ފަހު ވަގުތެއްގައި، ޕާކިސްތާނުގެ ދިފާޢީ ވަޒީރު ޚަވާޖާ އާސިފް އެ ޤައުމުގެ އެއްވެސް މަތިންދާބޯޓަކަށް އިންޑިއާ އަށް ޙަމަލާ ދެވިފައި ނުވާކަމަށް ވިދާޅުވިއެވެ. އެކްސް ގައި ކުރެއްވި ޕޯސްޓެއް ގައި ވަޒީރު ހުށަހަޅުއްވާފައިވަނީ ދެ ގައުމުން ވެސް މިނިވަން ފަރާތެއް މެދުވެރިކޮށް މަތިންދާބޯޓުތަކުގެ އިންވެންޓްރީ ބަލައި ޗެކުކުރުމުގެ ފުރުޞަތު ދިނުމަށެވެ.

މެއި މަހު ހިނގި ކުރިމަތިލުން ތަކަކީ ދެ ޤައުމުގެ މެދުގައި މި ދިޔަ ފަންސާސް އަހަރުގެ ތެރޭގައި ހިނގި އެންމެ ނުރައްކާތެރި ކުރިމަތިލުމެވެ.

މި ކުރިމަތިލުން ތަކުގައި ދެ ފަރާތުން ވެސް ޑްރޯން އަދި މިސައިލް ޙަމަލާތަކާއި، އަދި ދެ ޤައުމުގެ ސަރަޙައްދީ ބޯޑަރު ކައިރީ ގައި ބަރު ހަތިޔާރުންނާއި ލުއި ހަތިޔާރުން ޙަމަލާ ތައް ބަދަލު ކުރިއެވެ.

ހަމަލާތައް ފެށުނީ އޭޕްރިލް 22 ވަނަ ދުވަހު އިންޑިއާގެ ބާރުގެ ދަށުގައިވާ ކަޝްމީރު ގައި ހިނގި ޙަދިސާ އެއް ގައި 26 އާންމު ރައްޔިތުން ގެ ގަޔަށް ބަޑިޖަހާ މަރާލުމުންނެވެ. ނިއު ދިއްލީން ތުހުމަތު ކުރީ މިއީ ޕާކިސްތާނުން ރާވައިގެން ހިންގި ޓެރަރިސްޓް ޢަމަލެއް ކަމަށެވެ. އެހެން ނަމަވެސް އިސްލާމާބާދުގެ ވެރިން މިކަމާ ޕާކިސްތާން އާ އެއްވެސް ގުޅުމެއް ނެތް ކަމަށް ވިދާޅުވިއެވެ.

މެއި 31 ގައި ދެއްވި އިންޓަވިއުއެއްގައި، އިންޑިއާ އާމްޑް ފޯސަސްގެ ޗީފް އޮފް ޑިފެންސް ސްޓާފް އަނިލް ޗައުހާން ވިދާޅުވީ ޕާކިސްތާނާއެކު ހިނގި ހަނގުރާމައިގައި އިންޑިއާ ގެ ބައެއް ހަނގުރާމަމަތީ ޖެޓް ތައް ގެއްލިފައިވާ ކަމަށެވެ. ނަމަވެސް ވަކި ތަފްޞީލުތަކެއް ހާމައެއް ނުކުރައްވައެވެ. އެހެން ނަމަވެސް އިންޑިއާގެ ހަނގުރާމަމަތީ ހަ މަތިންދާބޯޓު ވައްޓާލެވުނު ކަމަށް ޕާކިސްތާނުން ކުރި ދަޢުވާއަކީ "އެއްގޮތަކަށްވެސް ޞައްޙަ ނޫން" ދަޢުވާއެއް ކަމަށް އޭނާ ވިދާޅުވިއެވެ. އެއާ އެކު އިންޑިއާ އިން ގެއްލުނު ޖެޓްތަކުގެ އަދަދު ބަޔާން ކުރުމަށް އޭނާ އިންކާރު ކުރެއްވިއެވެ.

ޕާކިސްތާނުން ބުނެފައިވަނީ އިންޑިއާ އިން ދިން އަސްކަރީ ޙަމަލާތަކަށް ރައްދު ދިނުމަށް ޗައިނާގައި އުފައްދާފައިވާ ހަނގުރާމަމަތީ ޖެޓްތައް ބޭނުން ކުރި ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ އިންޑިއާ-ޕާކިސްތާން ހަނގުރާމައިގައި އިންޑިއާ ގެ ފަސް ޖެޓް ވައްޓާލެވިފައި ވެދާނެ ކަމަށެވެ. އަދި ދެ ޤައުމުގެ މެދުގައި ހަނގުރާމަ ހުއްޓުވުމަށް އޭނާގެ ސަރުކާރުން ވިޔަފާރީގެ މަޝްވަރާތައް ބޭނުންކުރި ކަމަށް ތަކުރާރު ކޮށް ވިދާޅުވިއެވެ. މިއީ ނިއު ދިއްލީން ތަކުރާރުކޮށް ދެކޮޅު ހަދާފައިވާ ވާހަކަފުޅެކެވެ. އިންޑިއާ އިން ބުނީ ތިންވަނަ ފަރާތެއްގެ އެހީތެރި ކަމެއް ހަނގުރާމަ ހުއްޓާލުމުގައި ނުހޯދާ ކަމަށެވެ.