ލައިސަންސެއް ނެތި ޕޭމަންޓް ޚިދުމަތްތައް ދޭ ފަރާތްތަކަށް 10 މިލިއަން ރުފިޔާއާ ހަމައަށް ޖޫރިމަނާ ކުރެވޭނެ ގޮތައް ގާނޫނަށް އިސްލާހު ގެންނަނީ

ލައިސަންސެއް ނެތި ޕޭމަންޓް ޚިދުމަތްތައް ދޭ ފަރާތްތަކަށް 100،000 ރުފިޔާ އިން ފެށިގެން 10 މިލިއަން ރުފިޔާއާ ހަމައަށް ޖޫރިމަނާ ކުރެވޭނެ ގޮތައް ގައުމީ ޕޭމަންޓް ސިސްޓަމްގެ ގާނޫނަށް އިސްލާހު ގެންނަން ހުށަހަޅައިފިއެވެ.

ސަރުކާރުގެ ފަރާތުން ޕީއެންސީގެ މެންބަރު، މަކުނުދޫ ދާއިރާ ގެ މެމްބަރު އާދަމް ޝަފީޤު ހުށަހެޅުއްވި މި އިސްލާހުގެ މަޤްޞަދެއް ކަމަށް ބުނެފައިވަނީ ޕޭމަންޓް ސިސްޓަމްތައް ހިންގުމަށާއި ޕޭމަންޓް ޚިދުމަތްތައް ދިނުމުގެ ބޭނުމަށް ކުންފުންޏާއި އެނޫންވެސް ގާނޫނީ ޝަހުސްތައް އުފެއްދުމުގެ ބާރު ގައުމީ ޕޭމަންޓް ސިސްޓަމް ގާނޫނުގެ ދަށުން އެމްއެމްއޭ އަށް ލިބި ދިނުމަށާއި، ޕޭމަންޓް ޚިދުމަތްތައް ސޮލިސިޓް ކުރުން މަނާ ކޮށް އަދަބު ކަނޑައެޅުމާ ބެހޭ އުސޫލުތައް ގާނޫނުގައި ހިމެނުން ކަމަށެވެ.

މި ބިލު ފާސްވުމުން ޕޭމަންޓް ސިސްޓަމްތައް ހިންގުމާއި ޕޭމަންޓް ޚިދުމަތްތައް ފޯރުކޮށްދިނުމުގެ މަސްއޫލިއްޔަތު އަދާކުރާނެ ކުންފުނިތަކާއި އެހެނިހެން ޤާނޫނީ ޝަޚްޞުތައް އުފެއްދުމާއި އެފަދަ ތަންތަނުގެ ހިއްސާ ގެނެވޭނެއެވެ. އަދި ސިސްޓަމެއް ހިންގުމަށްޓަކައި ނުވަތަ ޕޭމަންޓް ޚިދުމަތެއް ދިނުމަށްޓަކައި ހިއްސާދާރެއް ނުވަތަ ޕާޓްނަރެއްގެ ހައިސިއްޔަތުން ކުންފުންޏެއް ނުވަތަ ޕާޓްނަރޝިޕެއް ނުވަތަ ޖޮއިންޓްވެންޗަރ އެއް އެމްއެމްއޭ އަށް އުފެއްދި ދާނެއެވެ. ނުވަތަ އެފަދައިން އުފައްދާފައިވާ ޖޮއިންޓްވެންޗަރ އެއްގެ ހިއްސާދާރަކަށް ނުވަތަ ޕާޓްނަރޝިޕެއްގެ ބައިވެރިއަކަށް ވެވިދާނެއެވެ.

މީގެ އިތުރުން، ބިލު ފާސްވުމުން ލައިސަންސް ނުވަތަ ހުއްދަ ނެތް ފަރާތްތަކުން ދިވެހިރާއްޖޭގައި ޕޭމަންޓް ޚިދުމަތް ދިނުން މަނާ ވާނެ އެވެ.

ހުށަހެޅިފައިވާ ބަދަލުތަކުގެ ދަށުން، "ސޮލިސިޓް" މާނަކުރެވިފައިވަނީ އާންމުންނަށް ޕޭމަންޓް ޚިދުމަތެއް ހުށަހެޅުން ނުވަތަ އެފަދަ ޚިދުމަތްތަކުގެ އިޝްތިހާރު ކުރުމެވެ. ހަމައެކަނި ޞައްޙަ ލައިސަންސެއް އޮތް ނުވަތަ އެމްއެމްއޭއިން ކަނޑައެޅިގެން އިސްތިސްނާ ދީފައިވާ ފަރާތްތަކަށް އެކަނި ރާއްޖޭގައި ޕޭމަންޓާ ގުޅުންހުރި ޚިދުމަތްތައް ހިންގުމާއި ޕްރޮމޯޓްކުރުމުގެ ހުއްދަ ލިބިގެންދާނެއެވެ.

މިހާރު ޤާނޫނުގައި ވަނީ ލައިސަންސް ހޯދަން ޖެހޭ ފަރާތްތަކުގެ ތެރެއިން ބައެއް ފަރާތްތައް އިސްތިސްނާ ކޮށްފައެވެ. މީގެ ތެރޭގައި އެމްއެމްއޭ އިން އަމިއްލަ އަށް ހިންގާ ސިސްޓަމް ތަކާއި، ސެކިއުރިޓީތަކުގެ ސެޓްލްމަންޓްތަކަށް ފައިނޭންޝަލް ސެކިއުރިޓީޒް ގާނޫނުގެ ދަށުން ލައިސަންސް ދޫކޮށްފައިވާ ސިސްޓަމްތަކާއި، ލައިސަންސް ލިބިފައިވާ ބޭންކުތަކުން އެ ބޭންކުތަކުގެ އަމިއްލަ ކަސްޓަމަރުންނަށް ހިންގާ އިންޓަރނަލް ޕޭމަންޓް ސިސްޓަމްތައް މީގެ ތެރޭގައި ހިމެނެއެވެ.

ހުށަހަޅާފައިވާ އިސްލާހުގެ ދަށުން، ޤާނޫނާ ޚިލާފަށް ޢަމަލުކުރާ ފަރާތްތަކަށް، އެ ޚިލާފުވުމުގެ ކުޑަބޮޑުމިނަށް ބަލައި، 10 މިލިއަން ރުފިޔާއާ ހަމައަށް ޖޫރިމަނާ ކުރެވިދާނެއެވެ.