ދިރާގު މޯލްޑިވްސް ގޭމިންގ ކޮންކުއެސްޓް 1500 ގޭމް ކުޅުންތެރިންނާއެކު ފަށަނީ
ގޭމަރުންގެ ހިތްތަކުގައި އާ އުންމީދުތަކެއް ގެނެސްދޭނެ ދިރާގު މޯލްޑިވްސް ގޭމިންގ ކޮންކުއެސްޓް، މިއަހަރުގެ ޖުލައި މަހު ފެށުމަށް ވަނީ ތައްޔާރުވެފައެވެ. 1500 އަށްވުރެ ގިނަ ކުޅުންތެރިން ބައިވެރިވާނެކަމަށް ލަފާކުރެވޭ މި މުބާރާތަކީ ދިވެހި ގޭމިންގ ދާއިރާއަށް އެޅޭ އެންމެ ބޮޑު އެއް ފިޔަވަޅެވެ.
ދިރާގު މައި އިމާރާތް
ދިވެހިރާއްޖޭގެ އެންމެ ބޮޑު ގޭމިންގް ޕްލެޓްފޯމް ކަމުގައިވާ ދިރާގު ގޭމާސް ގިލްޑް (ޑީޖީޖީ) އިން އިންތިޒާމުކޮށްގެން ބާއްވާ ފުރަތަމަ ދިރާގު މޯލްޑިވްސް ގޭމިންގ ކޮންކުއެސްޓް (ޑީއެމްޖީސީ) 31 ޖުލައި 2025 ގައި، 1500 އަށް ވުރެ ގިނަ ގޭމް ކުޅުންތެރިންނާއެކު ފެށުމަށް ތައްޔާރުވެއްޖެއެވެ.
މި ފޯރިގަދަ ޗެމްޕިއަންޝިޕް 31 ޖުލައި 2025 އިން ފެށިގެން 2 އޮގަސްޓް 2025 ގެ ނިޔަލަށް މާލޭގެ ޣިޔާސުއްދީން އިންޓަނޭޝަނަލް ސްކޫލުގައި ކުރިއަށްދާނެއެވެ. ހަތަރު މެޗުގެ ފޯމެޓަށް ކުރިއަށްގެންދާ މި މުބާރާތުން ވަނަވަނަ ހޯދާ ގޭމް ކުޅުންތެރިންނަށް ޖުމްލަ 170،000 ރުފިޔާގެ ބޮޑު އިނާމު ދިނުމަށް ވަނީ ހަމަޖެހިފައެވެ. މި ޗެމްޕިއަންޝިޕްގެ އެފްސީ 25 އަދި ރޮކެޓް ލީގް ޓޯނަމެންޓްގައި ބައިވެރިވުމުގެ ފުރުސަތު 27 ޖުލައި 2025 ގެ ނިޔަލަށް ވަނީ ހުޅުވައިލައިފައެވެ.
ޑީއެމްޖީސީ 2025 ގައި ހިމެނޭ މައިގަނޑު ގޭމިންގް މުބާރާތްތަކުގެ އިތުރުން، ޒިޔާރަތްކުރާ ހުރިހާ ފަރާތްތަކަށް ވެސް ހާއްސަކޮށްގެން ގިނަ ހަރަކާތްތަކެއް ކުރިއަށް ދާނެއެވެ. މި ގޮތުން، ރޭސިންގ ސްޓިމިއުލޭޓަރ ޒޯން، ވަރޗުއަލް ރިއާލިޓީ (ވީއާރ) ޒޯން، ފްރީ ޓު ޕްލޭ ޒޯނަކާއެކު ބޯޑް ގޭމްސް ފަދަ ކުޅިވަރުތަކުގައި ބައިވެރިވުމުގެ ފުރުސަތު ލިބިގެންދާނެއެވެ. މިއީ ގޭމް ކުޅުންތެރިންނަށް އަދި ގޭމިންގ އަށް ލޯބި ކުރާ ހުރިހާ ފަރާތްތަކަށް ފޯރިގަދަ ތަޖުރިބާއެއް ކުރުމަށް ލިބޭ ރަނގަޅު ފުރުސަތެކެވެ.
ދިވެހިރާއްޖޭގެ އެންމެ ބޮޑު ގޭމިންގ ޕްލެޓްފޯމް ކަމުގައިވާ ޑީޖީޖީ އިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް އަދި ގޭމިންގ ކޮމިއުނިޓީ ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. މި މުބާރާތަކީ ވެސް ރާއްޖޭގެ ގޭމިންގ އިންޑަސްޓްރީއަށް އިތުރު ކުރިއެރުމެއް ގެނެސްދޭނެ ކަމެއް ކަމަށް ޑީޖީޖީން ވަނީ ބުނެފައެވެ.
ޑީޖީޖީ އިން ކުރިއަށް ގެންދާ ހަރަކާތްތަކުގެ އެންމެ ފަހުގެ މައުލޫމާތުތައް dgg.mv މެދުވެރިކޮށް ލިބިގެންދާނެއެވެ.
