މާލެ އަތޮޅު, އަތޮޅު ކައުންސިލުގެ ހިސާބުތައް މާލީ ބަޔާނުގައި ހިމަނާފައި ނުވާކަން ހާމަވެއްޖެ
މާލެ އަތޮޅު އަތޮޅު ކައުންސިލުން އެއިދާރާގެ ހިސާބުތައް މާލީ ބަޔާނުގައި ހިމަނާފައިނުވާކަން އޮޑިޓާޖެނެރަލްގެ ރިޕޯޓުން ފާހަގަކުރެވުނު
މާލެ އަތޮޅު، އަތޮޅު ކައުންސިލުގެ ހިސާބުތައް މާލީ ބަޔާނުގައި ހިމަނާފައި ނުވާކަން އޮޑިޓާޖެނެރަލްގެ ރިޕޯޓުގައި ވަނީ ފާހަގަކޮށްފަ
މާލެ އަތޮޅު, އަތޮޅު ކައުންސިލުގެ ހިސާބުތައް މާލީ ބަޔާނުގައި ހިމަނާފައި ނުވާކަން އޮޑިޓަރ ޖެނެރަލްގެ ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލް އޮފީހުން ނެރުނު މާލެ އަތޮޅު، އަތޮޅު ކަައުންސިލްގެ އިދާރާގެ 2022 ވަނަ އަހަރުގެ މާލީ ބަޔާންތަކުގެ އޮޑިޓް އަދި 2020 އަދި 2021 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި މާލެ އަތޮޅު، އަތޮޅު ކައުންސިލުން 2021 ވަނަ އަހަރުގެ މާލީ ބަޔާންތަކުގެ ސައްހަކަމާ މެދު އޮޑިޓާ ޖެނެރަލް ދެކެވަޑައިގަންނަވާ ގޮތާއި 2020 ވަނަ އަހަރުގެ ބަޖެޓުން މާލެ އަތޮޅު ކައުންސިލުން މާލިއްޔަތު ގަވާއިދާ ހިލާފަށް ހަރަދުކޮށްފައިވާ ކަންތައްތަކުގެ ތަފްސީލް ހިމަނާފައިވެއެވެ.
މި ގޮތުން މާލެ އަތޮޅު. އަތޮޅު ކައުންސިލުން އެކައުންސިލުގެ ހިސާބުތައް، މާލީ ބަޔާނުގައި ހިމަނާފައި ނުވާކަން މި ރިޕޯޓުގައި ފާހަގަކޮށް ބުނެފައި ވަނީ ފިނޭންސް މިނިސްޓްރީން 2016 ވަނަ އަހަރުގެ އޮގަސްޓް މަހުގެ 29 ގައި ނެރެފައިވާ ސާކިއުލަރ، އެނެކްސް1 ގައި ރަށު ކައުންސިލްތަކާއި، އަތޮޅު ކައުންސިލްތަކާއި އަދި ސިޓީ ކައުންސިލްތަކުގެ މާލީ ހިސާބުތައް ތައްޔާރުކުރަންވީ ގޮތުގެ ނަމޫނާ ބަޔާންކޮށްދީފައި ވާނެ ކަމަށެވެ.
އަދި މި ނަމޫނާގައި ދެންނެވުނު ކައުންސިލް ތަކުގެ މާލީ ހިސާބުތައް "އިންޓަރނޭޝަނަލް ޕަބްލިކް ސެކްޓަރ އެކައުންޓިންގ ސްޓޭންޑަރޑް (އިޕްސަސް)، ފައިނޭންސަލް ރިޕޯޓިންގ އަންޑަރ ދަ ކޭޝް ބޭސިކް އޮފް އެކައުންޓިންގ" އާއި އެއްގޮތަށް ތައްޔާރުކުރުމަށް ބަޔާންކޮށްފައި ވާނޭ ކަމަށެވެ. އަދި މި ސްޓެންޑަރޑް ގައި އެ އަހަރއްގެ މާލީ ބަޔާންތަކާއި އެކު ކުރީ އަހަރުގެ މާލީ މައުލޫމާތު ހުށަހަޅަން ވާނޭ ކަމަށް ވެސް ބަޔާން ކޮށްފައިވާނޭ ކަމުގައި ރިޕޯޓުގައި ވަނީ ފާހަގަކޮށްފަ އެވެ.
އެހެން ނަމަވެސް މާލެ އަތޮޅު، އަތޮޅު ކައުންސިލްގެ އިދާރާގެ 2022 ވަނަ އަހަރުގެ މާލީ ބަޔާނުގައި 2021 ވަނަ އަހަރުގެ މާލީ މައުލޫމާތުތައް ހިމަނާފައި ނުވާކަން އޮޑިޓާޖެނެރަލްގެ ރިޕޯޓުގައި ވަނީ ފާހަގަކޮށްފައެވެ.
މާލެ އަތޮޅު އަތޮޅު ކައުންސިލުގެ ހިސާބުތައް މާލީ ބަޔާނުގައި ހިމަނާފައި ނުވާކަން ރިޕޯޓުގައި ފާގަކޮށްފައިވާއިރު، އެ ރިޕޯޓުގައި ވާ ގޮތުން މިދިއަ އަހަރުގެ ފެބްރުއަރީ މަހުގެ 27 ގައި ނެރުނު ފިނޭންސް މިނިސްޓްރީގެ ސާކިއުލާއަކުން ކައުންސިލްތަކުގެ އަހަރީ މާލީ ބަޔާން ތައްޔާރުކުރުމާއި ގުޅޭ އެނެކްސްގައި ހިމަނާފައިވާ ނަމޫނާގައި ބަޔާންކޮށްފައިވާ ގޮތަށް 2021 އަހަރުގެ މާލީ މައުލޫމާތު ހިމަނައިގެން މާލީ ބަޔާން ތައްޔާރުކުރުމަށް ދަންނާވައިވާނޭ ކަމަށް ރިޕޯޓުގައި ވަނީ ފާހަގަކޮށްފައެވެ.
މާލެ އަތޮޅު، އަތޮޅު ކައުންސިލުގެ އިދާރާއިން ބޭންކް އޮފް މޯލްޑިވްސްގައި ހުޅުވާފައިވާ 3 އެކައުންޓްގެ، އެކައުންޓްގެ ބާކީ 2020 އިން 2021 ވަނަ އަހަރާއި ދެމެދު ބަލަހައްޓާ ރިކޮންސައިލް ކޮށްފައި ނުވާކަން ފާހަގަކޮށްފައިވެއެވެ.އޮޑިޓާޖެނެރަލް ރިޕޯޓް
މީގެ އިތުރުން މި ރިޕޯޓުގައި ފާހަކޮށްފައި ވާ އެހެން ކަންކަމަށް ބަލާއިރުގައި ކައުންސިލް އިދާރާއަށް ލިބެން ޖެހޭ ފައިސާގެ ތެރޭގައި ހިމެނޭ ބިމުކުލީގެ ގޮތުގައި ލިބެން ޖެހޭ ޖޫރިމަނާ ފައިސާއާއި ލޯނުގެ ގޮތުގައި ދޫކޮށްފައިވާ ފައިސާ އިން އަނބުރާ ކައުންސިލްގެ އިދާރާއަށް ލިބެންޖެހޭ ފައިސާގެ ހިސާބުތައް އެކަށީގެންވާ ގޮތުގައި ބަލަހައްޓާފައި ނުވާކަން ވަނީ ފާހަގަކޮށްފައެވެ.
މީގެ އިތުރުން ކައުންސިލްގެ އިދާރާއިން އެކިއެކި ސްކީމްތަކުގެ ދަށުން ދޫކޮށްފައިވާ ހަތަރު މިލިއަނަށް ވުރެ ގިނަ ރުފިޔާގެ ލޯނުތަކަށް އަނބުރާ ދައްކާފައިވާ ފައިސާއާއި، 2022 ވަނަ އަހަރުގެ ނިޔަލަށް ލިބެން ޖެހޭ ފައިސާގެ ހިސާބުތައް ބަލަހައްޓާފައި ނުވާކަން އޮޑިޓް ރިޕޯޓުގައި ފާހަގަކޮށްފައި ވެއެވެ.
އަދި މީގެ އިތުރުން 2020 އިން ފެށިގެން 2022 ވަނަ އަހަރާއި ދެމެދު ލިބުނު އާމްދަނީގެ ތެރެއިން އެއްވެސް އަދަދެއް ރިޒާވްގެ ގޮތުގައި ކައުންސިލް އިދާރާގައި ރައްކާކޮސްފައި ނުވާކަން ވެސް އޮޑިޓަރ ޖެނެރަލް ރިޕޯޓުގައި ފާހަގަކޮށްފައި ވެއެވެ.
