މިވެރިކަމުގެ ސިޔާސަތުތަށް ހުރީ 10 ނަމްބަރު ކަންވާރު ބޮޅެއް އޮޅުވާލީމައި އޮންނަގޮތަށް ކަމަށް ރައްޔިތުން މަޖިލީހުގެ ކުރީގެ މެންބަރު އަހްމަދު އީސަ ވިދާޅުވެއްޖެއެވެ.

ރާއްޖެ ޓިވީ ފަލަސުރުހީ ޕްރޮގްރާމުގައި ވާހަކަ ދައްކަވަމުން ކުރީގެ މެންބަރު އީސަ ވިދާޅުވީ، މުޢިއްޒުގެ ސަރުކާރުގައި ހަރުދަނާ އެންމެ ސިޔާސަތެއްވެސް ނުދެކޭ ކަމަށާއި ފެންނަނީ ހުސް ތާކުންތާކު ނުޖެހޭ ދޯދިޔާ ސިޔާސަތުތަކެއް ކަމަށެވެ.

މިސަރުކާރުން ވެރިކަމަށް އަންނަށް ގޭގެ ދޮރުމަށްޗަށް ހިނގީ ދީނީ ކާޑު ހިފައިގެން ކަމަށާއި ވެރިކަމަށް އައިސް ހަލާލު ޓުއަރިޒަމް ގެންނަ ވާހަކަ ދައްކާއިރު އެކަމަކީ އިއްޔެއަކު މިއަދަކު ދައްކާ ވާހަކައެއް ނޫންކަމަށް އީސަ ވިދާޅުވިއެވެ. ވަރަށް ގިނަ ދިރާސާތަށް މީގެ ކުރީ ސަރުކާރުތަކުން ވެސް ކޮށްފައިވާކަމަށާއި ސުވާލު އުފެދޭ ކަންކަން އެބަހުރިކަން އީސަ ފާހަގަކުރެއްވިއެވެ.

އީސަ ވިދާޅުވީ ސުވާލު އުފެދޭ ކަންކަމުގެ ތެރޭގައި ހަލާލު ޓުއަރިޒަމް ތައާރަފް ކުރުމުގެ ބޭނުމުގައި 5 ރަށެއް ނުއަގުގައި މާކެޓަށް ނެރުނު ވާހަކަ ވިދާޅުވާއިރު އޭގެން ދެކޮޅު ނުޖެހޭ ވާހަކަތަކެއް ހުރިކަމަށެވެ. އެގޮތުން މިހާރުވެސް ރިސޯޓު ހަދަން ދީފައި ހުރި 158 ރަށް ނުހެދި އެބަހުރި ކަމަށާއި އިހްލާސްތެރިކަމެއް ހުރިނަމަ ދިވެހި ރާއްޖޭގައި ޓުއަރިޒަމް އިސްލާމް ދީނީ ހަމަތަކުގެ ތެރެއަށް ފައްތަން މިސަރުކާރުން ބޭނުންވާނަމަ ނުހެދި ހުރި ރަށްތަކަށް ލުއިތަށް ދީގެން އެބޭފުޅުންނަށް މި ފުރުސަތު ހުޅުވާލައްވާނެ ކަމަށެވެ.

އީސަ ވިދާޅުވީ، ނުހެދި ހުރި ރަށްތައް އޮޔާދާން ދޫކޮށްލާފައި އައު ރަަށްތައް އެއްލައްކަ އަށް ނުވަތަ ފަންސާސް ހާހަށް ދޭނީ އިހްލާސްތެރިކަމެއް ނެތީމައި ކަމަށެވެ. އަދި އެއީ ވަރަށް މަކަރުވެރި ރޭވުމެއްގެ ދަށުން ކައިރީގައި ތިބި ބަޔަކަށް ހިލޭ ފަޅު ރަށްތަކެއް ދޭންވެގެން ކުރަށްވާ ކަމެއް ކަމަށް އީސަ ވިދާޅުވިއެވެ.