ކެލާގެ ތަރައްގީ ހުއްޓިފައި، ފަޅުގައި ރިސޯޓު ތަރައްގީ ކުރުމަށް އިއުލާން ކުރުން ނޫން ކަމެއް މިހާތަނަށް ކޮށްފައިނުވޭ: ޝަރީފް
ކެލާގައި ފަތުރުވެރިކަން ކުރިއެރުވުމަށް ރައްޔިތުން ވަރަށް ބޮޑަށް ބޭނުންވި ނަމަވެސް މިހާރު ވާނުވާއެއް ނޭނގޭ
ހއ.ކެލާ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައިގެންނެވި ގޮތަށް ހއ.ކެލާގައި އެއްވެސް މަޝްރޫއެއް ކުރިއަށް ނުދާ ކަމަށާއި، ފަޅުގައި ރިސޯޓު ތަރައްގީ ކުރުމަށް ވެސް އިއުލާން ކުރުން ނޫން ކަމެއް މިހާތަނަށް ކޮށްފައިނުވާ ކަމަށް ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ރާއްޖެޓީވީގެ ވައުދުނާމާ ޕްރޮގްރާމްގައި ޝަރީފް ވިދާޅުވީ ކެލާގައި ފަތުރުވެރިކަން ކުރިއެރުވުމަށް ރައްޔިތުން ވަރަށް ބޮޑަށް ބޭނުންވާ ކަމަށާއި، 2007 ވަނަ އަހަރުން ފެށިގެން ރައްޔިތުން އެކަމަށް މަސައްކަތް ކުރާ ކަމަށެވެ. ކުރީ ސަރުކާރުގައި އެރަށުގެ ތުނޑި އަލުން ކުއްޔަށް ދޫކުރުމަށް ހުޅުވާލައި، އެމަސައްކަތް ފެށި ކަމަށް އޭނާ ވިދާޅުވިއެވެ.
ކެލާ ފަޅުގައި ރިސޯޓު ތަރައްގީ ކުރުމަކީ ރައީސް މުއިއްޒުގެ ވައުދުފުޅެއްކަން ފާހަގަކުރައްވައި ޝަރީފް ވިދާޅުވީ މި މަޝްރޫއު ކުރިއަށް ގެންދިއުމަށް އިއުލާން ކުރުން ފިޔަވައި އެއްވެސް މަސައްކަތެއް ކުރިއަށް ނުދާ ކަމަށާއި، ރައްޔިތުންނަށް ވާނުވާ ނޭނގޭ ކަމަށެވެ.
މީގެ އިތުރުން ޝަރީފް ވިދާޅުވީ ރަށުގެ ތަރައްގީގެ އެއްވެސް މަސައްކަތެއް ކުރިއަށް ނުދާ ކަމަށާއި، ކުރީ ސަރުކާރުގައި ފަށާފައިވާ މަޝްރޫއުތައް ވެސް ހުއްޓިފައިވާ ކަމަށެވެ. އަދި ވިދާޅުވީ އެވޯޑްކޮށްފައިވާ މަޝްރޫއުތައް ވެސް ކުރިއަށް ނުދާ ކަމަށާއި، މަގު ހެދުމަށް މީހުން ނެގި ނަމަވެސް މަސައްކަތް ކުރިއަށް ނުދާ ކަމަށެވެ.
އޭގެ އިތުރުން ސިއްހީ މަރުކަޒަކީ ކެލައަށް ވަރަށް މުހިންމު. ވަރަށް ދުވަސްވެފައިހުރި ސިއްހީ މަރުކަޒެއް ހުރީ. އެހެންވީމަ އަލުން ސިއްހީ މަރުކަޒެއް އަޅަންވެގެން ކުރީ ސަރުކާރުން ވަނީ ފަށާފައި. އެހެން ނަމަވެސް އެ ތަނބުތައް ޖަހާފައި އެ މަސައްކަތް ވަނީ ހުއްޓިފައި. ފައިސާގެ ދަތިކަން ދިމާވެގެން އެ ކޮންޓްރެކްޓަރު ވަނީ މަސައްކަތް ހުއްޓާލާފައި. ސްކޫލުގެ ތިން ބުރީގެ އިމާރާތުގެ މަސައްކަތް ވަނީ ކުރިއަށް ނުގޮސް އެވެސް ވަނީ ހުއްޓުމަކަށް އައިސްފައި. މީގެ އިތުރުން ފަޅަށް ވަންނަ ވަދެ ނުކުމެ އުޅުމުގެ ދަތިކަން ހައްލު ކުރުމަށް އެމްޓީސީސީއާ މިދިޔަ ސަރުކާރުން ހަވާލުކޮށްފައި. އެމަސައްކަތް ކުރިއަށް ނުދޭ.ރައްޔިތުންގެ މަޖިލީހުގެ ކެލާ ދާއިރާގެ ކުރީގެ މެންބަރު އިބްރާހިމް ޝަރީފް
ޝަރީފް ވިދާޅުވީ ކެލާގެ ހައުސިންގ މަޝްރޫއު، ރަށުގެ އޮފީސް އިމާރާތް ކުރުމުގެ އިތުރުން ސްޓޭޑިއަމް ހެދުމުގެ މަސައްކަތް ހަވާލުކޮށްފައި އޮތް ނަމަވެސް އެ މަސައްކަތް ކުރިއަށް ނުދާ ކަމަށެވެ. އަދި ދަނޑުވެރިކަމުގެ ބިންތަކަށް ކަރަންޓުލައި، ޒަމާނީ ވަސީލަތްތަކާއެކު، ދަނޑުވެރިކަން ކުރިއެރުވުމަށް ވަސީލަތްތައް ފަހިކޮށްދޭނެ ކަމަށް ރައީސް މުއިއްޒު ވިދާޅުވި ނަމަވެސް އެރަށުގެ ދަނޑުވެރިކަން ތަރައްގީ ކުރުމަށް މިހާތަނަށް އެއްވެސް މަސައްކަތެއް ކޮށްފައިނުވާ ކަމަށް އޭނާ ވިދާޅުވިއެވެ.
