އެމެރިކާގައި މިހާރު ކުރިއަށްދާ ފީފާ ކުލަބު ވޯލްޑް ކަޕްގެ ގުރޫޕް ސީގައި ޖަރުމަނުގެ ބަޔާން މިއުނިކް ކުޅުނު ދެ ވަނަ މެޗުގައި ބޮކާ ޖޫނިއާސް ބަލިކޮށް، މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

މުބާރާތުގެ ގުރޫޕް ސްޓޭޖުގައި ބަޔާން ކުޅުނު ފުރަތަމަ މެޗުގައި ވަނީ އޯކްލޭންޑް ސިޓީގެ މައްޗަށް ތަފާތު ބޮޑު ނަތީޖާ އަކުން ކުރި ހޯދައިފަ އެވެ. ބޮކާ ޖޫނިއާސްގެ ފުރަތަމަ މެޗުގައި ވަނީ ބެންފީކާއާ އެއްވަރުވެފަ އެވެ.

ހޮނިހިރު ދުވަހުގެ ފަތިހު މި ދެ ޓީމު ބައްދަލު ކުރި މެޗު ބަޔާން އިން ކާމިޔާބު ކުރީ 2-1 އިންނެވެ. މެޗުގައި ބަޔާން އިން ލަނޑު ޖަހައި ކުރި ހޯދާފައި ވަނިކޮށް، ބޮކާ ޖޫނިއާސް އިން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގެ ތެރޭގައި ލަނޑު ޖަަހައިގެން ބަޔާން ވަނީ މެޗުން މޮޅުވެފަ އެވެ.

މެޗުގެ 18 ވަނަ މިނެޓުގައި ބަޔާން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ ބަޔާންގެ ކޮނާޑް ލެއިމާ ހުރަސްކޮށްދިން ބޯޅައެއް، ކިންގްސްލީ ކޯމަންގެ ފައިގައި ޖެހިފައި ލިބުނު ވަގުތު ގޯލަށް ފޮނުވާލައިގެން ކޭން ޖެހި ލަނޑެކެވެ.

ނަމަވެސް މެޗުގެ ދެ ވަނަ ހާފުގައި ބޮކާ ޖޫނިއާސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެއީ މެޗުގެ 66 ވަނަ މިނެޓުގައި އަލަން ވަލަސްކޯ ދިން ބޯޅައެއްް ހިފައިގެން ގޮސް، ބަޔާންގެ ޑިފެންޑަރުން ކައިރިން ނައްޓައި ގޯލަށް ވައްދާލައިގެން ކެޕްޓަން މިހޭލް މެރެންޓިއޭލް ޖެހި ލަނޑެކެވެ.

މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް ބަޔާން އިން ވަނީ ދެ ވަނަ ލަނޑެއް ޖަަހައި މެޗުން މޮޅުވެފަ އެވެ. ކޭން ތަނަވަސްކޮށްދިން ފުރުސަތެއްގައި ބަޔާން އަށް އެ ލަނޑު ޖަހައިދިނީ މައިކަލް އޮލައިސޭ އެވެ.

މެޗުން މޮޅުވެ ބަޔާން އިން މުބާރާތުގެ ގަދަ 16 އިން ޖާގަ ހޯދީ މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. ގުރޫޕް ސްޓޭޖުގައި ބަޔާން އަށް ބާކީ އޮތީ ބެންފީކާއާ ދެކޮޅަށް ކުޅޭ މެޗެވެ.