އިސްރާއީލުގެ ހަމަލާތަކާމެދު އާންމުންގެ ރުޅިވެރިކަން ފާޅުކުރުމަށް އީރާނުގެ މަގުތަކަށް އެތައް ސަތޭކަ ހާސް މީހުން ނުކުމެއްޖެ

އިސްރާއީލުން އީރާނަށް ދެމުންދާ ހަމަލާތަކާ މެދު އާންމުންގެ ރުޅިވެރިކަން ފާޅުކުރުމަށް އީރާނުގެ މަގުތަކަށް އެތައް ހާސް މީހުން ނުކުމެ މުޒާހަރާ ކޮށްފިއެވެ.

ހުކުރު ނަމާދަށް ފަހު މަގުތަކަށް ނުކުތް މީހުންގެ އަދަދާ ބެހޭ ގޮތުން އަލް ޖަޒީރާ ގެ ރިޕޯޓަރު ބުނެފައި ވަނީ މިއީ މިހާތަނަށް "ތެހެރާނުގަ އާއި ޤައުމުގެ ކުދި ބޮޑު އެތައް ސިޓީ އެއް ގައި ދުވަހަކު ވެސް ނުފެންނަ ވަރުގެ ބޮޑު މުޒާހަރާ އެއް" ކަމަށެވެ.

ހިނގަމުންދާ ހަމަލާތަކާ އެކުވެސް، އިސްރާއީލުގެ ހަމަލާތަކާމެދު ރުޅިވެރިކަން ފާޅުކުރުމަށް އެއްބައިވަންތަ ކަމުގައި މަގުމައްޗަށް ނުކުމެ ހިނގާލުމުގައި ބައިވެރިވި އެތައް ސަތޭކަ ހާސް މީހުން ފެނިއްޖެ ކަމަށް އަލް ޖަޒީރާ އިން ބުނެފައިވެއެވެ.

ތެހެރާން ޔުނިވަރސިޓީ ސަރަހައްދުން ހުކުރު ނަމާދުގެ ފަހުން ފެށި މުޒާހަރާގެ ބައިވެރިން ޝުއޫރު ފާޅު ކުރަމުން، އީރާނާއި ފަލަސްތީނާއި ހިޒްބުﷲގެ ދިދަތައް ނަގައިގެން ތިއްބެވެ.

އީރާނުން ބަދަލު ހިފުމުގެ ގޮތުން ކުރިއަށް ގެންދާ ހަމަލާ ތަކަށް ތާއީދު ކުރާކަމަށް ބުނެ ހަރު އަޑުން ޝުއޫރު ފާޅު ކުރަމުން ވަނީ ގެންގޮސްފައެވެ.

ބައެއް މީހުން އީރާނުގެ އެންމެ މަތީ ވެރިޔާ އާޔަތުﷲ ޢަލީ ޚާމަނާއީގެ ފޮޓޯތައް ހިފައިގެން ތިބި އިރު، އެމަނިކުފާނު ވަނީ އިސްރާއީލުގެ ހަމަލާތައް ފެށުމާއެކު އީރާނުގެ ރައްޔިތުންގެ މެދުގައި އެއްބައިވަންތަ ކަމަށް ގޮވާލައްވާފައެވެ.

އިސްރާއީލުގެ ހަމަލާތަކާ ގުޅިގެން ގިނަ އަދަދެއްގެ ރައްޔިތުން ތެހެރާން ދޫކޮށް އެހެން ސިޓީތަކަށް ހިޖުރަކޮށްފައި ވީ ނަމަވެސް މުޒާހަރާގައި ބައިވެރިވި މީހުންގެ އަދަދު ގިނަ ކަން ރިޕޯޓަރުން ވަނީ ފާހަގަ ކޮށްފައެވެ.

"މި ހަމަލާތައް ފެށުނު ފުރަތަމަ ދުވަހުން ފެށިގެން، އާންމު ރައްޔިތުންގެ ފަރާތުން ވަރުގަދަ ރުޅިވެރިކަން އަޅުގަނޑުމެންނަށް ފެނިފައިވޭ. މިހާރު އެމީހުން އެ ރުޅިވެރިކަން ފާޅުކުރުމަށް މަގު މައްޗަށް ނުކުތީ" ކަމަށް އަލް ޖަޒީރާ އިން ބުނެފައިވެއެވެ.

އީރާނުގެ އިސް އޮފިޝަލުން ވެސް ހިނގާލުމުގައި ބައިވެރިވެފައި ވެއެވެ.

އީރާނުގެ ޖަމާރާން ނިއުސްގެ ސޯޝަލް މީޑިއާ ޕޯސްޓެއްގައި ހާމަ ކޮށްފައިވާ ގޮތުގައި އީރާނުގެ އުއްތަމަ ފަނޑިޔާރު، ކުރީގެ އައި.އާރް.ޖީ.ސީ ކޮމާންޑަރު، އަދި އެތައް ވަޒީރުންނާއި ޕާލިމަންޓުގެ ނައިބު ރައީސް މުޒާހަރާ އިން ފެނިފައިވެއެވެ.

އީރާނުގެ ޕްރެސް ޓީވީ އިން ބުނާ ގޮތުގައި، ޤައުމުގެ އަސްކަރިއްޔާ އަށް ތާއީދުކުރުމުގެ ގޮތުން މިފަދަ މުޒާހަރާތައް މަޝްހަދު، އިސްފަހާން، ތަބްރީޒް، ޤުމް، ޝީރާޒް، ޤަޒްވީން، ޔަޒްދް، އަދި ގީލާން ފަދަ އެތައް އެހެން ސިޓީ ތަކެއްގައި ބޭއްވިފައިވެއެވެ.

މިއީ އިސްރާއީލުގެ ހަމަލާތަކާ ދެކޮޅަށް އީރާނުގެ ރައްޔިތުންގެ މެދުގައި އޮތް ވަރުގަދަ އެއްބައިވަންތަކަމާއި އިސްރާއީލަށް އޮތް ނަފްރަތު ދައްކުވައިދޭ ކަމެއް ކަމަށް ރިޕޯޓުތައް ބުނެއެވެ.

މި މުޒާހަރާތަކުގެ ސަބަބުން އިސްރާއީލާ ދެކޮޅަށް އީރާނުން ދެމުންދާ ހަމަލާތަކަށް ރައްޔިތުންގެ ފަރާތުން ލިބޭ ތާއީދު އިތުރުވެ، އީރާނުގެ ސަރުކާރަށް އިތުރު ބާރެއް ލިބިގެން ދާނެ ކަމަށް ބެލެވޭ ކަމަށާއި އަނެއްކޮޅުން މިކަމުގެ ސަބަބުން މެދުއިރުމަތީގެ މި ހަނގުރާމައިގެ ޙާލަތު އިތުރަށް ގޯސްވެގެން ދިއުމަކީވެސް އެކަށީގެންވާ ކަމެއ ކަމަށް ވެސް ރިޕޯޓުތައް ބުނެއެވެ.

ލުބުނާނުގެ ވެރިރަށް ބެއިރޫތުގައި ވެސް އީރާނަށް ތާއީދު ކޮށް އެތައް ހާސް މީހުން ހުކުރު ދުވަހު މުޒާހަރާ ކޮށްފައިވެއެވެ.