ޚާމަނާއީ އަށް ދެން އިތުރަށް ދިރިއެއް ނުހުރެވޭނެ: އިސްރާއީލުގެ ދިފާއީ ވަޒީރު

އީރާނުގެ އެންމެ މަތީ ވެރިޔާ ޚާމަނާއީ އަށް ދެން އިތުރަށް ދިރިއެއް ނުހުރެވޭނެ ކަމަށް އިސްރާއީލުގެ ދިފާއީ ވަޒީރު ވިދާޅުވެއްޖެއެވެ.

ދިފާއީ ވަޒީރު ކަޓްޒް ވަނީ އީރާނުގެ އެންމެ މަތީ ވެރިޔާ "ނައްތާލުން" ހަނގުރާމައިގެ ލަނޑުދަނޑިއެއްގެ ގޮތުގައި ކަނޑައެޅުއްވި ކަމަށް ވިދާޅުވެފައެވެ.

އީރާނުގެ ލީޑަރު އަވަހާރަ ކޮށްލުމާ ބެހޭ ގޮތުން ކަޓްޒް މި މޭމުރުމުން ވާހަކަ ދެއްކެވީ ބުރާސްފަތި ދުވަހު ހެނދުނު އިސްރާއީލުގެ ބެއަރ ޝޭވާގައި އީރާނުން ދިން ހަމަލާގައި ސޮރޯކާ ހޮސްޕިޓަލަށް ގެއްލުން ލިބުމާ ގުޅިގެން ކަމަށް ރިޕޯޓުތައް ބުނެއެވެ.

"[ޚާމެނެއީ] ފަދަ މީހަކު އަބަދުވެސް ބޭނުންވެފައި ވަނީ އޭނާގެ އޭޖެންޓުން މެދުވެރިކޮށް އިސްރާއީލު ނައްތާލުމަށެވެ. އަހަރެމެންނަށް ހަމަލާދޭން ބޭނުންވާ މި މީހާ އަކަށް ދިރިއެއް ނުހުރެވޭނެ އެވެ. މި މީހާ ހުއްޓުވުމުގެ މައްސަލަ، މި މީހާ ނައްތާލުމުގެ މައްސަލަ، އެއީ މި ހަނގުރާމައިގެ ބައެކެވެ." ކަޓްޒް ވިދާޅުވި ކަމަށް ބީބީސީ އިން ރިޕޯޓު ކޮށްފައިވެއެވެ.

އިސްރާއީލުން ފާއިތުވި ހަފުތާގައި ހަމަލާދޭން ފެށި ފަހުން، އީރާނުގެ ވެރިކަން ބަދަލުކުރުން އެއީ އެމީހުންގެ ހަނގުރާމައިގެ ލަނޑުދަނޑިތަކުގެ ތެރޭގައި ހިމެނޭ ކަމެއްކަން ނުވަތަ ނޫންކަން ނޫސްވެރިންނަށް ސާފުވާ ގޮތް އޮތީ ނުވެފައެވެ.

ހުކުރު ދުވަހު އިސްރާއީލުން އީރާނަށް ހަމަލާ ދިނުމަށް ފަހު، ބޮޑުވަޒީރު ބެންޖަމިން ނަތަންޔާހޫ އީރާނުގެ ރައްޔިތުންނާ މުޚާތަބުކޮށް އިނގިރޭސި ބަހުން ވީޑިއޯއެއް ނެރުއްވިއެވެ. އެ ވީޑިއޯގައި އޭނާ ވިދާޅުވީ, އަސްކަރީ އޮޕަރޭޝަނުން "ތިޔަބައިމީހުންނަށް މިނިވަންކަން ހޯދުމަށް މަގުފަހިވާނެ ކަމަށް" އުންމީދުކުރައްވާ ކަމަށެވެ.

އަންގާރަ ދުވަހު، އެމެރިކާގެ ރައީސް ޓްރަމްޕް، ޚާމަނާއީ އަށް އިޝާރާތް ކުރައްވައި، ސޯޝަލް މީޑިއާގައި ޕޯސްޓެއް ކުރެއްވިއެވެ. "އަހަރެމެން އޭނާ ނައްތައެއް ނުލާނަމެވެ (މަރައެއް ނުލާނަމެވެ!)، ޔަގީނުން ވެސް މިވަގުތަކު ނޫނެވެ..." ޓްރަމްޕް ޓްރޫތް ސޯޝަލްގައި ކުރެއްވި ޕޯސްޓެއްގައި ވިދާޅުވިއެވެ.