ގައުމީ ކޯޗުގެ މަގާމުން އަލީ ސުޒެއިން އިސްތިއުފާދީފި
11 ޖޫން 2025 | ބުދަ 05:00ފީފާ ވާރލްޑް ކަޕް އަދި އޭޝިއަން ކަޕް ކޮލިފައިންގ ގައި ރާއްޖެ ކުޅުނު ފުރަތަމަ ފަސްމެޗުން ވެސް ވަނީ ބަލިވެފަ
ގައުމީ ފުޓްބޯޅަ ޓީމުގެ ކޯޗު އަލީ ސުޒޭން: އޭނާ ވަނީ އަންގާރަ ދުވަހު ގައުމީ ޓީމުގެ ކޯޗުކަމުގެ މަގާމުން އިސްތިއުފާދީފައި
ދިވެހިރާއްޖޭގެ ގައުމީ ފުޓުބޯޅަ ޓީމު ޖެހިޖެހިގެން ފަސްވަނަ މެޗުން ބަލިވުމާ އެކު ގައުމީ ކޯޗު އަލީ ސުޒެއިން އަންގާރަ ދުވަހު މަގާމުން އިސްތިއުފާދެއްވައިފިއެވެ.
ފީފާ ވާރލްޑްކަޕް އަދި އޭޝިއަން ކަޕް ކޮލިފައިންގ ގައި ރާއްޖެ ކުޅުނު ދެވަނަ މެޗުގައި ރަށުން ބޭރުގައި ޓިމޯ ލެސްޓޭ އަތުން ވެސް އަންގާރަ ދުވަހު ވަނީ ބަލިވެފައެވެ. މިއީ ދިވެހި ގައުމީ ފުޓުބޯޅަ ޓީމު ޖެހިޖެހިގެން ބަލިވި ފަސްވަނަ މެޗެވެ.
ރާއްްޖެ ބަލިވެފައިވަނީ ސިންގަޕޫރާ ދެކޮޅަށް ކުޅުނު މެޗާއި އިންޑިއާއާއި ފިލިޕީންސާއި ބަންގްލަދޭޝްއާ ދެކޮޅަށް ކުޅުނު މެޗުތަކެވެ.
ޓިމޯ ލެސްޓޭއާ ދެކޮޅަށް ކުޅުނު މެޗަށް ފަހު ނޫސްވެރިންނާ ވާހަކަދައްކަވަމުން ކޯޗު ސުޒެއިން ވަނީ ގައުމީ ކޯޗުކަމުން އިސްތިއުފާދިންކަން ހާމަކޮށްފައެވެ.
މެޗަށް ފަހު ސުޒެއިން ބުނީ، ލެސްޓޭ މެޗުގެ ނަތީޖާއަކީ ވަރަށް ދަށް ނަތީޖާއެއްކަމަށް ގަބޫލުކުރާ ކަމަށާއި ދިވެހި ފުޓުބޯޅަ އާއިލާގެ ކިބައިން މާފަށް އެދޭ ކަމަށެވެ.
ސުޒޭން ބުނީ ދިވެހި ފުޓުބޯޅަ އުނދަގޫ ހާލަތެއްގައި އޮއްވަ ގައުމީ ޓީމާ އެކު މަސައްކަތް ކުރަން ލިބުން އެއީ ވަރަށް ބޮޑު ޝަރަފެއް ކަމުގަ އެވެ. އަދި، ކޯޗުކަމުގެ މަގާމުގައި ހުރި ދުވަސްތަކުގައި އެއްބާރުލުންދިން ކުޅުންތެރިންނާ، އޮފިޝަލުން އަދި މެނޭޖްމަންޓަށް ޝުކުރުއަދާ ކުރާ ކަމަށް ސުޒޭން ވަނީ ބުނެފަ އެވެ..
ސުޒެއިން ގައުމީ ޓީމާ ހަވާލުވީ ކުރިން ހުރި ކޯޗު ފްރެންޗެސްކޯ މޮރިއޭރޯގެ ކޮންޓްރެކްޓް ހަމަވުމުންނެވެ. ގައުމީ ކޯޗުކަމުގައި ސުޒެއިން ހުންނަތާ ދެ އަހަރެއްހާ ދުވަސް ވެއްޖެއެވެ.
