ބަންގްލަދޭޝް އިން އެޤައުމުގެ ފުރަތަމަ ރައީސް އަދި ފާއިތުވި އަހަރު ވެރިކަމުން ވައްޓާލެވުނު ބޮޑުވަޒީރު ޝެއިޚް ހަސީނާގެ ބައްޕާފުޅުގެ ފޮޓޯ ހިމެނޭ ނޫޓުތަކުގެ ބަދަލުގައި އައު ނޫޓުތަކެއް އާދިއްތަ ދުވަހު ނެރެފިއެވެ.

170 މިލިއަނެއްހާ މީހުން ދިރިއުޅޭ ބަންގްލަދޭޝް މިހާރު ހިންގަމުން ދަނީ ވަގުތީ ސަރުކާރަކުންނެވެ.

ހަސީނާ ފިއްލަވައިގެން އިންޑިއާ އަށް ވަޑައިގަތުމަށް ފަހު އެ ގައުމުގައި ދިރިއުޅުއްވަމުން ގެންދަވާއިރު، 2024 ވަނަ އަހަރު އޭނާގެ ވެރިކަން ވައްޓާލުމަށް ހިންގުނު އިންގިލާބު އަނިޔާވެރިކަމާ އެކު ހުއްޓުވަން މަސައްކަތް ކުރި ކަމުގެ ދަޢުވާގެ ޝަރީޢަތް އާދީއްތަ ދުވަހު ވަނީ ފަށާފައެވެ.

ބަންގްލަދޭޝް ގައި އައު ނޫޓުތައް ތައާރުފް ކުރެވުނު އިރު މިހާތަނަށް ހުރިހާ ނޫޓުތަކެއްގައި ވެސް ހިމެނިފައިވަނީ ހަސީނާގެ ބައްޕާފުޅު، މަރުޙޫމް ޝެއިޚް މުޖީބުއް ރަޙްމާންގެ ފޮޓޯއެވެ. މުޖީބުއް ރަޙްމާނަކީ 1971 ގައި ޕާކިސްތާނު އަތްދަށުން ބަންގްލަދޭޝް މިނިވަން ކުރުމުގައި އިސް ދައުރެއް އަދާކުރެއްވި އަދި ސިފައިންގެ ބަޣާވާތަކުން 1975 ގައި އޭނާއާއި އޭނާގެ ޢާއިލާގެ ގިނަ މެންބަރުން އަވަހާރަ ކޮށްލުމާ ހަމަ އަށް އެގައުމުގެ ވެރިކަން ކުރެއްވި ފަރާތެވެ.

"އައު ސީރީޒް ގެ ޑިޒައިން ތަކުގައި، އެއްވެސް އިންސާނެއްގެ ތަސްވީރެއް ނުހިމެނޭނެއެވެ. އޭގެ ބަދަލުގައި ގައުމުގެ ޤުދުރަތީ މަންޒަރުތަކާއި ސަގާފީ ތަންތަން ދައްކުވައި ދޭނެއެވެ." ބަންގްލަދޭޝް ބޭންކުގެ ތަރުޖަމާނު އާރިފް ޙުސައިން ޚާން އޭއެފްޕީ އަށް ވިދާޅުވިއެވެ.

މުސްލިމުން ގެ މެޖޯރިޓީ އޮންނަ ބަންގްލަދޭޝް އިން މިނެރުނު ފައިސާ ގައި ހިމަނާފައިވާ މަންޒަރުތަކުގެ ތެރޭގައި ހިންދޫ އަދި ބުޑިސްޓު ފައްޅިތަކުގެ މަންޒަރުތަކާއި، އަދި ތާރީޚީ ގަނޑުވަރުތައް ވެސް ހިމެނެއެވެ.

މިހާރު ބޭނުން ކުރަމުންދާ ނޫޓުތަކާއި ފައިސާތައް އައު ނޫޓުތަކާއެކު ދައުރުވަމުން ދާނެއެވެ.

މިއީ ބަންގްލަދޭޝްގައި ބަދަލުވަމުންދާ ސިޔާސީ މަސްރަހާ އެކު ފައިސާގެ ޑިޒަނަށް ބަދަލު އައި ފުރަތަމަ ފަހަރެއް ނޫނެވެ.

އީސްޓް ޕާކިސްތާނުގެ ނަން ބަންގްލަދޭޝް ގެ ނަމަށް ބަދަލުވެ 1972 ވަނަ އަހަރު ނެރުނު ފުރަތަމަ ނޫޓުގައި ވަނީ ޗާޓެކެވެ.

އޭގެ ފަހުން ނެރެނު ނޫޓުތަކުގައި ހިމެނިފައިވަނީ އަވާމީ ލީގުގެ ވެރިޔާ ޝެއިޚް މުޖީބުއް ރަޙްމާންގެ ފޮޓޯއެވެ.

ބަންގްލަދޭޝް ނެޝަނަލިސްޓް ޕާޓީ (ބީ.އެން.ޕީ) ވެރިކަމުގައި ތިބި އިރު، ނޫޓު ގައި ހިމަނާފައި ވަނީ ތާރީޚީ އަދި ސަގާފީ ތަންތަނުގެ މަންޒަރުތަކެވެ.

ފަނަރަ އަހަރުގެ ވެރިކަމެއް އަވާމީ ލީގުން ކޮށްފައި ވަނިކޮށް ހުސްވި އަހަރު ހަސީނާ ވެރިކަމުން ވައްޓާލުމަށް ފަހު މިހާރު އެ ޕާޓީ އަކީ ބަންގްލަދޭޝްގައި މަނާ ކޮށްފައިވާ ޕާޓީއެކެވެ.

ހަސީނާ އާއި ޕާޓީ ލީޑަރުންގެ މައްޗަށް ޝަރީއަތްތައް ހިންގުމަށް ވަގުތީ ސަރުކާރުން އަންނަނީ ތައްޔާރު ވަމުންނެވެ.

އުމުރުފުޅުން 77 އަހަރުގެ ހަސީނާ އަމިއްލަ އަށް އަރުވާލެވިގެން މިހާރު ދިރިއުޅުއްވަނީ އިންޑިއާ ގައެވެ. އަދި ޝަރީއަތައް ހާޒިރުވުމަށް ނެރުނު ކޯޓު އަމުރަށް އޭނާ އިޖާބަ ދެއްވާފައެއް ނުވެއެވެ.