ވައިގެ މަގުން ލަންކާ އަށް އެއް ފަހަރާ އެތެރެ ކުރަން އުޅުނު އެންމެ ގިނަ އަދަދެއްގެ ކޮކެއިން ލަންކާ އެއަރޕޯޓުން އަތުލައިގެންފިއެވެ.

ތައިލެންޑުން އައި އަންހެން ފަސިންޖަރެއްގެ އަތުން ގިނަ އަދަދެއްގެ ކޮކެއިން އަތުލައިގަތީ ހުކުރު ދުވަހު ފަތިހު ބަންޑާރަނާއިކެ އިންޓަރނޭޝަނަލް އެއަރޕޯޓުން (ބީއައިއޭ) ނެވެ. މި އަންހެން މީހާ މަސްތުވާ ތަކެތި އެތެރެ ކުރަން އުޅުނީ ޓެޑީ ބެއަރތަކެއްގެ ތެރޭގައި ފޮރުވައިގެންނެވެ.

މި މައްސަލައިގެ ތުހުމަތުކުރެވޭ ފަރާތަކީ 38 އަހަރުގެ އަމިއްލަ މަސައްކަތްކުރާ ތައިލެންޑުގެ އަންހެނެކެވެ. އޭނާ އެއަރޕޯޓަށް އައީ ގަތަރުގެ ދޯހާއިން ގަތަރު އެއަރވޭޒްގެ ފްލައިޓެއް ގައެވެ. އެއަރޕޯޓުގެ މަސްތުވާތަކެތި ހުއްޓުވުމާ ބެހޭ އޮފިސަރުން އޭނާ ހައްޔަރުކުރީ ލިބުނު މަޢުލޫމާތަކާ ގުޅިގެން އެރައިވަލް ލައުންޖުގައެވެ.

އޭނާގެ ދަބަސް ބަލައި ފާސްކުރުމުން، އޮފިސަރުންނަށް 10 ކިލޯގެ ބަރުދަން ހުރި 500 ކެޕްސިއުލްގެ ކޮކެއިން ޓެޑީ ބެއަރ ތަކެއްގެ ތެރޭގައި ފޮރުވާފައި ހުއްޓާ ވަނީ ފެނިފައެވެ.

ކަސްޓަމްސްގެ މަސްތުވާތަކެތި ހުއްޓުވުމާ ބެހޭ ޑިވިޜަންގެ އިސް އޮފިސަރަކު ބުނި ގޮތުގައި މި މަސްތުވާތަކެތީގެ މަގުމަތީ އަގަކީ 510.66 މިލިއަން ސްރީލަންކަން ރުޕީސް ނުވަތަ 1.72 މިލިއަން އެމެރިކާ ޑޮލަރެވެ. މިއީ ކަޓުނާޔަކެ އެއަރޕޯޓުގެ ތާރީޚުގައި އަތުލައިގަތް އެންމެ ގިނަ އަދަދެއްގެ މަސްތުވާތަކެތި ކަމަށް ރިޕޯޓުތައް ބުނެއެވެ.

ހިފެހެއްޓުނު މަސްތުވާތަކެއްޗާއި ހައްޔަރުކުރެވުނު ތައިލެންޑުގެ އަންހެން މީހާ އިތުރު ތަހުގީގަށް ކަޓުނާޔަކެ އެއަރޕޯޓު ފުލުހުންގެ މަސްތުވާތަކެއްޗާބެހޭ ބިއުރޯއާ ވަނީ ހަވާލު ކުރެވިފައެވެ.

ސްރީލަންކާގެ އޮތޯރިޓީތަކުން ކުރިން ވެސް ވަނީ އެ ޤައުމުގެ ކަނޑުގެ ސަރަހައްދުން ގިނަ އަދަދެއްގެ ހެރޮއިން އަތުލައިގަނެފައެވެ. އޮފިޝަލުން ތުހުމަތު ކުރަނީ އެ ޤައުމު ބޭނުން ކުރަމުން ދަނީ އެހެން ތަންތަނަށް މަސްތުވާތަކެތި ފޮނުވުމުގެ ޓްރާންސިޓް ހަބެއްގެ ގޮތުގައި ކަމަށެވެ.

ހުސްވި އަހަރުގެ އޮކްޓޯބަރު މަހު، ސްރީލަންކާގެ ކޯޓަކުން އީރާނުގެ 10 ފިރިހެނުންނަށް އުމުރަށް ޖަލަށްލުމުގެ ޙުކުމް އިއްވާފައިވެއެވެ. މިއީ 111 ކިލޯ އަށް ވުރެ ގިނަ ހެރޮއިން އެތެރެ ކުރަން އުޅުނު ކަމަށް އެމީހުން އިޢުތިރާފުވުމާ ގުޅިގެންނެވެ. އޭގެ އިތުރުން 2023 ވަނަ އަހަރު، އީރާނުގެ 9 މީހުން މަސްތުވާ ތަކެތި އެތެރެ ކުރަން އުޅުމުގެ ވަކި މައްސަލަ ތަކުގައި އުމުރަށް ޖަލަށްލުމުގެ ޙުކުމް އިއްވާފައިވެއެވެ.

ސްރީލަންކާގެ ތާރީޚުގައި އެންމެ ބޮޑު އަދަދަކަށް މަސްތުވާތަކެތި ހިފެހެއްޓުނީ 2016 ވަނަ އަހަރުގެ ޑިސެންބަރު މަހުއެވެ. އެއީ އިންޑިއާގެ ކުންފުންޏަކަށް އެޑްރެސް ކޮށްފައިވާ ލަކުޑި އުފުލާ ޓްރާންސްޝިޕްމަންޓް ކޮންޓެއިނަރެއްގައި 800 ކިލޯގްރާމް (1،760 ޕައުންޑް) ގެ ކޮކެއިން ފޮރުވާފައި ހުއްޓާ ކަސްޓަމްސް އިން އަތުލައިގަތުމެވެ.