ދުނިޔޭގެ އެންމެ މަގުބޫލު އެއް ޔުނިވަރސިޓީގެ ގޮތުގައި ބެލޭ އެމެރިކާގެ ހާވަޑް ޔުނިވަރސިޓީ އަށް ބޭރުގެ ދަރިވަރުން ވެއްދުމުގެ ފުރުސަތު ޓްރަމްޕްގެ ސަރުކާރުން ބަންދުކޮށްފިއެވެ.

ހޯމްލޭންޑް ސެކިއުރިޓީގެ ސެކްރެޓަރީ ކްރިސްޓީ ނޯއެމް ވިދާޅުވެފައިވަނީ މިއީ ޓްރަމްޕްގެ ޑިމާންޑްތަކަށް ޔުނިވަރސިޓީން އިޖާބަ ނުދިނުމުން އެޅި ފިޔަވަޅެއް ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ހާވަޑް ޔުނިވަރސިޓީ އަށް ބޭރުގެ ދަރިވަރުން ވެއްދުމުގެ ފުރުޞަތު ބަންދުކޮށްފައިވާ ކަމަށް ހޯމްލޭންޑް ސެކިއުރިޓީ ޑިޕާޓްމަންޓުން ވަނީ އިއުލާނު ކޮށްފައެވެ.

ޓްރަމްޕް ހާވަޑްއާ މެދު ކޯފާވީ، އެ ޔުނިވަރސިޓީ އަށް ދަރިވަރުން ވެއްދުމާއި މުވައްޒަފުން ނެގުމުގައި އޭނާގެ އެންގެވުންތަކަށް ޔުނިވަރސިޓީން އަމަލު ކުރުމަށް އިންކާރުކުރުމުންނެވެ. ޓްރަމްޕް ވިދާޅުވެފައިވަނީ ހާވަޑް އިން ފަލަސްޠީނަށް ތާއީދުކޮށް، ޔަހޫދީންނާ ދެކޮޅު ޙަރަކާތްތަކަށް ހިތްވަރުދޭ ކަމަށެވެ.

އެމެރިކާ އާއި ޔޫރަޕްގެ ތަޢުލީމީ މަރުކަޒުތަކުގައި މި ފަހަކަށް އައިސް އިސްރާއީލުން ޣައްޒާގެ ރައްޔިތުންނާ ދެކޮޅަށް ހިންގަމުންދާ ނަސްލު ނައްތާލުމުގެ ހަނގުރާމައާ ދެކޮޅަށް ފުޅާ ދާއިރާއެއްގައި އިހުތިޖާޖުތައް އިންތިޒާމު ކޮށްފައެވެ. 7 އޮކްޓޯބަރު 2023 ގައި އިސްރާއީލުން ފެށި މި ހަނގުރާމައިގައި ޣައްޒާ ވަނީ މުޅިން ފުނޑުފުނޑު ކޮށްލާފައެވެ.

ބުރާސްފަތި ދުވަހު އެކްސްގައި ކުރެއްވި ޕޯސްޓެއްގައި ހޯމްލޭންޑް ސެކިއުރިޓީގެ ސެކްރެޓަރީ ކްރިސްޓީ ނޯއެމް ވިދާޅުވެފައިވަނީ ޓްރަމްޕްގެ އިދާރާއިން "ހާވަޑްގެ ކެމްޕަހުގައި ޔަހޫދީންނާ ދެކޮޅު ޙަރަކާތްތަކަށް މަގުފަހިކޮށްދީ، ޗައިނާގެ ކޮމިއުނިސްޓް ޕާޓީއާއެކު ގުޅިގެން މަސައްކަތްކުރާތީ އެކަމަށް ޖަވާބުދާރީ ކުރުވަމުން" ގެންދާ ކަމަށެވެ.

"ބޭރުގެ ދަރިވަރުން ވެއްދުމާއި އެ ދަރިވަރުން ދައްކާ ބޮޑު ފީތަކުން ޔުނިވަރސިޓީތަކަށް ލިބޭ އެތައް ބިލިއަން ޑޮލަރުގެ އާމްދަނީ ހޯދުމަކީ ޙައްޤެއް ނޫނެވެ. އެއީ ލިބޭ އިމްތިޔާޒެކެވެ،" އޭނާ ވިދާޅުވިއެވެ. "ހާވަޑް އަށް ރަނަނގަޅު ގޮތުގައި ކަންކަން ކުރުމަށް އެތައް ފުރުޞަތެއް ލިބުނެވެ. އެކަމަކު އެކަމަށް އިންކާރު ކުރީ އެވެ."

ޔުނިވަރސިޓީގެ އިދާރާއަށް ފޮނުވި ސިޓީއެއްގައި ނޯއެމް ވިދާޅުވެފައިވަނީ ޔުނިވަރސިޓީގެ ސްޓޫޑަންޓް އެކްސްޗޭންޖް ވިޒިޓަރ ޕްރޮގްރާމް ސެޓިފިކޭޝަން ބާޠިލުކޮށްފައިވާ ކަމަށެވެ. މި ޕްރޮގްރާމް ބަލަހައްޓަނީ އޭނާ އިސްކޮށް ހުންނަވާ އޭޖެންސީގެ ދަށުން ހިނގާ ޔޫއެސް ހޯމްލޭންޑް ސެކިއުރިޓީ އިންވެސްޓިގޭޝަންސް ޔުނިޓުންނެވެ.

މި ފިޔަވަޅުގެ މާނައަކީ ހާވަޑް އަށް ބޭރުގެ ދަރިވަރުން ވެއްދުމުގެ ފުރުޞަތު ނުލިބުމުގެ އިތުރުން، މިހާރު ކިޔަވަމުންދާ ދަރިވަރުން ވެސް "އެހެން ޔުނިވަރސިޓީއަކަށް ބަދަލުވާން ޖެހުން" ކަމަށް ސިޓީގައި ބުނެފައިވެއެވެ.

ހާވަޑް އިން މިކަމާ ބެހޭ ގޮތުން ނެރުނު ބަޔާނެއްގައި ބުނެފައިވަނީ މިއީ "ޤާނޫނާ ޚިލާފު" އަދި "ބަދަލުހިފުމުގެ ގޮތުން އަޅާފައިވާ ފިޔަވަޅެއް" ކަމަށެވެ.

ހާވާޑް އިން ހާމަ ކޮށްފައިވާ ގޮތުގައި އެ ޔުނިވަރސިޓީގައި ދަރިވަރުންގެ ގޮތުގަ އާއި ލެކްޗަރަރުންގެ ގޮތުގައި ދުނިޔޭގެ 140 އަށްވުރެ ގިނަ ޤައުމުތަކަށް ނިސްބަތްވާ ފަރާތްތަކުން އުޅެމުން ދެއެވެ. އަދި އެއީ "އެމެރިކާ އަށާއި ޔުނިވަރސިޓީ އަށް ނުހަނު މުހިންމު ހިއްސާއެއް ކުރާ ބައެކެވެ،" ޔުނިވަރސިޓީން ބުނެފައިވެއެވެ.

މި ފިޔަވަޅަކީ ޔުނިވަރސިޓީއާއި ޓްރަމްޕްގެ ސަރުކާރާ ދެމެދު އުފެދިފައިވާ ފުޅާ ދާއިރާއެއްގެ ހަމަނުޖެހުމެއްގެ ތެރެއިން އަޅާފައިވާ ފިޔަވަޅެކެވެ. މި ހަމަނުޖެހުން އުފެދިފައިވަނީ ޔުނިވަރސިޓީގެ ޑައިވަރސިޓީ ޕްރޮގްރާމްތަކާއި، ފަލަސްޠީނަށް ތާއީދުކޮށް ކުރެވޭ އިހުތިޖާޖުތަކާ ގުޅޭ ގޮތުން ޓްރަމްޕް ގެ ސަރުކާރުން ހުށަހެޅި ޑިމާންޑްތަކަކަށް ޔުނިވަރސިޓީން އެއްބަސްވުމަށް އިންކާރުކުރުމުންނެވެ.

މި ކަމާ ގުޅިގެން ޓްރަމްޕްގެ އިދާރާއިން ވަނީ ތިން ބުރެއްގެ މަތިން ޔުނިވަރސިޓީ އަށް ސަރުކާރުން ދޭ ފަންޑިންގ އާއި ގްރާންޓްތައް ކަނޑާލާފައެވެ. އެއީ ގާތްގަނޑަކަށް ޖުމުލަ 2.6 ބިލިއަން ޑޮލަރަށްވުރެ ބޮޑު އަދަދެކެވެ.

މި ހަފުތާގެ ކުރީކޮޅު ހާވަޑްގެ ރައީސް އެލަން ގާބަރ ޔުނިވަރސިޓީގެ މުސްކުޅި ދަރިވަރުންނަށް ގޮވާލެއްވީ ޔުނިވަރސިޓީއަށް އެހީތެރިވެ ދިނުމަށެވެ.

"އަޅުގަނޑުމެންނާ ހަވާލުކުރެވިފައިވާ މި މުއައްސަސާ މިހާރު ކުރިމަތިލާން ޖެހިފައި މިވަނީ އަޅުގަނޑުމެންގެ ދިގު ތާރީޚުގައި ވެސް ކުރިމަތިނުވާ ފަދަ ގޮންޖެހުންތަކަކާ އެވެ،" ގާބަރ އީމެއިލްއެއްގައި ލިޔުއްވާފައިވެއެވެ.

އިމިގްރޭޝަން ތަޖުރިބާކާރުން ބުނާ ގޮތުގައި ޓްރަމްޕްގެ އިދާރާއިން މި އަޅާފައިވާ ފިޔަވަޅަކީ ޔުނިވަރސިޓީއަށް މާލީ ގޮތުން ލިބޭނެ ބޮޑު ގެއްލުމެއްގެ އިތުރުން ދަރިވަރުންނަށް ކުރިމަތިވާނެ "ވަރަށް ބޮޑު މައްސަލައެއް" ކަމަށެވެ.