އީރާނުގެ ނިއުކްލިއަރ ފެސިލިޓީތަކަށް އިސްރާއީލުން ހަމަލާދޭން ތައްޔާރުވާ ކަމުގެ މައުލޫމާތު އެމެރިކާ އަށް ލިބިފައިވޭ: ސީއެންއެން
ސީއެންއެން އިން ދެ މަސްދަރަކާ ހަވާލާދީ ބުނެފައިވާ ގޮތުގައި އެމެރިކާ އިން ފާހަގަ ކޮށްފައިވާ މިލިޓަރީ ތައްޔާރީތަކުގެ ތެރޭގައި ވައިގެ ހަތިޔާރުތައް އެއްތަނުން އަނެއް ތަނަށް ގެންދިއުމާއި ވައިގެ ތެރޭގައި ހިންގާފައި އަސްކަރީ ތަމްރީންތައް ހިމެނޭ.
އިސްރާއީލުގެ ވައިގެ ސިފައިންގެ އެފް-16 ގެ ހަނގުރާމަ މަތީ މަތިންދާ ބޯޓެއް އިސްރާއީލުގެ އުތުރުގެ ސަރަހައްދެއްގައި އުދުހެނީ - 24 މާޗް 2025
އިސްރާއީލުން އިރާނުގެ ނިއުކްލިއަރ ފެސިލިޓީތަކަށް ހަމަލާ ދިނުމަށް ތައްޔާރު ވަމުން ދާކަމުގެ ޖާސޫސީ މައުލޫމާތު އެމެރިކާ އަށް ލިބިފައިވާ ކަމަށް ސީއެންއެން އިން އަންގާރަ ދުވަހު ރިޕޯޓު ކޮށްފިއެވެ.
މި މަޢުލޫމާތު ލިބިފައިވަނީ އިންޓެލިޖެންސްއާ ގުޅުންހުރި އެމެރިކާ ގިނަ އޮފިޝަލުންން ތަކެއްގެ ފަރާތުން ކަމަށް ވެސް ސީއެންއެން އިން ބުނެފައިވެއެވެ.
އޮފިޝަލުންނާ ހަވާލާދީ އިތުރަށް ބުނެފައިވަނީ އިސްރާއީލުގެ ވެރިން މިކަމާ ގުޅޭގޮތުން ފައިނަލް ނިންމުމެއް ނިންމާފައިވާކަން ސާފުކޮށް އެނގިފައި ނުވާކަމަށާއި، އަދި ހަމަލާ ދިނުމާއި މެދު އެމެރިކާ ސަރުކާރުގެ ތެރޭގައި ޚިޔާލު ތަފާތުވުން އުފެދިފައިވާ ކަމަށެވެ.
ރޮއިޓަރސް އިން ބުނެފައިވަނީ މިކަން ޔަގީން ކުރުމަށް ކުރި މަސައްކަތުން އަދި ކަށަވަރު ކުރެވިފައި ނުވާ ކަމަށާއި، އެމެރިކާގެ ނޭޝަނަލް ސެކިއުރިޓީ ކައުންސިލުގެ ކޮމެންޓަކަށް އެދުމުން ޖަވާބެއް ދީފައި ނުވާ ކަމަށެވެ.
ވޮޝިންގްޓަން ގައި ހުރި އިސްރާއީލުގެ އެމްބަސީ އިން ވެސް އަދި އިސްރާއީލުގެ ބޮޑު ވަޒީރުގެ އޮފީހުން ވެސް އެ ސުވާލަށް ޖަވާބެއް ދީފައެއް ނުވާ ކަމަށް ވެސް ރޮއިޓާސް އިން ބުނެފައިވެއެވެ.
އިންޓެލިޖެންސް އާ ގުޅުންހުރި އެއް މަސްދަރަކުން ސީއެންއެން އަށް ބުނެފައިވާ ގޮތުގައި އިސްރާއީލުން އިރާނުގެ ނިއުކްލިއަރ ފެސިލިޓީއަކަށް ހަމަލާދިނުމުގެ ފުރުސަތު "ފާއިތުވި މަސްތަކުގައި ވަރަށް ބޮޑަށް ވަނީ އިތުރުވެފައެވެ."
އީރާނުގައި ހުރި ހުރިހާ ޔޫރޭނިއަމް އެއް ނައްތާލުމަށް އެމެރިކާ އާ އެކު އީރާނުން އެއްބަސް ނުވެއްޖެނަމަ އެފަދަ ހަމަލާ އެއް ދިނުމުގެ ފުރުސަތު އިތުރަށް ބޮޑުވާނެ ކަމަށް އެ ފަރާތުން ބުނެފައިވެއެވެ.
އައު އިންޓެލިޖެންސް މަޢުލޫމާތު ބިނާވެފައި ވަނީ އިސްރާއީލުގެ އިސް އޮފިޝަލުންގެ ޢާންމު އަދި ސިއްރު މުވާސަލާތުތަކުގެ މައްޗަށާއި، އިންޓަސެޕްޓް ކުރެވިފައިވާ އިސްރާއީލުގެ މުވާސަލާތްތަކާއި، އަދި ކުއްލި ހަމަލާ އެއް ދޭން އުޅޭ ކަމަށް ދޭހަވާ ގޮތަށް އިސްރާއީލުގެ މިލިޓަރީގެ ހަރަކާތްތައް ހުރިގޮތް ބެލުމުގެ މައްޗަށް ކަމަށް ސީއެންއެން އިން ރިޕޯޓު ކޮށްފައި ވެއެވެ.
ސީއެންއެން އިން ދެ މަސްދަރަކާ ހަވާލާދީ ބުނެފައިވާ ގޮތުގައި އެމެރިކާއިން ފާހަގަ ކޮށްފައިވާ މިލިޓަރީ ތައްޔާރީތަކުގެ ތެރޭގައި ވައިގެ ހަތިޔާރުތައް އެއްތަނުން އަނެއް ތަނަށް ގެންދިއުމާއި ވައިގެ ތެރޭގައި ހިންގާފައި އަސްކަރީ ތަމްރީންތައް ހިމެނެއެވެ.
އަނެއް ކޮޅުން އިރާނުގެ ނިއުކްލިއަރ ޕްރޮގްރާމް އާ ބެހޭ ގޮތުން އެމެރިކާ އާ އެކު ކުރެވެމުންދާ މަޝްވަރާ ތަކުގައި، އީރާނުން ޔޫރޭނިއަމް ފައްކާ ކުރުން ހުއްޓާލުމަށް އެމެރިކާ އިން ކުރާ ޑިމާންޑް އަކީ "މޮޔަ" ވާހަކައެއް ކަމަށް ވިދާޅުވެ އީރާނުގެ އެންމެ މަތީ ވެރިޔާ އާޔަތު ﷲ އަލީ ޚާމަނާއީ ވަނީ އެމެރިކާ އަށް ވަރަށް ބޮޑަށް ފާޑު ވިދާޅުވެފައެވެ.
އީރާނަށް ޔުރޭނިއަމް އެންރިޗް ކުރުމަށް ހުއްދަ ނުދޭނެ ކަމަށް އެމެރިކާ އިން ބުނުން ފަދަ ވާހަކަތަކަކީ މޮޔަ ވާހަކަތަކެއް ކަމަށާއި އީރާނުން އެއްވެސް ބައެއްގެ ހުއްދަ އަކަށް އިންތިޒާރެއް ނުކުރާ ކަމަށް އާދީއްތަ ދުވަހު އެ ޤައުމުގެ ސެމީ-އޮފިޝަލް މެހްރު ނިއުސް އެޖެންސީން ރިޕޯޓުކުރި ތަޤުރީރެއްގައި ޚާމެނެއީ ވިދާޅުވިއެވެ.
އަދި އިތުރަށް ވިދާޅުވެފައިވަނީ މަޝްވަރާތަކުން "ނަތީޖާ އެއް ނެރެވޭނެކަން" އޭނާ އަށް އެނގިވަޑައި ނުގަންނަވާ ކަމަށެވެ.
އޭޕްރިލް މަހު މެދުތެރެއިން ފެށިގެން، ވޮޝިންގްޓަނާއި ތެހެރާނުން ވަނީ އޮމާނުން މެދުވެރިއެއްގެ ދައުރު އަދާކުރުމުގެ ތެރެއިން ހަތަރު ބުރެއްގެ މަޝްވަރާތަކެއް ބާއްވާފައެވެ. މި މަޝްވަރާތަކުގެ މަޤްޞަދަކީ އީރާނުގެ ނިއުކްލިއަރ ޕްރޮގްރާމް ވަކި މިންވަރެއްގައި ހިފެހެއްޓުމަށް އެއްބަސްވާ ނަމަ އޭގެ ބަދަލުގައި އެ ޤައުމުގެ މައްޗަށް އަޅާފައިވާ ދަތިކުރުމުގެ ފިޔަވަޅުތައް ލުއިކޮށް ދިނުމެވެ.
ނަމަވެސް، އެ ދެ ފަރާތުގެ މެދުގައި ތަކުރާރުކޮށް ކުރިމަތިވަމުންދާ ޚިޔާލު ތަފާތުވުންތަކުގެ ސަބަބުން، ރޮއިޓަރސް ނިއުސް އެޖެންސީން ބުނާ ގޮތުގައި މި ހަފްތާ ބަންދުގައި ރޯމްގައި ބޭއްވުމަށް ހަމަޖެހިފައިވާ ދެން އޮތް ބުރުގެ މަޝްވަރާތައް ކުރިއަށްދާނެ ކަމާމެދު ވަނީ ސުވާލު އުފެދިފައެވެ.
