"ނަލަ މަރަދޫ" – އައްޑޫގެ އެހެން ރަށްތަކަށް ނަމޫނާއެއް
މަރަދޫގެ އަވަށު އޮފީހުގެ މުވައްޒަފުން ބެލުމުގެ ދަށުން ފުރަތަމަ ހަ ސަރަހައްދެއް ސާފު ކުރަން ފެއްޓި ނަމަވެސް، މިހާރު 12 ސަރަހައްދެއް ސާފުކުރަމުންދޭ
އައްޑޫ ސިިޓީގެ މަރަދޫ
އައްޑޫ ސިޓީގެ މަރަދޫ އަވަށުގެ ސާފު ތާހިރުކަން ދެމެހެއްޓެނެވި ގޮތެއްގައި ބޭއްވުމުގެ ގޮތުން "ނަލަ މަރަދޫ"ގެ ނަމުގައި ހާއްސަ ޕްރޮގްރާމެއް ފަށައިފި އެވެ.
ރާއްޖެއެމްވީއާއި ވާހަކަ ދައްކަވަމުން މަރަދޫ އަވަށު އޮފީހުގެ ޑިރެކްޓަރ މަރިޔަމް ސާއިދާ ވިދާޅުވީ މަރަދޫ އަކީ އައްޑޫ ސިޓީގެ ގުޅިފައިވާ ރަށްތަކުގެ ތެރެއިން، މެދުގައި އޮންނަ ރަށަށްވެފައި ރަށަށް އަރާ ފައިބާ މީހުންވެސް ގިނަ ކަމަށާއި، އެހެންކަމުން މަރަދޫއަކީ އަބަދުވެސް ރީތި ސާފު ރަށެއްގެ ގޮތުގައި ބޭއްވުމަށް ކުރިއަށްގެންދާ މަސައްކަތުގެ ދަށުން "ނަލަ މަރަދޫ"ގެ ނަމުގައި ހާއްސަ ޕްރޮގްރާމެއް ފަށާފައިވާ ކަމަށެވެ.
މިޕްރޮގްރާމްގެ މައިގަނޑު މަގްޞަދަކީ މަރަދޫގެ މަލަމަތި ރީތިކޮށް، ސާފުކޮށް ޒީނަތްތެރިކޮށް ބޭއްވުމެއެވެ. މަރަދޫގެ އަވަށު އޮފީހުގެ މުވައްޒަފުން ބެލުމުގެ ދަށުން ފުރަތަމަ ހަ ސަރަހައްދެއް ސާފު ކުރަން ފެއްޓި ނަމަވެސް، މިހާރު 12 ސަރަހައްދެއް ސާފުކުރަމުންދާ ކަމަށާއި މިއީ އާންމު މުނިސިޕަލް ޚިދުމަތް ދިނުމަށްފަހު ކޮންމެ ދުވަހަކުވެސް އަވަށު އޮފީހުގެ މުވައްޒަފުން ކުރަމުންދާ މަސައްކަތެއް ކަމަށް ސާއިދާ ވިދާޅުވި އެވެ.
ސާއިދާ އިތުރަށް ވިދާޅުވީ މިގޮތަށް މިމަސައްކަތް ފެށުމުން ނަލަ މަރަދޫގެ ގޮތުގައި ސާފުތާހިރުކޮށް ބޭއްވުމަށް ކުރަމުންގެންދާ މަސައްކަތަށް ވަރަށް ބޮޑު ކުރިއެރުމެއް ލިބިފައިވާ ކަމަށެވެ.
އާންމުންގެ ފަރާތުން މިކަން ބަލައިގަނެ، ސާފުތާހިރުކަން އިތުރުވެއްޖެކަމަށް ގިނަ ރައްޔިތުން ބުނަމުންދޭ، ކުރީގެ ފަޅުކޮށް ހުންނަ ތަންތަން މިގޮތަށް ބަލަހައްޓަން ފެށުމުން، އާއްމުން މިހާރު އައިސް އެއްވެ، އެތަނުގައި ވަގުތު ހޭދަކޮށް، އަދި އާބާދީގައި ގިނަ އަދަދެއްގެ މީހުން އުޅުމުން މީހުން އެއްވާނެ ތަނެއްވެސް ކުރިން ނުހުރޭ. ނަމަވެސް މިގޮތަށް ސާފުކޮށް ބޭއްވުމުން މީހުން އައިސް އެތަނުގައި އުފާވެރި ވަގުތުތައް ހޭދަކުރޭމަރަދޫ އަވަށު އޮފީހުގެ ޑިރެކްޓަރ މަރިޔަމް ސާއިދާ
އަވަށު އޮފީހުން އިސްނަގައިގެން މަރަދޫ ސާފުތާހިރު ރަށެއްގެ ގޮތުގައި ބޭއްވުމަށް ކުރަމުންގެންދާ މަސައްކަތަށް އާއްމުންގެ ފަރާތުން ވަރަށް ބޮޑު އެއްބާރުލުމެއް ބޭނުންވާ ކަމަށްވެސް ސާއިދާ ވިދާޅުވި އެވެ. އެގޮތުން ސާފުތާހިރުކޮށް ބޭއްވުމަށް ކޮންމެ މީހަކުވެސް އެމީހެއްގެ ފަރުދީ ޒިންމާ އަދާކުރުމަކީ މުހިއްމު ކަމެއް ކަމަށް އޭނާ ވިދާޅުވިއެވެ.
މިޕްރޮގްރާމް ކުރިއަށްދާގޮތާއި ގުޅޭގޮތުން ވާހަކަދައްވަމުން އަވަށު އޮފީހުގެ މުވައްޒަފުން ބުނެފައިވަނީ ރަށް ޒީނަތްތެރިކޮށް ބޭއްވުމުގެ ގޮތުން، މިގޮތަށް މަސައްކަތްކުރާ މިއީ ފުރަތަމަ ފަހަރު ކަމަށާއި މިކަމުގެ ސަބަބުން އެހެން ރަށްރަށުގެ މީހުންނަށް ނަމޫނާއަކަށް މަރަދޫ ވުމަކީ އުފާ ކުރާ ކަމެއް ކަމަށެއެވެ.
މަރަދޫ އަކީ އައްޑުއަތޮޅުގައި މީހުން ދިރިއުޅޭ ރަށްރަށުގެ ތެރެއިން އެއްރަށެވެ. މަރަދޫއަކީ އިހުގައި ރާއްޖޭގެ އެންމެ ފާހަގަކޮށްލެވޭ އެއް އަތޮޅުކަމުގައިވާ އައްޑުއަތޮޅުގެ ވެރިކަންކުރި ރަށެކެވެ. މިހާރު ރާއްޖެއަށް މަރަދޫ ނަންވެފައި ވަނީ މަސްވެރި ރަށެއްގެ ގޮތުގައެވެ. އާބާދީގެ ގޮތުން އަދި ތަޢުލީމާއި ތަހުޛީބުގެ ގޮތުންވެސް މިރަށަކީ ފާހަގަކޮށްލެވޭ ރަށެކެވެ. އެންމެ ފަހުގެ ތަފާސް ހިސާބުތަކުން ދައްކާ ގޮތުގައި މަރަދޫގެ އާބާދީއަކީ 3845 އެކެވެ.
