ފްލެޓާއި ގޯތި ލިބުން ލަސްވާތީ، ހައުސިން މިނިސްޓަރު ޑރ. އަބްދުﷲ މުއްތަލިބުގެ އިސްތިއުފާއަށް ގޮވާލައި އެމަނިކުފާނުގެ ގޭދޮށަށް އާންމުން އެއްވެ މުޒާހަރާ ކޮށްފިއެވެ.

ބުދަ ދުވަހުގެ ރޭ ކުރިއަށްދިއަ މި މުޒާހަރާގައި އާންމުން ގޮވާލަމުން ދިޔައީ ރައީސް މުއިއްޒުގެ މި ސަރުކާރުން ފޭރިގަނެފައިވާ ފްލެޓާއި ގޯތިތައް އޭގެ ހައްގުވެރިންނަށް އަވަހަށް ދިނުމަށާއި ވަގުތުން ވަގުތައް މިނިސްޓަރ މުއްތަލިބު އިސްތިއުފާ ދިނުމަށެވެ.

މުޒާހަރާގެ ބައިވެރިން މުޒާހަރާ ކުރަމުން ގެންދިއައީ އެމީހުންގެ ހުރި ކަންބޮޑުވުންތައް ރަމްޒުކޮސްދޭ ޝިއާރުތައް ލިޔެފައިވާ ބޯޑުތައް ހިފައިގެންނެވެ. އެގޮތުން މުޒާހަރާގެ އާންމުން ބޭނުން ކުރި މި ޝިއާރުތަކުގެ ބޯޑުތަކުގައި ލިޔެފައި ވަނީ މިނިސްޓަރ މުއްތަލިބު ވަގުތުން އިސްތިއުފާ ދީ، ފޭރިގަތް ފްލެޓާއި ގޯތިތައް އަވަހަށް ދިނުމަށާއި، މަގޭ ފްލެޓް އަތުލީ ނުހައްގުން ކަމަށާއި ރަސްމާލެ ހިއްކާ ފަދައިން ގިރާވަރު ހިއްކަން ފަށަންޖެހޭ ކަމަށްބުނެ މިފަދަ ޝިއާރުތަކެވެ.

މިނިސްޓަރ މުއްތަލުބުގެ އިސްތިއުފާއަށް ގޮވާލައި އާންމުން މުޒާހަރާ ކުރިއިރު، ގެދޮރުވެރިޔާ ސްކީމުން ދޫކުރާ 4،000 ފުލެޓު ލިބޭ މީހުންގެ ލިސްޓު މި އަހަރުގެ މާރޗު މަހު ސަރުކާރުން ވަނީ އާންމުކޮށްފައެވެ. އެ ސްކީމަށް 18،000އަށް ވުރެ ގިނަ ފޯމުތައް ހުށަހަޅާފައިވާއިރު، މި ސަރުކާރުން ނެރުނު ލިސްޓުގައި ވަނީ ފުލެޓަށް ޝަރުތު ހަމަވަނީ 1،820 މީހުން ކަމަށެވެ.

ފުލެޓު ލިސްޓު އާންމު ކުރުމާ ގުޅޭ ގޮތުން މި އަހަރުގެ މާރޗު މަހުގައި ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ގެދޮރުވެރިޔާ ސްކީމަށް ޚާއްސަކޮށް މިހާރު އިމާރާތް ކުރަމުންދާ ޓަވަރުތަކުގައި ހިމެނެނީ ތިން ކޮޓަރީގެ 2،750 ފްލެޓާއި ދެ ކޮޓަރީގެ 1،250 ފުލެޓު ކަމަށެވެ.

އެ ފުލެޓުތަކަށް 1،820 މީހެއްގެ ޝަރުތު ހަމަވެފައިވާއިރު، ބާކީ ފުލެޓުތައް ދޭނީ، ބާކީ 15،000 ފޯމު އިވެލުއޭޓް ކުރުމަށް ފަހު ކަމަށް އޭނާ ވިދާޅުވެފައިވެއެވެ.

ފްލެޓު ލިބޭ ފަރާތްތަކުގެ ލިސްޓު މިދިޔަ ސަރުކާރުން އިއުލާން ކުރި ނަމަވެސް، އެ ލިސްޓުގައި މައްސަލަތައް އުޅޭ ކަމަށް އޭސީސީ ބުނުމުން، އަލުން ލިސްޓު ބެލުމަށްޓަކައި ފްލެޓުތައް ހަވާލުކުރުން އޮތީ މަޑުޖައްސާލައިފަ އެވެ. އެއަށްފަހު، މިދިޔަ އަހަރުގެ ފެބްރުއަރީ މަހު އޭސީސީން ވަނީ ސަރުކާރުން ވަކި ކަންތައްތަކަށް ރިއާޔަތް ކުރުމަށްފަހު، ފުލެޓު ދިނުމަށް ހުއްދަދީފަ އެވެ.

ހައުސިން މިނިސްޓްރީން އެއިރު ނިންމީ އެ މިނިސްޓްރީން ވެސް ލިސްޓު އަލުން ބެލުމަށެވެ. އޭގެ ފަހުން ލިސްޓު ނެރެން ތާރީޚުތަކެއް ދީ، ލިސްޓު ނުނެރޭތީ ގިނަ ބަޔަކު ނުރުހުން ވެސް ފާޅުކުރިއެވެ.