މިނިސްޓަރު އަމީން މަގާމުން ވަކިކުރުމަށް އެމްޑީޕީން ގޮވާލައިފި
ތަހުގީގު އިންސާފުވެރިކަމާ އަދި އާންމުންގެ އިތުބާރު ލިބޭ ގޮތަށް ކުރިއަށް ގެންދެވޭނީ މިނިސްޓަރު މަގާމުން ވަކިކޮށް ނުވަތަ ސަސްޕެންޑްކޮށްގެން
ޓްރާންސްޕޯޓް މިނިސްޓަރު މުހައްމަދު އަމީން
ފުރާޅު މައްޗަށް ޒުވާން އަންހެނަކު ވެއްޓުނު މައްސަލައިގެ ތަހުގީގަށް ޓްރާންސްޕޯޓް މިނިސްޓަރު މުހައްމަދު އަމީން ނުފޫޒު ފޯރުވަމުންދާ ކަމަށް ތުހުމަތު ކުރެވޭ ކަމަށާއި އެހެންކަމުން މިނިސްޓަރ އަމީން މަޤާމުގެ މަސްއޫލިއްޔަތުން މިވަގުތުން ވަގުތަށް އެކަހެރިކުރުމަށް ނުވަތަ ވަކިކުރުމަށް އެމްޑީޕީން ގޮވާލައިފި އެވެ.
އެމްޑީޕީގެ ޕާލިމެންޓަރީ ގްރޫޕުން ހުކުރު ދުވަހު ނެރުނު ނޫސް ބަޔާނުގައި ބުނީ މީގެކުރިން އަމީން ވަނީ އެ މައްސަލައިގައި ނުފޫޒު ފޯރުވަން މަސައްކަތް ނުކުރައްވާ ކަމަށް ވިދާޅުވެފައި ކަމަށާއި ނަމަވެސް ޕޮލިސް ކޮމިޝަނަރަށް އަމީން ގުޅުއްވަން އުޅުއްވުމަކީ ތަހުގީގަށް ނުފޫޒު ފޯރުވަން އުޅުނު ކަމުގެ އަމަލެއް ކަމަށް ބެލުމުގެ ޖާގަ އޮތުމުން އެފަދަ މައްސަލައެއްގެ ތަހުގީގު އިންސާފުވެރިކަމާ އަދި އާންމުންގެ އިތުބާރު ލިބޭ ގޮތަށް ކުރިއަށް ގެންދެވޭނީ މިނިސްޓަރު މަގާމުން ވަކިކޮށް ނުވަތަ ސަސްޕެންޑްކޮށްގެން ކަމަށް އެމްޑީޕީން ބުންޏެވެ.
އެމްޑީޕީން ބުނީ އެކަމާ ގުޅޭ ނޫސްވެރިންގެ ބައްދަލުވުން އިއްޔެ ހިނގަމުން ދަނިކޮށް ވެސް މިނިސްޓަރު ޕޮލިސް ކޮމިޝަނަރަށް އެތައް ފަހަރަކު ގުޅުއްވަން މަސައްކަތް ކުރެއްްވި ކަމަށް ދޭހަވާ ވާހަކަތަކެއް ލައިވްފީޑްތަކަށް އަރާފައިވާ ކަމަށެވެ.
ހާދިސާއާ ގުޅުންހުރި އެއް އިމާރާތަކީ އަމީން ދިރިއުޅުއްވާ ގެ ކަމަށާ އަދި އެ ހާދިސާއާ ގުޅުން ހުރި ބައެއް މީހުންނަކީ ވެސް މިނިސްޓަރާ އާއިލީ ގޮތުން ގުޅުންހުރި މީހުން ކަމަށެވެ.
އެ މައްސަލައިގައި ރައީސް އޮފީހުގެ އަންޑަ ސެކްރެޓަރީ ފޮ ޑިޖިޓަލް ސްޓެރެޓެޖީގެ މަގާމުގައި ހުންނެވި ދާއޫދު އަހްމަދު ޒިލާލް ސަސްޕެންޑްކޮށް، ރައީސް އޮފީހުގެ އަންޑަ ސެކްރެޓަރީ ފޮ ސްޓްރެޓެޖިކް ކޮމިއުނިކޭޝަންގެ މަގާމުގައި ހުންނެވި އިޒްދިޔާން މުހައްމަދު މައުމޫން އިއްޔެ ވަނީ ވަކި ވެސް ކޮށްފަ އެވެ. އަދި މިމައްސަލައާ ގުޅިގެން ހައްޔަރު ކުރި ރައުދު އަޙްމަދު ޛިލާލް ގެ ބަންދާމެދު ގޮތެއް ނިންމުމަށް ހުކުރު ދުވަހު ކޯޓަށް ހާޒިރު ކުރުމުން 5 ދުވަހަށް ބަންދު ކުރުމަށް އަމުރު ކޮށްފިއެވެ.
މިހާދިސާގައި އަނިޔާވި ޔުމްނު އަށް އިންސާފު ހޯދުމަށް ގިނަ ބަޔަކު ދަނީ އެއްވެ އަޑުއުފުލަމުންނެއެވެ.
