ފެންފުޅިތަކެއްގައި ގިނަ އަދަދެއްގެ "ބަނގުރާ" އުފުލާކަމުގެ ތުހުމަތުގައި ނޭޕާލް މީހަކު ހައްޔަރުކޮށްފި
ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 75 ފުޅި ފެނިފައިވޭ
ބަނގުރާ އަޅާފައިވާ ބެލެވޭ ފެންފުޅިތައް-
ފެންފުޅިތަކެއްގައި ގިނަ އަދަދެއްގެ "ބަނގުރާ" އުފުލާކަމުގެ ތުހުމަތުގައި ނޭޕާލް މީހަކު ހައްޔަރުކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ބަނގުރާއަށް ޝައްކު ކުރެވޭ އެއްޗެއް ހުރި ފުޅިތަކެއް އަޅާފައި ހުރި ފޮށިތަކެއް އަރުވައިގެން ވޭނެއް ހުޅުމާލެއަށް ދަތުރުކުރާ ކަމަށް ލިބުނު މައުލޫމާތަކާ ގުޅިގެން އެ ވޭން ބުރާސްފަތި ދުވަހުގެ ރޭ 21:46 އެހައިކަންހާއިރު ހުޅުމާލެ ރީތި ގަސް މަގުން ހުއްޓުވާ ބަލާ ފާސްކޮށްފައިވާ ކަމަށެވެ.
ފުލުހުން ބުނީ ވޭން ބަލައި ފާސްކުރިއިރު، ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 75 ފުޅި ފެނިފައިވާ ކަމަށެވެ.
މީގެ އިތުރުން ފުލުހުން ބުނީ މި މައްސަލައާ ގުޅިގެން ވޭން ދުއްވި ނޭޕާލްއަށް ނިސްބަތްވާ ފިރިހެނެއް ހައްޔަރުކޮށްފައިވާ ކަމަށެވެ. އެއީ އުމުރުން 37 އަހަރުގެ ތިރުތަ ބަހާދުރު ނަމަކަށް ކިޔާ މީހެކެވެ.
ވޭން ޓޯކޮށް މިމައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
