ސަރުކާރުގެ ގޯސް ވާހަކަ ދައްކާ އަޑު އުފުލުމުން ރީޝާ ވެސް ފުލުހަށް ހާޒިރުކޮށްފި

ސަރުކާރުގެ ގޯސް ވާހަކަ ދައްކާ އަޑު އުފުލާތީ ބިރު ދެއްކުމުގެ ގޮތުން އެމްޑީޕީގެ މުޒާހަރާތަކުގެ ހަރަކާތްތެރިވާ ރީޝާ އަހުމަދު ވެސް ފުލުހަށް ހާޒިރުކޮށްފިއެވެ.

އޭނާ ފުލުހަށް ހާޒިރުކޮށްފައިވަނީ ހޯމަ ދުވަހުގެ ރެއެވެ. މިއީ އެމްޑީޕީން ސަރުކާރާއި ދެކޮޅަށް ކުރަމުންދާ މުޒާހަރާތަކާއި ގުޅިގެން ހާޒިރުކުރި 12 ވަނަ މީހާއެވެ.

ގަލޮޅު ޕޮލިހަށް ހާޒިރުކުރުމުން މީޑިއާއާއި ވާހަކަ ދައްކަމުން ރީޝާ ބުނީ އޭނާ ޕޮލިހަށް ޙާޒިރުކުރި ސަބަބެއް ނޭނގޭ ކަމަށެވެ. އަދި ފުލުހުން ފޮނިވި ޗިޓްގައި ވެސް އެކަމާއި ގުޅޭ އެއްވެސް ވާހަކައެއް ނެތް ކަމަށެވެ. ރީޝާ ބުނީ ބޮޑަށް ލަފާކުރެވެނީ ހާޒިރުކުރީ މުޒާހަރާއާއި ގުޅިގެން ކަންކަން ސާފުކުރުމަށް ކަމަށާއި، ފުލުހަށް ހާޒިރުކުރަންޖެހޭ ސަބަބެއް އޮތްކަމަށް ގަބޫލެއް ނުކުރާ ކަމަށެވެ.

ސުލްހަވެރިކަމާއެކު ކުރަމުން އައި މުޒާހަރާއެއް މިއީ މިއަދާ ހަމައަށް. އެހެންވީމަ ފުލުހަށް ހާޒިރުކުރަނީ އަންހެނަކަށް ވީތީ ކަމަށް ބޮޑަށް ބެލެވެނީ. އަޅުގަނޑުމެން ހުއްޓުވަން، ކޮންފިޑެންސް ލޯ ކުރަންވެގެން ހިންގާ ޖަރީމާއެއްކަމަށް ސިފަކުރަނީ.

ރީޝާ އަހުމަދު

ރީޝާގެ ވަކީލު ވިދާޅުވީ އަންހެނަކަށްވީތީ ވަކި ތަފާތުކުރުމެއް އޮވެގެން ނުވާނެ ކަމަށެވެ. އަދި ސިޔާސީ މައިދާނުގައި އަންހެނުންނަށްވެސް އެމީހުންގެ ބަސް އިއްވެންޖެހޭނެ ކަމަށާއި، އަންހެން ބޭފުޅުން ޕޮލިހަށް ހާޒިރުކުރުމަކީ އެމީހުން ބިރުގަންނަވާލުމަށް ކުރައްވާ ކަމެއްގެ ގޮތުގައި ދެކެވަޑައިގަންނަވާ ކަމަށެވެ.

ރީޝާ ފުލުހަށް ހާޒިރުކުރިތަނުގައި "ވަޅު ކައްޓަފުޅި ދާންޏަކަށް ނުސިހޭނެ!" ޖަހާފައި އިން ޕޯސްޓަރެއް ހިފައިގެން މީހަކު ހުރުމުން ފުލުހުންގެ ތެރެއިން އޮފިސަރަކު ނުކުމެ އެ ލިޔުން ދުރުކުރުމަށް ބުނާ މަންޒަރުވެސް ފެނިގެންދެއެވެ. އަދި އެތަނުގައި މީޑިއާއަށް މައުލޫމާތު ދިނުމަށް ތިބި ފަރާތްތައް އެތަނުން ދިއުމަށް އަންގަމުން ދިޔައެވެ.

އެމްޑީޕީގެ މުޒާހަރާތަކާއި ގުޅިގެން މިހާތަނަށް ހާޒިރުކުރި މީހުންގެ ތެރޭގައި އާއިޝަތް ނަޖުދާ އަލީ، ފާތިމަތު ޝިއުނާ، ހަދީޖާ މުހައްމަދު، މަރިޔަމް ޒުބައިރުގެ އިތުރުން މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ، އާރުޑީސީގެ ކުރީގެ އެމްޑީ މޫސާ އަލި މަނިކުގެ އިތުރުންވެސް މުޒާހަރާގައި ބައިވެރިވާ އިތުރު ފަރާތްތައް ވަނީ ފުލުހަށް ހާޒިރުކޮށްފައެވެ.