މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ސްޓެލްކޯއާ ދެކޮޅަށް ކުޅުނު މެޗުން މުއިވެޔޮ ފްރެންޑްސް މޮޅުވެއްޖެ އެވެ.

މުއިވެޔޮގެ ފުރަތަމަ މެޗުގައި ވަނީ ދަ ގްރާންޑޭއާ އެއްވަރުވެފަ އެވެ. ސްޓެލްކޯ އިން ވަނީ ފުރަތަމަ މެޗުގައި ކުލަބު އީގަލްސްގެ މައްޗަށް ކުރި ހޯދައިފަ އެވެ.

ހޯމަ ދުވަހުގެ ހަވީރު މާފަންނު ޓާފު ދަނޑުގައި ކުޅުނު މި މެޗަކީ، ގުރޫޕު ބީ ގައި މި ދެ ޓީމުގެ ވެސް ދެ ވަނަ މެޗެވެ. އެ މެޗުގައި މުއިވެޔޮ އިން ވަނީ 5-0 ގެ ނަތީޖާ އަކުން ސްޓެލްކޯ ބަލިކޮށްފަ އެވެ. މެޗުގެ ފުރަތަމަ ހާފުގައި މުއިވެޔޮ އިން ދެ ލަނޑު ޖެހިއިރު، އަނެއް ތިން ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ 24 ވަނަ މިނެޓުގައި މުއިވެޔޮ އަށް ލީޑު ނަގައިދިނީ އަޙުމަދު ސަޢީދު އެވެ. އޭގެ ދެ މިނެޓު ފަހުން، ނައިބު ރައީސް އަލްއުސްތާޛް ޙުސެއިން މުޙައްމަދު ލަޠީފް ވަނީ މުއިވެޔޮގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. މުއިވެޔޮގެ ކެޕްޓަންކަން ވެސް ކުރައްވަމުން އަންނަނީ ނައިބު ރައީސް އެވެ.

އޭގެ ފަހުން މެޗުގެ 38 ވަނަ މިނެޓުގައި މުއިވެޔޮގެ ތިން ވަނަ ލަނޑު ޖެހީ އިބްރާހީމް ފުރުގާން އެވެ. އަދި 46 ވަނަ މިނެޓުގައި ޢަބްދުﷲ ޝުޖާއު ވަނީ އެ ޓީމުގެ ހަތަރު ވަނަ ލަނޑު ޖަހައިފަ އެވެ. މެޗުގައި މުއިވެޔޮގެ ފަސް ވަނަ ލަނޑު ޖެހީ ފުރުގާން އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.