ޣައްޒާ އަލުން ބިނާ ކުރަން 53 ބިލިއަން ޑޮލަރުގެ ޕްލޭނެއް މިސްރުން ހުށަހަޅައިފި
މި ޕްލޭނުގެ ދަށުން ފުރަތަމަ ހަ މަސް ދުވަހުގެ ތެރޭގައި އޮތީ 3 ބިލިއަން ޑޮލަރު ހޭދަކޮށްގެން ނުރައްކާތެރި ކުނިބުންޏާއި، ފުނޑުވެފައިވާ އިމާރާތްތަކުން ބިން ސާފު ކުރުމާއި ވަގުތީ ހިޔާވަހިކަން ފޯރުކޮށްދިނުމުގެ މަސައްކަތް ކުރުމެވެ.
އަރަބި ލީގުން ޤާހިރާގައި ބޭއްވި އާދަޔާ ހިލާފު ސަމިޓުގައި ގައުމުތަކުގެ ބައެއް އިސް ވެރިންނާއި ބައެއް ގައުމުތަކުގެ ޚާރިޖީ ވަޒީރުން ބައިވެރިވެވަަޑައިގެންނެވި - 4 މާޗް 2025
ޣައްޒާ ގައި އިސްރާއީލުން ހިންގި ހަނގުރާމައިގެ ސަބަބުން ހަލާކުވެފައިވާ ސަރަޙައްދުތައް އަލުން ބިނާކުރުމަށްޓަކައި މިސްރުން 53 ބިލިއަން ޑޮލަރުގެ ފަސް އަހަރުގެ ތަރައްގީގެ ޕްލޭނެއް ހުށަހަޅައިފިއެވެ.
މި ޕްލޭނަކީ އެމެރިކާގެ ރައީސް ޑޮނަލްޑް ޓްރަމްޕް ޣައްޒާ އެމެރިކާގެ ބާރުގެ ދަށަށް ގެނެސް އެތަނުގައި ތިބި ފަލަސްތީނުގެ ރައްޔިތުން އަވަށްޓެރި ގައުމުތަކަށް ބަދަލު ކުރުމަށް ހުށަހެޅި، ގިނަ ފާޑުކިޔުންތަކާ ކުރިމަތިވި ޕްލޭނުގެ ބަދަލުގައި ހުށަހެޅި އޮޕްޝަނެކެވެ.މި ޕްލޭނަށް މަޝްވަރާ ކުރުމަށް އަރަބި ލީގުގެ ޚާއްޞަ ސަމިޓެއް ގާހިރާ ގައި ބޭއްވުނު ވަނީ އަންގާރަ ދުވަހު ބާއްވާފައެވެ. މިސްރުގެ ރައީސް އަބްދުލް ފައްތާޙް އަލް-ސީސީ ވިދާޅުވި ގޮތުގައި މި ޕްލޭނުގެ ސަބަބުން ޣައްޒާގެ ރައްޔިތުން އެމީހުންގެ ބިމުގައި ދެމިތިބުމަށް މަގުފަހިވެގެން ދާނެއެވެ.
މި ޕްލޭނުގެ ދަށުން ފުރަތަމަ ހަ މަސް ދުވަހުގެ ތެރޭގައި އޮތީ 3 ބިލިއަން ޑޮލަރު ހޭދަކޮށްގެން ނުރައްކާތެރި ކުނިބުންޏާއި، ފުނޑުވެފައިވާ އިމާރާތްތަކުން ބިން ސާފު ކުރުމާއި ވަގުތީ ހިޔާވަހިކަން ފޯރުކޮށްދިނުމުގެ މަސައްކަތް ކުރުމެވެ. އޭގެ ފަހުން 2027 އާ ހަމައަށް 20 ބިލިއަން ޑޮލަރު ހޭދަކޮށްގެން އަސާސީ އިންފްރާސްޓްރަކްޗަރ އާއި ދާއިމީ ގެދޮރު އެޅުމުގެ މަސައްކަތް ކުރެވޭނެއެވެ.2030 އާ ހަމައަށް ކުރިއަށްދާނެ އެންމެ ފަހު މަރުހަލާގައި 30 ބިލިއަން ޑޮލަރު ހޭދަކޮށްގެން އިތުރު ގެދޮރާއި، އިންފްރާސްޓްރަކްޗަރ އަދި ވިޔަފާރި ފެސިލިޓީތައް ޤާއިމް ކުރެވޭނެއެވެ. މި ޕްލޭނުގެ އަގަކީ އދ. އިން އަންދާޒާކުރާ ޣައްޒާ އަލުން ބިނާކުރުމަށް ބޭނުންވާ އަދަދާ ގާތްގަނޑަކަށް އެއްވަރުގެ އަދަދެއްކަން ފާހަގަ ކުރެވެއެވެ.މި ޕްލޭނަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ވަނީ ފުރިހަމަ އަށް ތާއީދު ކުރައްވާކަން ފާޅުކުރައްވާފައެވެ. އަދި ފައިސާ ބެލެހެއްޓުމަށް ބައިނަލްއަޤްވާމީ ފެންވަރުގެ ޓްރަސްޓް ފަންޑެއް ޤާއިމްކުރުމަށްވެސް ވަނީ ހުށަހަޅާފައެވެ.
"މި މަސައްކަތައް ފުރިހަމަ އެއްބާރުލުން ދިނުމަށް އދ އޮތީ ތައްޔާރަަށް'" ކަމަށް ގުޓަރެސް ވިދާޅިވިއެވެ.
އޭނާ ވަނީ ޣައްޒާ އޮންނަން ޖެހޭނީ ކުރިމަގުގެ މިނިވަން މުސްތަގިއްލު ފަލަސްތީނު ދައުލަތުގެ ބައެއްގެ ގޮތުގައި ކަމަށް ވެސް ވިދާޅުވިއެވެ.
ފަލަސްތީނުގެ ރައީސް މަހްމޫދު އައްބާސް ވެސް ވަނީ މިސްރުގެ ޕްލޭނަށް ތާއީދު ކުރައްވާފައެވެ.
އުރުދުންގެ ރަސްގެފާނު އަބްދުﷲ، އިރާގުގެ ރައީސް އަބްދުލް ލަތީފް ރާޝިދު ވެސް ވަނީ ޕްލޭނަށް ތާއީދު ކުރައްވާ ސަމިޓުގައި ވާހަކަފުޅު ދައްކަވާފައެވެ.
