ބާކީ ރަހީނުން ދޫކޮށްނުލައިފިނަމަ "ހިޔާލައްވެސް ނުގެނެވޭފަދަ" ނަތީޖާތަކެއް ކުރިމަތި ވާނެކަމުގެ އިންޒާރު ނަތަންޔާހޫ ހަމާސް އަށް ދީފި

ހަމާސް އިން ހައްޔަރު ކޮށްފައިތިބި ބާކީ ރަހީނުން ދޫކޮށްނުލައިފިނަމަ "ހިޔާލައްވެސް ނުގެނެވޭފަދަ" ނަތީޖާތަކެއް ކުރިމަތިވާނެކަމުގެ އިންޒާރު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހަމާސްއިން ދެއްވައިފިއެވެ.

އިސްރާއީލުގެ ޕާލިމެންޓުގައި ދެއްކެވި ވާހަކަފުޅުގައި ނެތަންޔާހޫ މިފަދައިން ވިދާޅުވީ، ޣައްޒާގެ ހަނގުރާމަ ހުއްޓުވުމާބެހޭ އެއްބަސްވުމުގެ ދެވަނަ ފިޔަވަހީގެ މަޝްވަރާތައް ހުއްޓިފައިވާ ދަނޑިވަޅެއްގައެވެ. ނަތަންޔާހޫގެ އިންޒާރު އައި އިރު ޣައްޒާ އަށް އެހީ ފޯރުކޮށްދިނުމުގެ ހުރިހާ މަގުތަކެއް އިސްރާއީލުން ވަނީ ބަންދު ކޮށްފައެވެ.

ހަނގުރާމައިގެ ފުރަތަމަ މަރުހަލާގައި، ހަމާސްއިން 25 ދިރިތިބި ރަހީނުންނާއި 8 މަރުވެފައިވާ މީހުންގެ ހަށިގަނޑު އިސްރާއީލާ ހަވާލުކުރިއެވެ. އޭގެ ބަދަލުގައި އިސްރާއީލުން 1،800 އެއްހާ ފަލަސްތީނު މީހުން އިސްރާއީލުގެ ޖަލުތަކުން ދޫކޮށްލިއެވެ.

އިސްރާއީލުގެ ޕަބްލިކް ބްރޯޑްކާސްޓަރު ކަން ގެ ރިޕޯޓުގައި ބުނެފައިވާ ގޮތުން، ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ މަރުހަލާގެ މުއްދަތު މިދިޔަ ހޮނިހިރު ދުވަހަށް ހަމަވެފައިވާއިރު، ނަތަންޔާހޫ ބޭނުންފުޅުވަނީ އެމެރިކާގެ ސްޕެޝަލް އެންވޮއި ވިޓްކޮފް ސަރަހައްދަށް ވަޑައިގަންނަވަންދެން މަދުވެގެން އެއް ހަފްތާއަށް އެއްބަސްވުމުގެ ފުރތަމަ މަރުހަލާ އިތުރުކުރުމަށެވެ.

ނަތަންޔާހޫ އާ އަރިސް ފަރާތްތަކަށް ހަވާލާދީ ކަން އިން ރިޕޯޓުކޮށްފައިވާ ގޮތުގައި މެދުވެރިން ބޭނުން ކޮށްގެން ނަތަންޔާހޫ މަސައްކަތް ކުރައްވަނީ ފުރަތަމަ މަރުހަލާ އިތުރު ކުރުމަށް ހަމާސް އަށް ބާރު އެޅުމަށެވެ. އެކަން އެހެން ނުވެއްޖެނަމަ ހަނގުރާމަ އަށް އެނބުރި ދިއުަމަށެވެ.

ކަން އިން ބުނެފައިވާ ގޮތުގައި ހަމާސް އަށް ފިއްތުންތައް އިތުރު ކުރުމަށް އިސްރާއީލުން ވަނީ 'ހެލް ޕްލޭން' ގެ ނަމުގައި ޕްލޭނެއް ޑްރާފްޓް ކޮށްފައެވެ.

މި ޕްލޭންގެ ދަށުން އުތުރު ޣައްޒާގެ ރައްޔިތުން ދެކުނަށް ބަދަލުކުރުމާއި، އެހީ ފޯރުކޮށްދިނުން ހުއްޓުމާއި، ކަރަންޓު ކެނޑުމާއި، ފުރިހަމަ ހަނގުރާމައަކަށް އަނބުރާ ދިއުން ހިމެނޭ ކަމަށް ކަން އިން ބުނެފައިވެއެވެ.