7 އޮކްޓޯބަރު 2023 ގައި ހަމާސް އިން އިސްރާއީލަށް ދިން ޙަމަލާގައި ދިރިތިއްބާ ރަހީނުކޮށްގެން ގެންދިޔަ މީހުންގެ ތެރެއިން މަރުވެފައިވާ ހަތަރު ރަހީނުންގެ ހަށިގަނޑު އިސްރާއީލަށް ހަވާލު ކޮށްފިއެވެ.

މިއީ ފާއިތުވި މަހު ހަނގުރާމަ ހުއްޓާލުމަށްފަހު ޙަމާސްއިން މަރުވެފައިވާ ރަހީނުން ރައްދުކުރި ފުރަތަމަ ފަހަރެވެ.

ޙަމާސްއިން ބުނާ ގޮތުގައި މި ހަށިތަކަކީ ބީބާސް އާއިލާގެ އަންހެނަކާއި އޭނާގެ ދެ ކުދިންގެ ހަށިގަނޑެވެ. އޭގެ އިތުރުން ހިމެނެނީ 84 އަހަރުގެ މީހެއްގެ ހަށިގަނޑެވެ.

އިސްރާއީލުން ބުނާ ގޮތުގައި ފޮރެންސިކް ތަޙްލީލުތަކަށްފަހު އެމީހުންގެ އައިޑެންޓިތީ ކަށަވަރުކުރާނެއެވެ.

ބުރާސްފަތި ދުވަހު މި ހަށިތައް ރެޑްކްރޮސް (އައި.ސީ.އާރު.ސީ) އަށް ހަވާލުކުރީ ދެކުނު ޣައްޒާގެ ޚާން ޔޫނިސްގައެވެ.

ފަލަސްތީނު ޖަމާޢަތުގެ ތަރުޖަމާނެއް ބުނީ މި ހަތަރު މީހުން ވެސް ދިރި ތިއްބާ، "ޒަޔަނިސްޓު އިސްތިއުމާރީ މަތިންދާބޯޓު ތަކުން ގަސްދުގައި އެމީހުން ބަންދުކޮށްފައި ތިބި ތަންތަނަށް ބޮންއެޅި" އެވެ.

ހަމާސް އިން ނެރުނު ބަޔާނެއްގައި ބުނެފައިވަނީ އެމީހުން ދިރި ދުނިޔޭގައި ބޭއްތިބުމަށް، އެމީހުންނަށް ކުޅަދާނަވީ މިންވަރަކުން އެހީތެރިވެދީ، "އިންސާނިއްޔަތު ކަމާއެކު މުޢާމަލާތްކުރި" ނަމަވެސް، "އެމީހުންގެ [އިސްރާއީލުގެ] ސިފައިން އެމީހުންނާއި އެމީހުން ބަލަހައްޓަން ތިބި މީހުން މަރާލި" ކަމަށެވެ.

މަރުވި މީހުންގެ އާއިލާތަކާ މުޚާޠަބުކޮށް ހަމާސްގެ ހަނގުރާމަވެރިން ބުނެފައިވަނީ: "އަހަރެމެން އެދުނީ ކަލޭމެންގެ ދަރިން ކަލޭމެންނާ ހަމައަށް ދިރިތިބެގެން އައުމަށް، އެކަމަކު ކަލޭމެންގެ ސިފައިންނާއި ސަރުކާރުގެ ވެރިން އިޚްތިޔާރު ކުރީ އެމީހުން އަނބުރާ ގެނައުމުގެ ބަދަލުގައި މަރާލުމަށެ"ވެ.

މި ހަށިތައް ދޫކޮށްލީ ހަމާސް އާއި އިސްރާއީލާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުމުގެ ދަށުންނެވެ. މި އެއްބަސްވުމުގެ ދަށުން އިސްރާއީލުގެ ޖަލުތަކުގައި ތިބި އެތައް ސަތޭކަ ފަލަސްތީނު މީހުން ދޫކޮށްލެވޭނެއެވެ. މީގެ ތެރޭގައި އެއްވެސް ދަޢުވާއެއް ނުވަތަ ޝަރީޢަތެއް ނުކޮށް ބަންދުކޮށްފައި ތިބި އެތައް ބަޔަކު ހިމެނެއެވެ.

ފަލަސްތީނު ޖަމާޢަތަކުން ބުނެފައިވާ ގޮތުގައި އިސްރާއީލުން މަދުވެގެން މަރުވެފައިވާ 665 ފަލަސްތީނު މީހުންގެ ހަށިގަނޑު ހިފަހައްޓާފައިވެއެވެ. މީގެ ތެރޭގައި 1960 އަދި 1970 ގެ އަހަރުތަކުގައި މަރުވެފައިވާ އެތައް ބައެއްގެ ހަށިގަނޑު ހިމެނެއެވެ.