ޓޮރޮންޓޯގެ އެއަރޕޯޓުގައި ޖައްސަން އުޅުނު މަތިންދާބޯޓެއް އެކޮޅުކޮޅުން ޖެހި ނުރައްކާތެރި ހާދިސާ އެއް ހިނގައިފި

ޓޮރޮންޓޯގެ ޕިއަރސަން އިންޓަރނޭޝަނަލް އެއަރޕޯޓުގައި ޖައްސަން އުޅުނު މަތިންދާ ބޯޓެއް ކައްސާލައިގެން ގޮސް މަތަ ނުވެ، ބޯޓު އެކޮޅުކޮޅުން ޖެހި ނުރައްކާތެރި ހާދިސާ އެއް ހިނގައިފިއެވެ.

މި ނުރައްކާތެރި ޙާދިސާގައި ބޯޓުން ދަތުރުކުރި 80 މީހުން ސަލާމަތްވި ކަމަށް އޮފިޝަލުން ބުނެފައިވެއެވެ.

މިނިއަޕޮލިސްއިން ދަތުރުކުރި ޑެލްޓާ އެއަރ ލައިންސްގެ މި ބޯޓު ރަންވޭގައި ކައްސާލައިގެން މަތަނުވެ ދިއުމުގެ ތެރޭގައި ބޯޓުގައި ރޯވެފައިވާ މަންޒަރު ވަނީ ފެނިފައެވެ. ބޯޓު ހުއްޓުމަކަށް އައީ އެކޮޅުކޮޅުން ޖެހުމާއެކު ގައެވެ. ބޯޓު މަތަވިއިރު އޭގެ ބައެއް ބައިތައް ވަނީ ވަކިވެފައެވެ.

ހާދިސާ ގައި 18 މީހުންނަށް އަނިޔާވި ނަމަވެސް، ބޮޑަށް އަނިޔާވެފައިވަނީ މަދު އަދަދެއްގެ މީހުންނަށް ކަމަށް ރިޕޯޓުތައް ބުނެއެވެ. އަދި މި ހާދިސާ ހިނގި ސަބަބު ބަލަމުންދާ ކަމަށް ތަޙުޤީޤުކުރާ ފަރާތްތަކުން ބުނެފައިވެއެވެ.

16 އަހަރު ވެފައިވާ، ކެނެޑާގެ ބޮމްބާޑިއަރ ކުންފުނިން އުފައްދާފައިވާ ސީއާރްޖޭ-900 މަރުކާގެ މި މަތިންދާބޯޓުގައި 76 ފަސިންޖަރުންނާއި 4 ކުރޫ މެންބަރުން ތިބިއެވެ.

22 ފަސިންޖަރުންނަކީ ކެނެޑާ ރައްޔިތުން ކަމަށާއި ދެންތިބީ އެކި ގައުމުތަކަށް ނިސްބަތްވާ މީހުން ކަމަށް މިސް ފްލިންޓް ވިދާޅުވިއެވެ.

ކެނެޑާގެ ޓްރާންސްޕޯޓޭޝަން ސޭފްޓީ ބޯޑުން (ޓީއެސްބީ) ބުނެފައިވަނީ "މަޢުލޫމާތު އެއްކޮށް ހާދިސާ ތަހުގީގު ކުރުމުގެ" މަސައްކަތް ކުރަމުންދާ ކަމަށެވެ.

ތަޙުޤީޤަށްޓަކައި ދެ ރަންވޭ އެތައް ދުވަހަކަށް ބަންދުކުރެވޭނެ ކަމަށް ވެސް ބުނެފައިވެއެވެ.