އިންތިޚާބުގެ ނަތީޖާ އާ އެކު ނ. މިލަދޫ ފެނަކައިގެ 3 މުވައްޒަފުން ކުއްލި ގޮތަކަށް އޮފީހަށް ނުކުތުން މަނާ ކޮށްފި
ސަސްޕެންޑް ކުރީ ކޮން މައްސަލަ އެއް ގައި ކަމެއް ބުނެފައެއް ނުވޭ
ނ. މިލަދޫ ފެނަކަ އިންޖީނުގޭ އައު އިމާރާތް
ހޮނިހިރު ދުވަހު އޮތް ބައި-އިލެކްޝަންގެ ނަތީޖާ އާއެކު ނ. މިލަދޫ ފެނަކައިގެ އިސް 3 މުވައްޒަފަކު ކުއްލި ގޮތަކަށް ސަސްޕެންޑް ކޮށްފިއެވެ.
ސަސްޕެންޑް ކުރީ ސްޓޭޝަން މެނޭޖަރު މުހައްމަދު ހުސެއިން އާއި ޑެޕިއުޓީ މެނޭޖަރު ހާމިދު ހަސެއިން އާއި އެސިސްޓެންޓް މެނޭޖަރު މުހައްމަދު އަލީ އެވެ.
މި ތިން މުވައްޒަފުންނަށް ވަކި ވަކިން އާދިއްތަ ދުވަހު ފެނަކަ ކޯޕަރޭޝަން ލިމިޓެޑުން ފޮނުވި ސިޓީގައި ވަނީ އެއް އިބާރާތެއްކަން ފާހަގަ ކުރެވެއެވެ.
މި ނޫހަށް ފެނިފައިވާ އެ ސިޓީތަކުގެ ކޮޕީ ގައި ވަނީ އެ މުވައްޒަފުންނާ ގުޅުން ހުރި މައްސަލަ އެއް ތަހުގީގު ކުރަމުންދާތީ އެ މައްސަލައިގެ ތަހުގީގުގައި އިތުރަށް ބަލަން ޖެހޭ ކަންކަން ހުރުމުން ފެބްރުއަރީ 10 ން ފެށިގެން 14 ދުވަހުގެ މުއްދަތައް ވަގުތީ ގޮތުން އޮފީހަށް ނުކުތުން މަނާ ކޮށްފައިވާ ކަމަށެވެ.
ސިޓީގައި ބަލަނީ ކޮން މައްސަލައެއް ކަމަށް ބުނެފައެއް ނުވެއެވެ.
މައުލޫމާތު ލިބިފައިވާ މިއިން އެއްވެސް މުވައްޒަފެއްގެ އެއްވެސް މައްސަލަ އެއް އުޅޭ ކަމެއް މީގެ ކުރިން އަންގާފައެއް ނުވެއެވެ.
ހޮނިހިރު ދުވަހު އޮތް އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ބައި އިލެކްޝަންގައި ވެރިކަން ކުރާ ޕީއެންސީގެ ކެންޑިޑޭޓް އާ ވާދަ ކޮށް އެމްޑީޕީގެ ކެންޑިޑޭޓް ބޮޑު ތަފާތަކުން ވަނީ މޮޅުވެފައެވެ.
މައުލޫމާތު ލިބިފައިވާ ގޮތުގައި އިންތިޚާބުގައި ވޯޓު ލުމުގެ ކުރިން ފެނަކައިގެ ޑެޕިއުޓީ މެނޭޖިންގ ޑިރެކްޓަރ މުހައްމަދު އަބްދުލް ކަރީމް (ރުކުމާ) މިލަދޫ އަށް ޒިޔާރަތް ކުރައްވާ ފެނައިގެ މުވައްޒަފުންނާ ބައްދަލު ކޮށް ސަރުކާރުގެ ކެންޑިޑޭޓަށް ވޯޓު ދިނުން އެދޭ ކަމަށް ވަނީ ބުނެފައެވެ.
ފެނައިކައިގެ 3 މުވައްޒަފުން ސަސްޕެންޑް ކުރި މައްސަލައިގައި އެރަށުން ވާހަކަ ދެއްކި ފަރާތަކުން ބުނީ އެ ތިން މުވައްޒަފުންގެ ކުށަކީ ޕީއެންސީ އަށް ކެމްޕޭން ކުރަން އަމަލީ ގޮތުން ނޫޅުން ކަމަށާއި އެއީ އެހެން ކުށެއް އޮވެގެން އެޅި ފިޔަވަޅެއް ނޫން ކަމުގައެވެ.
