ހުޅުމާލެ ރުއްގަނޑު 1 ހިމެނޭ ސަރަހައްދުން ކަރަންޓް ނެތި އެތައް އިރެއް، ވާރޭގައި ކުޑަކުދިން ގޮވައިގެން މަގުމަތިވުމުންް މީހުން ރަތަށް

ހުޅުމާލެ ރުއްގަނޑު 1 ހިމެނޭ ސަރަހައްދުން ކަރަންޓް ކެނޑި އެސަރަހައްދުގައި ދިރިއުޅެމުން އައި ރައްޔިތުން ކުޑަކުދިން ގޮވައިގެން މަގުމަތީގައި އުޅެންޖެހިއްޖެއެވެ.

ރާއްޖެއެމްވީ އާއި ވާހަކަދެއްކެވި ފަރާތްތަކުން މަޢުލޫމާތު ދިން ގޮތުގައި، އިރުއޮއްސި 7:55ން ފެށިގެން ކަރަންޓެއް ނެތެވެ. ކަރަންޓު އަނބުރާ ލިބޭނީ ކޮން ވަގުތަކުންތޯ ސާފުކުރުމުން، އެ މަސައްކަތުގައި ތިއްބެވި ފަރާތްތަކުން މަޢުލޫމާތު ދެއްވާފައިވަނީ ބައިގަޑިއިރު ތެރޭގައި ކަރަންޓު އަނބުރާ ލިބޭނެ ކަމަށެވެ. ނަމަވެސް، މި ވަގުތާ ހަމައަށް އައިއިރުވެސް މައްސަލަ ޙައްލުވެފައި ނުވާ ކަމަށް ރާއްޖެއެމްވީ އާއި ވާހަކަ ދެއްކި މީހަކު ބުނެފައިވެއެވެ. ކަރަންޓު ނެތުމުގެ ސަބަބުން ކުޑަކުދިން ގޮވައިގެން ވާރޭގައި މަގުމައްޗަށް ނުކުންނަށް މަޖުބޫރުވީ ކަމަށާއި، ނިދި އައިސްގެން ކުދިން ރޮމުންދާކަމަށް ރާއްޖެއެމްވީއާއި ވާހަކަ ދެއްކި އެ ސަރަހައްދުގައި ދިރިއުޅޭ އާއިލާގެ މެމްބަރު ބުނެފައިވެއެވެ. ކަރަންޓު ނެތުމުގެ ސަބަބުން ގޭތެރޭގައި މާޙައުލު ހޫނުވެފައިވާތީ އާއިލާތަކަށް ތިބެވޭނެ ގޮތެއް ނެތްކަން ވެސް އޭނާ ފާހަގަކުރިއެވެ.

Advertisement

މާލެއަށް މޫސުން ގޯސްވެ ވަނީ ޔެލޯ އެލާޓްވެސް ވަނީ ނެރެފައެވެ. ފަތިހު 4 ޖަހަންދެން އެލަރޓް ނެރެފައިވާއިރު، މޫސުމާއި ބެހޭ ގައުމީ އިދާރާއިން ބުނީ ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށެވެ.

ރުއްގަނޑު 1 ހިމެނޭ ސަރަހައްދުން ކަރަންޓް ކެނޑިފައިވާ މައްސަލައާއި ގުޅިގެން ސްޓެލްކޯއިން ބުނީ ރުއްގަނޑު 1 ހިމެނޭ ސަރަހައްދުގައި އަޅާފައިވާ ކަރަންޓުގެ ވިއުގައިގެ ކޭބަލަކަށް ގެއްލުންވެ ހިރުނދުމަގާއި، އަހިގަސްމަގު ހިމެނޭ ސަރަހައްދުގެ ބަޔަކުން ވަނީ ކަރަންޓުގެ ހިދުމަތް މެދުކެނޑިފައިވާ ކަމަށެވެ. އަދި އައު ކޭބަލެއް އަޅައި އަލުން އެސަރަހައްދަށް ކަރަންޓު ދިނުމުގެ މަސައްކަތް ކުރަމުން އަންނަ ކަމަށެވެ. ސްޓެލްކޯއިން މިފަދައިން ބުނެފައިވަނީ އެ ސަރަހައްދުން ކަރަންޓް ކެނޑުނުތާ ގަޑިއިރެއްވާން ކައިރިވެފައިވަނިކޮށް 8:47 ގައެވެ.

އެފަހުން 10:13 ސްޓެލްކޯއިން ބުނީ ހުޅުމާލޭގެ ފުރަތަމަ ފިޔަވަހީގެ ރުއްގަނޑު 1 ހިމެނޭ ސަރަހައްދުގައި އަޅާފައިވާ ކަރަންޓުގެ ވިއުގައިގެ ކޭބަލަކަށް ގެއްލުންވެ ކަރަންޓުގެ ހިދުމަތް މެދުކެނޑުމާއި ގުޅިގެން އެ ސަރަހައްދަށް އަލުން ކަރަންޓު ދިނުމަށްޓަކައި 130 މީޓަރުގެ އައު ކޭބަލެއް އެޅުމުގެ މަސައްކަތްތައް ކުރަމުން އަންނަ ކަމަށެވެ.

އަދި ފަހުން 11:27 ހާއިރު ސްޓެލްކޯއިން ބުނެފައިވަނީ ހުޅުމާލޭގެ ރުއްގަނޑު 1 ހިމެނޭ ސަރަހައްދުގައި އަޅާފައިވާ ކަރަންޓުގެ ވިއުގައިގެ ކޭބަލަކަށް ގެއްލުންވެ ކަރަންޓުގެ ހިދުމަތް މެދުކެނޑުމާއި ގުޅިގެން އެ ސަރަހައްދަށް އަލުން ކަރަންޓު ދިނުމަށްޓަކައި ވަގުތީ ކޭބަލެއް އެޅުމުގެ މަސައްކަތް ކުރަމުން އަންނަ ކަމަށެވެ. އަދި ބައެއް ފޮޓޯތައް ވަނީ އެކްސްގައި ހިއްސާކޮށްފައެވެ. ނަމަވެސް މައްސަލަ ހައްލުކުރެވޭނެ އިރެއް ސްޓެލްކޯއިން ބުނެފައިނުވެއެވެ.