ވަގު ފޯރމްގެ މައްސަލަ - "މިއީ ޑިމޮކްރެޓިކް ނިޒާމަށާއި ޕާޓީ ނިޒާމަށް ދޭ އަނިޔާއެއް"

ވަގުފޯރމް ފުރައިގެން ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެމްބަރުން ވެއްދުމަކީ މިއީ ޑިމޮކްރެޓިކް ނިޒާމަށާއި ޕާޓީ ނިޒާމަށް ދޭ އަނިޔާއެއް ކަމަށް ދަ ޑިމޮކްރެޓްސްގެ ވަގުތީ ރައީސް އަދި މަޖިލީހުގެ ކުރީގެ މެމްބަރު ހުސެއިން ފިރުޝާން ވިދާޅުވެއްޖެއެވެ.

ވަގުފޯރމް ފުރައިގެން ޕީއެންސީ އަށް ދަ ޑިމޮކްރެޓްސްގެ މެމްބަރުން ވައްދާފައިވާ މައްސަލައިގައި އާދިއްތަ ދުވަހު ދަ ޑިމޮކްރެޓްސް އިން އިލެކްޝަންސް ކޮމިޝަނަށާއި ފުލުހުންނަށް މައްސަލަ ވަނީ ހުށަހަޅާފައެވެ.

ފުލުހަށް މައްސަލަ ހުށަހެޅުމަށް ފަހު މީޑިއާތަކަށް މައުލޫމާތުދެއްވަމުން ފިރުޝާން ވިދާޅުވީ އެ ޕާޓީގެ 700 އެއްހާ މެމްބަރުން އުސޫލާއި ޚިލާފަށް ޕީއެންސީ އަށް ވައްދާފައިވާ މައްސަލަ ފާހަގަކުރެވިފައިވާ ކަމަށެވެ. އެހެންކަމުން އެކަން ޖިނާއީ މައްސަލަ އެއްގެ ގޮތުގައި ބަލާދިނުމަށް ފުލުހުންގެ ކިބައިން އެދިފައިވާނެ ކަމަށާއި މި މައްސަލައިގައި ފުލުހުންގެ އެއްބާރުލުން ދޭނެ ކަމަށް ފުލުހުން ފާހަގަކޮށްފައިވާ ކަމަށް އޭނާ ވިދާޅުވިއެވެ. ފިރުޝާން ވިދާޅުވީ އީސީން ފޯރުކޮށްދޭ ޑޭޓާ އަށް ބަލާލުމުން ނިމިދިޔަ އޮގަސްޓުން ފެށިގެން އެއްފަހަރާ ގިނަ ބަޔަކު ޕާޓީން ކެނޑި ޕީއެންސީ އަށް ވަންނަ މައްސަލަ ފާހަގަވި ކަމަށެވެ. އަދި ޕާޓީން ބެލި ބެލުމުން އެކަން ހިނގަނީ މެމްބަރުންނަށް ނޭނގިކަން ހާމަވެފައިވާ ކަމަށާއި އެއީ ވަރަށް ބޮޑު ކަންބޮޑުވުމެއް ކަމަށް ފިރުޝާން ވަނީ ވިދާޅުވެފައެވެ.

މި މައްސަލަ އަކީ ވަރަށް ސީރިއަަސް މައްސަލަ އެއް ކަމަށާއި މިއީ ޖިނާއީ މައްސަލަ އެއްގެ ގޮތުގައި ބަލާ ވީ އެންމެ އަވަހަކަށް މި ޖަރީމާ ހިންގި މީހުންނަށް ފިޔަވަޅު އަޅަން ޖެހޭ ކަމަށް އޭނާ ވަނީ ވިދާޅުވެފައެވެ. ފިރުޝާން ވިދާޅުވީ ޕީއެންސީ އަށް މީހުން އިތުރުކުރަމުން ދަނީ ދައުލަތުގެ ބަޖެޓުން ސިޔާސީ ޕާޓީތަކަށް ދޭ ފައިސާ އޮޅުވާލައިގެން ހޯދުމުގެ ބޭނުމުގައި ކަމަށް ޝައްކު ކުރެވޭ ކަމަށެވެ. އަދި ޕީއެންސީ އަށް މެމްބަރުން ވައްދަމުންދަނީ ޑީއެންއާރުގެ ޑޭޓާ ބޭނުންކޮށްގެން ކަމަށް އޭނާ ވަނީ ތުހުމަތުކުރައްވާފައެވެ.

މީގެ އިތުރުން ޑިމޮކްރެޓްސް ޤާނޫނީ ވަކީލް ވިދާޅުވީ މި މައްސަލަ ޖިނާއީ މައްސަލައެއްގެ ގޮތުގައި ހުށަހަޅަން ނިންމީ ފިންގަރޕްރިންޓް ވެރިފައިކޮށް، މި މައްސަލަ ހިނގި ގޮތް ތަހުގީގުން ހޯދޭނެ ކަމަށް ޤަބޫލުކުރެވޭތީ ކަމަށެވެ. އަދި ސިޔާސީ ޕާޓީތަކުގެ ޤާނޫނާއި ޚިލާފަށް މެމްބަރުން ވައްދާފައިވާ މައްސަލައިގެ އަސްލު ހޯދުމަށް ބޭނުންވާތީ މައްސަލަ ފުލުހަށް ހުށަހެޅުމަށް ނިންމީ ކަމަށް އޭނާ ވިދާޅުވިއެވެ. ލިޔެކިޔުންތައް ފޯރޖްކުރުމަކީ ޤާނޫނުލްއުޤޫބާތުގެ ދަށުން ކުށެއް ކަމަށާއި އެ މައްސަލަ ބަލާ ސީރިއަސް ފިޔަވަޅުތަކެއް އަޅަން ޖެހޭ ކަމަށް އޭނާ ވިދާޅުވިއެވެ.

އޭނާ ވިދާޅުވީ މިއަދު ފުލުހަށް ޑިމޮކްރެޓްސްއިން މައްސަލަ ހުށަހެޅީ އެ ޕާޓީގެ މެންބަރުންގެ އިތުރުން ވެސް ޕީއެންސީއަށް ވަގަށް ވައްދާފައިވާ މީހުންގެ މައްސަލަ ސީރިއަސް މައްސަލައެއްގައި ގޮތުގައި ބަލައި ޖިނާއީ ތަހުގީގެއް ހިންގައި ދިނުމަށް އެދި ކަމަށެވެ.