ދިވެހި ސަރުކާރުން އިސްރާއީލުގެ ޕާސްޕޯޓު މަނާކުރަން ނުކެރި އޮއްވާ ޣައްޒާ ހަނގުރާމަ ހުއްޓާލަން އެއްބަސްވެއްޖެއެވެ.

އިސްރާއީލާއި ހަމާސްއިން އާދީއްތަ ދުވަހުން ފެށިގެން ހަނގުރާމަ ހުއްޓާލުމަށް އެއްބަސްވެފައިވާ ކަމަށް ޤަތަރުގެ ބޮޑުވަޒީރު ބުދަ ދުވަހު ވަނީ އިއުލާނު ކުރައްވާފައެވެ.

މި އެއްބަސްވުމުން ޣައްޒާގައި ހިނގަމުންދާ 15 މަސްދުވަހުގެ ނުރައްކާތެރި ހަނގުރާމަ ނިމުމަކަށް އަންނާނެއެވެ.

ޤަތަރުގެ ބޮޑުވަޒީރު ޝެއިޚް މުޙައްމަދު ބިން އަބްދުއްރަޙްމާން ބިން ޖާސިމް އާލް ޘާނީ ވިދާޅުވި ގޮތުގައި މި އެއްބަސްވުމުގެ ސަބަބުން އިސްރާއީލުގެ ރަހީނުން ދޫކޮށްލެވި، ޣައްޒާއަށް އިންސާނީ އެހީ ފޯރުކޮށްދިނުން އިތުރުވެގެންދާނެއެވެ.

ހަނގުރާމަ ހުއްޓާލުމުގެ އެއްބަސްވުމަކަށް އައިކަން އިއުލާނު ކުރިއިރު ބުދަ ދުވަހު، އިސްރާއީލުގެ ބާރުތަކުން ޣައްޒާއަށް ދެމުންދިޔަ ހަމަލާތައް އިތުރުކޮށް، ވަގުތީ ހިޔާވެހީގެ ގޮތުގައި ބޭނުން ކުރާ ސްކޫލަކަށާއި އަދި ޣައްޒާގެ އެކި ސަރަޙައްދުތަކުގައި ހުރި ގިނަ ގެތަކަކަށް ބޮންއެޅިއެވެ.  

ފާއިތުވި 24 ގަޑިއިރުގެ ތެރޭގައި މަދުވެގެން 62 މީހުން ޝަހީދުވެފައިވެއެވެ.

7 އޮކްޓޯބަރު 2023 އިން ފެށިގެން އިސްރާއީލުން ޣައްޒާގައި ކުރަމުންދާ ހަނގުރާމައިގައި މަދުވެގެން 46،707 ފަލަސްތީނު މީހުން ޝަހީދުވެ، 110،265 މީހުން ޒަޚަމްވެފައިވެއެވެ.