އިސްރާއީލުން ޣައްޒާ އަށް ދޭ ހަމަލާތައް ވަރުގަދަކޮށްފި

އިސްރާއީލުގެ ބާރުތަކުން ޣައްޒާއަށް ދެމުންދާ ހަމަލާތައް އިތުރުކޮށް ވަރުގަދަކޮށްފިއެވެ.

ބުދަ ދުވަހު އިސްރާއީލުން ވަނީ ވަގުތީ ހިޔާވެއްސެއްގެ ގޮތުގައި ބޭނުން ކުރާ ސްކޫލް އިމާރާތަކަށާއި ޣައްޒާގެ އެކި ސަރަހައްދުތަކުގައި ހުރި ގިނަ ގެތަކަކަށް ބޮން އަޅާފައެވެ.

ބުދަ ދުވަހުގެ ފަތިހުން ފެށިގެން މަދުވެގެން 24 މީހުން ވަނީ ޝަހީދުކޮށްލާފައެވެ.

ޣައްޒާ ގެ ހަނގުރާމަ ހުއްޓާލުމުގެ އެއްބަސްވުމަކާ ގާތްވެފައިވާ ކަމަށް މަޝްވަރާތަކުގައި މެދުވެރިންގެ ދައުރު އަދާކުރާ ފަރާތްތަކުން ބުނި ނަމަވެސް ހަމަލާތައް ދަނީ ކުރިއަށެވެ.

މި މަހުގެ 20 ގައި ދައުރު ނިންމަވާލައްވާ އެމެރިކާގެ ރައީސް ޖޯ ބައިޑަން އަދި މިސްރުގެ ރައީސް އަބްދުލް ފައްތާހް އައް ސީސީ ވަނީ އިސްރާއީލާއި ހަމާސް އަށް އެއްބަސްވުމަކަށް އަވަހަށް އައުމަށް ގޮވާލައްވާފައެވެ. 

އެތައް ހާސް މީހުން އިސްރާއީލުގެ ތެލްއަވީވްގެ މަގުތަކަށް އެއްވެ، ޣައްޒާގައި ހިފަހައްޓާފައިވާ އިސްރާއީލު މީހުން ދޫކޮށްލުމަށް އެއްބަސްވުމަކަށް އައުމަށް އިސްރާއީލު ސަރުކާރަށް ވަނީ ގޮވާލާފައެވެ. އަނެއްކޮޅުން، އެތައް ސަތޭކަ ހައްދުފަހަނަ އެޅި ޔަހޫދީން ވަނީ ޖެރޫސަލަމްގައި މާރޗްކޮށް، ހަނގުރާމަ ކުރިއަށް ގެންދިއުމަށް ގޮވާލާފައެވެ. 

އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ޢަމަލުތަކުގެ ސަބަބުން، 7 އޮކްޓޯބަރު 2023 އިން ފެށިގެން މަދުވެގެން 46،645 ފަލަސްޠީނު މީހުން ވަނީ ޝަހީދުވެފައެވެ. އަދި 110،012 މީހުން ވަނީ ޒަޚަމްވެފައެވެ.