ވޯލްޑް ކަޕަށް ފަހު ފްރާންސް ޓީމު ދޫކޮށްލާނެކަން ޑެޝޯމްޕްސް ހާމަކޮށްފި

ކެނެޑާ، އެމެރިކާ އަދި މެކްސިކޯގައި އަންނަ އަހަރު އޮންނަ ފީފާ ވޯލްޑް ކަޕް ފުޓުބޯޅަ މުބާރާތަށްފަހު، ފްރާންސް ޤައުމީ ޓީމު ދޫކޮށްލަން ނިންމާފައިވާކަން އެ ޓީމުގެ ކޯޗު ޑިޑިއޭ ޑެޝޯމްޕްސް ހާމަކޮށްފި އެވެ.

ފްރާންސްގެ ޓީއެފް ވަން އަށް ދިން އިންޓަވިޔުއެއްގައި ޑެޝޯމްޕްސް ބުނީ، 2026 ވަނަ އަހަރަކީ އޭނާ ފްރާންސްގެ ކޯޗުކަމުން ދުރަށް ޖެހޭނެ އަހަރު ކަމަށެވެ. 2012 ވަނަ އަހަރުން ފެށިގެން ފްރާންސް އަށް އިރުޝާދު ދެމުން އަންނަކަން ފާހަގަ ކުރަމުން ޑެޝޯމްޕްސް ބުނީ، 2026 ވަނަ އަހަރުގެ ވޯލްޑް ކަޕާ ހަމައަށް މަގާމުގައި ހުންނާނެ ކަމަށާއި، އޭގެ ފަހުން ކޯޗުކަމުން ދުރަށް ދާން ނިންމާފައިވާ ކަމަށެވެ.

ފްރާންސްގެ ކޯޗުކަމުން ދުރަށް ދާން ނިންމީ އެކަމާ މެދު ވަރަށް ބޮޑަަށް ވިސްނުމަށްފަހު ކަމަށާއި، އެ ނިންމުމަކީ އޭނާގެ ވިސްނުމަށް އައި އެންމެ ރަނގަޅު ނިންމުން ކަމަށް ވެސް ޑެޝޯމްޕްސް ވަނީ ބުނެފަ އެވެ. މިހާތަނަށް އައިރު، އެއް އަމާޒެއްގައި، އެއް ޢަޒުމެއްގައި ފްރާންސް ޤައުމީ ޓީމާ އެކު ގިނަ މަސައްކަތްތަކެއް ކޮށްފައިވާނެ ކަމަށާއި، އެންމެ އިސްކަމެއް ދެނީ ފްރާންސް ޤައުމީ ޓީމު އެންމެ މަތީ ފެންވަރުގައި އަބަދު ވެސް ބާއްވަން ކަމަށް ޑެޝޯމްޕްސް ބުންޏެވެ.

ފްރާންސް ޤައުމީ ޓީމުގެ ކޯޗުކަމާ ޑެޝޯމްޕްސް ހަވާލުވީ 2012 ވަނަ އަހަރު އެވެ. އޭގެ ފަހުން މިވީ 11 އަހަރުގެ ތެރޭގައި، ޑެޝޯމްޕްސް ވަނީ ފްރާންސް އާއެކު ކާމިޔާބީތަކެއް ހޯދައިފަ އެވެ. އޭނާގެ އިރުޝާދުގެ ދަށުން ފްރާންސް އިން ވަނީ 165 މެޗު ކުޅެފަ އެވެ. އޭގެ ތެރެއިން ފްރާންސް ވަނީ 105 މެޗުން މޮޅުވެފަ އެވެ. 26 މެޗުން ބަލިވެފައިވާއިރު، 34 މެޗުން ވަނީ އެއްވަރުވެފަ އެވެ.

އޭނާގެ އިރުޝާދުގެ ދަށުން ފްރާންސް އިން ވަނީ ދެ ތައްޓެއް ވެސް ކާމިޔާބު ކޮށްފަ އެވެ. އެއީ 2018 ވަނަ އަހަރު ރަޝިޔާގައި ކުރިއަށް ދިޔަ ވޯލްޑް ކަޕްގެ އިތުރުން، 21-2020 ވަނަ އަހަރުގެ ޔުއެފާ ނޭޝަންސް ލީގެވެ. 2016 ވަނަ އަހަރު އޮތް ޔޫރޯ މުބާރާަތުގެ ފައިނަލްގައި ޕޯޗުގަލް އަތުން ބަލިވެފައިވާއިރު، އެންމެ ފަހުން 2022 ވަނަ އަހަރު އޮތް ވޯލްޑް ކަޕްގެ ފައިނަލްގައި ބަލިވެފައި ވަނީ އާޖެންޓީނާ އަތުންނެވެ.

އެ މުބާރާތަށްފަހު ފްރާންސްގެ ކޯޗުކަމުން ޑެޝޯމްޕްސް ވަކި ކުރާނެ ކަމަށް ބެލެވިފައި އޮތް ނަމަވެސް، ފްރާންސް ފުޓުބޯޅަ ފެޑެރޭޝަނުން ވަނީ އެ ޓީމުގެ ކޯޗުކަމުގައި ޑެޝޯމްޕްސް ބަހައްޓަން ނިންމައިފަ އެވެ.