ފަލަސްތީނަށް ތާއީދުކޮށް އިސްތަންބޫލްގެ މަގުމައްޗަށް އެތައް ހާސް މީހުން އެއްވެއްޖެ

ފަލަސްޠީނު ރައްޔިތުންނާ ދެކޮޅަށް އިސްރާއީލުން ހިންގަމުންދާ ޖަރީމާތަކާ ދެކޮޅަށް އަޑުއުފުލައި، ފަލަސްތީނަށް ތާއީދުކޮށް ބުދަ ދުވަހު އިސްތަންބޫލުގެ މަގުތަކަށް އެތައް ހާސް މީހުން ޖަމާވެ އަޑު އުފުލައިފިއެވެ.

ތުރުކީގެ އަނަދޫލޫ ނިއުސް އޭޖެންސީން ބުނެފައިވާ ގޮތުގައި، މި އެއްވުމުގެ ބައިވެރިން ވަނީ ފަތިސް ނަމާދަށްފަހު، ތުރުކީގެ ދިދަ އާއި ފަލަސްޠީނުގެ ދިދަ ހިފައިގެން މަގުމަތީގައި ޝުއޫރު ފާޅު ކުރަމުން ހިނގާލުމެއް ބާއްވާފައެވެ.

މި ހަރަކާތް އިންތިޒާމުކޮށްފައިވަނީ 308 އެންޖީއޯ އެއް ހިމެނޭ އިއްތިހާދެއްކަމަށްވާ "ނެޝަނަލް ވިލް ޕްލެޓްފޯމް" އިންނެވެ.

މުޒާހަރާގައި ބައިވެރިވި ފަރާތްތަކުން ފަލަސްޠީނުގައި އިސްރާއީލުން ހިންގަމުންދާ މަރުގެ އަނިޔާވެރިކަން ނިމުމަކަށް އައުމަށް އެދި ދުޢާކުރުމަށްފަހު، ހިނގަމުންދާ އަނިޔާވެރިކަމާ ދެކޮޅަށް ބައިނަލްއަޤްވާމީ ފިޔަވަޅު އެޅުމަށް ވަނީ ގޮވާލާފައެވެ.

މުޒާހަރާގައި ބައިވެރިވި ފަރާތްތަކުން "މީހުން މަރާ އިސްރާއީލު ޖަވާބުދާރީ ކުރެވޭނެ" ފަދަ އިބާރާތްތައް ގޮވަމުން، ތުރުކީ އަދި އިނގިރޭސި ބަހުން "ޣައްޒާގައި ނަސްލު ފޮހެލުން ހުއްޓާލާ" މިހެން ލިޔެފައިވާ ބޮޑު ބެނަރެއް އުފުލާފައިވެއެވެ. އަދި ތުރުކީގެ ދިދަ އާއި ފަލަސްޠީނުގެ ދިދަވެސް އުފުލާފައިވެއެވެ.

އިސްރާއީލުން ގެންދަނީ 20234 އޮކްޓޯބަރު 7 އިން ފެށިގެން ވަރަށް އަނިޔާވެރި ހަނގުރާމަ އެއް ޣައްޒާ ގައި ހިންގަމުންނެވެ. މި ހަނގުރާމައިގައި މިހާތަނަށް މަދުވެގެން 45,541 ފަލަސްޠީނު މީހުން ޝަހީދު ކޮށްލައި، 108,338 ށް ވުރެ ގިނަ މީހުން ޒަޚަމް ކޮށްލާފައިވެއެވެ.