ޔަމަނުގެ ހޫތީން އިސްރާއީލަށް މިސައިލް ހަމަލާ އެއް ދީފި
ހޫތީން ބުނެފައިވަނީ އެމެރިކާގެ ޔޫއެސްއެސް ހެރީ އެސް. ޓްރޫމަން އުޅަނދަށް ވެސް ހަމަލާދީފައިވާ ކަމަށެވެ.
ހޫތީ އިން އާންމުކުރި މަންޒަރެއްގައި ދައްކުވައިދެނީ އިސްރާއީލަށް އަމާޒުކޮށް މިސައިލެއް ފޮނުވާލާ މަންޒަރު ކަމަށް ބުނެފައިވެއެވެ
ޔަމަނުން ފޮނުވާލި މިސައިލަކަށް ހުރަސް އެޅި ކަމަށް އިސްރާއީލުގެ ސިފައިން ހާމަ ކުރިތާ ގަޑިއިރުތަކެއްގެ ފަހުން، ޔަމަނުގެ ހޫތީން އިސްރާއީލަށް ދެ މިސައިލް ހަމަލާ ދިން ކަމަށް އަންގާރަ ދުވަހު ބުނެފިއެވެ.
"ފުރަތަމަ (ހަމަލާ) އަމާޒުކުރެވުނީ ތެލްއަވީވްގެ ބެން ގުރިއަން އެއަރޕޯޓަށް" އަދި ދެވަނަ މިސައިލް ފޮނުވާލީ ޖެރޫސަލަމްގެ ދެކުނުގައިވާ ކަރަންޓު އުފައްދާ މަރުކަޒަކަށް ކަމަށް ހޫތީންގެ ސިފައިންގެ ބަޔާނެއްގައި ބުނެފައިވެއެވެ.
ހޫތީން އިތުރަށް ބުނެފައިވަނީ އެމެރިކާގެ ޔޫއެސްއެސް ހެރީ އެސް. ޓްރޫމަން އުޅަނދަށް ހަމަލާދީފައިވާ ކަމަށެވެ.
މިކަމާ ގުޅޭގޮތުން އެމެރިކާގެ ސިފައިންގެ ފަރާތުން އަދި އެއްވެސް އެއްޗެއް ބުނެފައެއް ނުވެއެވެ.
ހޯމަ ދުވަހު އިސްރާއީލުގެ ސިފައިން ބުނެފައިވަނީ ޔަމަނުން ދޫކޮށްލި މިސައިލެއް އިސްރާއީލުގެ ސަރަޙައްދަށް ވަނުމުގެ ކުރިން ވައިގެތެރޭގައި ހަލާކުކޮށްލި ކަމަށެވެ.
ޔަމަނުގެ ގިނަ ސަރަޙައްދުތަކެއް ކޮންޓްރޯލްކުރާ ހޫތީން، އިސްރާއީލަށާއި ރަތް ކަނޑާއި އަދަން ކަނޑުގައި ދަތުރުކުރާ އުޅަނދުފަހަރަށް މިސައިލާއި ޑްރޯން ހަމަލާތައް ދެމުން ގެންދަނީ ޣައްޒާގައި އިސްރާއީލުން ހިންގަމުންދާ ހަނގުރާމައިގައި ފަލަސްޠީނުގެ ރައްޔިތުންނާ އެއްބައިވުމުގެ ގޮތުން ކަމަށް ބުނެފައިވެއެވެ.
ފާއިތުވި ހަފްތާގައި، އިސްރާއީލުގެ ފައިޓަރ ޖެޓްތަކުން ޔަމަނަށް ދިން ހަމަލާއެއްގައި ސަނާ ބައިނަލްއަޤްވާމީ ވައިގެ ބަނދަރުގައި 4 މީހުން މަރުވެފައިވެއެވެ.
