ޣައްޒާ ސިޓީގެ މެދުތެރޭގައި ހުންނަ އަލް-ވަފާ ހޮސްޕިޓަލަށް އިސްރާއީލުން އާދިއްތަ ދުވަހު ދިން ވައިގެ ހަމަލާއެއްގައި މަދުވެގެން 7 ފަލަސްތީނު މީހުން ޝަހީދުވެއްޖެއެވެ.

ހަމަލާގައި އެތައް ބަޔަކު ޒަޚަމްވެފައިވާ ކަމަށާއި އޭގެ ތެރޭގައި ނުރައްކާތެރި ހާލަތުގައި ބައެއް މީހުން ތިބި ކަމަށް ވެސް މީޑިއާ ރިޕޯޓުތައް ބުނެއެވެ.

އާދިއްތަ ދުވަހުގެ ހެނދުނުގެ ވަގުތުތަކުން ފެށިގެން ޣައްޒާގެ އެކި ސަރަޙައްދުތަކަށް އިސްރާއީލުން ދިން ވައިގެ ހަމަލާތަކުގައި 13 މީހުން ޝަހީދުވެފައިވާ ކަމަށް ވަނީ ރިޕޯޓުކުރެވިފައެވެ.

އަލް-ވަފާ ހޮސްޕިޓަލުގައި ޝަހީދުވި 7 މީހުންނަކީ ކަނޑައެޅިގެން ބަލިމީހުން ކަމަށް ޣައްޒާގެ ސިއްހަތާ ބެހޭ އޮފިޝަލުން ވަނީ ހާމަ ކޮށްފައެވެ. މި ހޮސްޕިޓަލަކީ އުމުރުން ދުވަސް ވީ މީހުންނަށް ފަރުވާ ދޭ ހޮސްޕިޓަލެކެވެ. އިސްރާއީލުން ޣައްޒާ ގައި ހަނގުރާމަ ފެށި ފަހުން، އެ ހޮސްޕިޓަލުން ވަނީ ދިގު މުއްދަތުގެ ބަލިތަކަށް ފަރުވާ ހޯދާ މީހުންނަށް ފަރުވާ ދިނުމުގެ އިތުރުން، ރީހެބިލިޓޭޝަން ސެންޓަރެއްގެ ގޮތުގައި ޚިދުމަތް ދޭން ފަށާފައެވެ.

އިސްރާއީލުން ގެންދަނީ ޣައްޒާގެ ސިއްހީ ނިޒާމު ހަލާކު ކޮށްލުމަށް ހޮސްޕިޓަލް ތަކަށާއި ސިއްހީ އޮފިޝަލުންނަށް އަމާޒު ކޮށް އެތައް ހަމަލާ އެއް ދެމުންނެވެ. ޣައްޒާގެ ޞިއްޙަތާބެހޭ މިނިސްޓްރީން ބުނާ ގޮތުގައި އިސްރާއީލުގެ ހަމަލާތައް އަމާޒުވުމުގެ ސަބަބުން ވޭތުވެދިޔަ 14 މަސްދުވަހުގެ ތެރޭގައި މަދުވެގެން 33 ހޮސްޕިޓަލު ވަނީ ޚިދުމަތް ދިނުން ހުއްޓާލަން ޖެހިފައެވެ.

ހޮސްޕިޓަލުތަކަށް ހަމަލާ ދިނުމަށް ފަހު އިސްރާއީލުގެ ސިފައިންގެ ފަރާތުން ދައްކާ ބަހަނާ އަކީ އެތަންތަނަކީ ޓެރަރިސްޓުންގެ ހިމާޔަތުގައި މަސައްކަތް ކުރާ ތަންތަން ކަމަށާއި އެ ތަންތަނަށް ދޭ ހަމަލާ އަކީ "ޓެރަރިސްޓުންނަށް" އަމާޒުކޮށްގެން ދޭ ހަމަލާ ކަމަށެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ޣައްޒާއަށް އިސްރާއީލުން ދެމުންދާ އަނިޔާވެރި ހަމަލާތަކުގެ ސަބަބުން މިހާތަނަށް މަދުވެގެން 45,484 ފަލަސްތީނު މީހުން ވަނީ ޝަހީދުވެފައެވެ. އަދި 108,090 އަށްވުރެ ގިނަ މީހުންނަ ވަނީ ޒަޚަމްވެފައެވެ.