އިސްރާއީލުން ޣައްޒާގެ ކަމާލް އަދުވާން ހޮސްޕިޓަލް ރޯކޮށްލުން އޯއައިސީ އިން ކުށްވެރިކޮށްފި
އޯއައިސީ އިން ބައިނަލްއަޤްވާމީ މުޖުތަމަޢުއަށް ގޮވާލާފައިވަނީ އަވަސް ގޮތެއްގައި އެ ފަރާތްތަކުގެ ޒިންމާ އަދާކުރުމަށާއި، އިސްރާއީލުގެ ހަނގުރާމައިގެ އަނިޔާވެރިކަން ވަގުތުން ހުއްޓުވުމަށެވެ.
2024 ވަނަ އަހަރުގެ ޑިސެމްބަރ 25 ވަނަ ދުވަހު، ޣައްޒާގެ ބައިތު ލަހިޔާގައި ހުންނަ ކަމާލް އަދްވާން ހޮސްޕިޓަލްގެ ގޯތިތެރެއާއި އެ ސަރަހައްދުގެ އިމާރާތްތަކަށް އިސްރާއީލުން ދިން ހަމަލާގެ މަންޒަރެއް (ފައިލް)
އިސްރާއީލުން ޣައްޒާގެ ކަމާލް އަދުވާން ހޮސްޕިޓަލް ރޯކޮށްލުން އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ހަރުކަށި އިބާރާތުން ކުށްވެރިކޮށްފައިވެއެވެ.
އޯއައިސީ އިން މި ހަމަލާ ކުށްވެރިކޮށް ނެރެފައިވާ ބަޔާނުގައި ބުފައިވަނީ މިއީ އިސްރާއީލުން ފަލަސްތީނު ރައްޔިތުންނާ ދެކޮޅަށް ހިންގަމުންދާ ހަނގުރާމައިގެ ޖަރީމާތަކާއި ނަސްލު ފޮހެލުމުގެ ޢަމަލުތަކުގެ ތެރެއިން އަމެލެއް ކަމަށެވެ.
އޯއައިސީ އިން ހުކުރު ދުވަހު ނެރުނު ބަޔާނުގައި އިތުރަށް ބުނެފައިވަނީ، ޞިއްޙީ ދާއިރާއަށް ޓާގެޓް ކޮށްގެން އިސްރާއީލުން ދެމުންގެންދާ ހަމަލާތަކާއި، ޚާއްސަ ކޮށް ހޮސްޕިޓަލްތައް ހިޞާރުކޮށް، އެތަންތަނަށް ވަދެގަތުމާއި، ސިއްހީ މުވައްޒަފުންނާއި، ބަލިމީހުންނާއި، ޒަޚަމްވެފައިވާ މީހުންނަށް ހަމަލާދީ، ހައްޔަރުކުރުމަކީ ބައިނަލްއަޤްވާމީ އިންސާނިއްޔަތުގެ ޤާނޫނު ތަކާއި، ކަމާބެހޭ އދ. ގެ މުޢާހަދާތަކާއި ޤަރާރުތަކާ ހިލާފު ކަންކަން ކަމަށެވެ.
އޯއައިސީ އިން ބައިނަލްއަޤްވާމީ މުޖުތަމަޢުއަށް ގޮވާލާފައިވަނީ އަވަސް ގޮތެއްގައި އެ ފަރާތްތަކުގެ ޒިންމާ އަދާކުރުމަށާއި، އިސްރާއީލުގެ ހަނގުރާމައިގެ އަނިޔާވެރިކަން ވަގުތުން ހުއްޓުވައި، ހަނގުރާމަ އަށް ދާއިމީ ނިމުމެއް ގެނައުމަށާއި، މެޑިކަލް ފެސިލިޓީތަކާއި، ޞިއްޙީ ދާއިރާގެ މަސައްކަތްތެރިންނާއި، ބަލިމީހުންނާއި ޒަޚަމްވެފައިވާ މީހުން ހިމާޔަތްކުރުން ކަށަވަރުކުރުމަށެވެ.
އަދި އޯއައިސީ އިން އިތުރަށް ބާރުއަޅާފައިވަނީ ޣައްޒާގެ ހުރިހާ ސަރަޙައްދެއްގައި އެކަށީގެންވާ އިންސާނީ އެހީ އާއި މެޑިކަލް އެހީ ފޯރުކޮށްދިނުމަށާއި، ހުރަހެއްނެތި ޞިއްޙީ ޚިދުމަތްތައް ފޯރުކޮށްދިނުމުގެ ކަށަވަރުކަން ދިނުމުގެ މުހިންމުކަމަށެވެ.
ޖޯޑަންގެ ނޫސް އެޖެންސީ ޕެޓްރާ އިން ރިޕޯޓުކޮށްފައިވާ ގޮތުގައި، ޖޯޑަންގެ ފޮރިން މިނިސްޓްރީ އާއި އެކްސްޕެޓްރިއޭޓްސް އެފެއާޒް އިން ކަމާލް އަދުވާން ހޮސްޕިޓަލް އިސްރާއީލުން އަންދާލާ، އެތަނުގެ ބަލިމީހުންނާއި މެޑިކަލް މުވައްޒަފުން މަޖުބޫރުން ބޭރުކުރުން ހަރުކަށި އިބާރާތުން ވަނީ ކުށްވެރިކޮށްފައެވެ.
ޕެޓްރާ އިން ބުނެފައިވާ ގޮތުގައި، މިނިސްޓްރީ އިން މި ޢަމަލު ސިފަކޮށްފައިވަނީ "ނުބައި ހަނގުރާމައިގެ ޖަރީމާއެއް" ކަމަށެވެ.
"އިސްރާއީލުން ހޮސްޕިޓަލުގެ ބަލިމީހުންނާއި މެޑިކަލް މުވައްޒަފުންގެ ސަލާމަތާއި ރައްކާތެރިކަމަށް ޒިންމާ ނަގަންޖެހޭނެއެވެ." އުރުދުން ގެ ބަޔާނުގައި ވެއެވެ.
"މިއީ ބައިނަލްއަޤްވާމީ ޤާނޫނާ ހިލާފު ކަމެކެވެ. ޚާއްޞަކޮށް 1949 ވަނަ އަހަރުގެ ޖެނީވާ ކޮންވެންޝަން ރިލޭޓިވް ޓު ދަ ޕްރޮޓެކްޝަން އޮފް ސިވިލިއަން ޕާސަންސް އިން ޓައިމް އޮފް ވޯއާ ހިލާފު ކަމެކެވެ. އަދި މިއީ އުތުރު ޣައްޒާގެ ރައްޔިތުން ދިރިތިބުމަށް ކޮންމެހެން ބޭނުންވާ މުހިންމު ވަސީލަތްތައް ނައްތާލުމަށް ކުރާ ނުރައްކާތެރި މަސައްކަތެކެވެ." އުރުދުން ގެ ބަޔާނުގައި އިތުރަށް ބުނެފައިވެއެވެ.
