އަރަބި ލީގުގެ ކުއްލި ބައްދަލުވުމަކަށް ފަލަސްތީނުން ގޮވާލައިފި

ޣައްޒާ ސްޓްރިޕްގެ އުތުރުގައި އޮންނަ ބައިތު ލަހިޔާގައި އިސްރާއީލުން ހިންގި ނުރައްކާތެރި އަނިޔާވެރިކަމާ ގުޅިގެން އަރަބި ލީގުގެ ކުއްލި ބައްދަލުވުމެއް ބޭއްވުމަކަށް ފަލަސްތީނުގެ ރިޔާސަތުން ހުކުރު ދުވަހު ގޮވާލައިފިއެވެ.

ފަލަސްތީނުގެ ރިޔާސަތުން އަރަބި ލީގުގެ މެމްބަރު ޤައުމުތަކުގެ ޚާރިޖީ ވަޒީރުންގެ ފެންވަރުގައި ކުއްލި ބައްދަލުވުމެއް ބޭއްވުމަށް ގޮވާލާފައިވަނީ، ޣައްޒާ ސްޓްރިޕްގައި އިސްރާއީލުން ފަލަސްތީނު ރައްޔިތުންނާ ދެކޮޅަށް ހިންގަމުންދާ ނަސްލު ނައްތާލުމުގެ އަނިޔާވެރިކަމާއި، މަޖުބޫރުން އެމީހުންގެ ވަޒަނުން ނެރުމާއި، ބަނޑަށް ޖެއްސުމުގެ ޢަމަލުތަކާ ގުޅިގެންނެވެ. ޚާއްޞަކޮށް ބައިތު ލަހިޔާގައި ވަކިވަކިން ހިންގި ދެ ގަތުލުއާންމުގައި ގާތްގަނޑަކަށް 100 މީހުން މަރުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި އެތައް ބަޔަކު ޒަޚަމްވެފައިވެއެވެ.

އިސްރާއީލުން ޣައްޒާ ސްޓްރިޕްގެ އުތުރު ސަރަހައްދު ވަކިކުރުމަށް ކުރަމުންދާ މަސައްކަތްތަކާއި، ފަލަސްތީނުގެ ރައްޔިތުން އެމީހުންގެ ބިންތަކާއި ގެދޮރުން ނެރުމަށްޓަކައި ހަނގުރާމައިގެ ވަސީލަތެއްގެ ގޮތުގައި ބަނޑަށްޖެއްސުން ބޭނުން ކުރަމުން ދާތީ، އެކަމުގެ ނުރައްކާތެރިކަން ފަލަސްތީނު ސަރުކާރުން ވަނީ ފާހަގަ ކޮށްފައެވެ.

ފަލަސްތީނު ސަރުކާރުން ބާރުއަޅާފައިވަނީ، ބައިނަލްއަޤްވާމީ މުޖުތަމަޢުން އަވަސް ފިޔަވަޅުތަކެއް އަޅައި، ހިސާރުކޮށްގެން ތިބި ބާރުތަކަށް މަޖުބޫރުކުރުވައި، ނަސްލު ނައްތާލުމުގެ އަނިޔާވެރިކަން ހުއްޓުވައި، ޣައްޒާ ސްޓްރިޕްގެ ހުރިހާ ސަރަޙައްދަކަށް އިންސާނީ އެހީ ވަގުތުން ފޯރުކޮށްދިނުމަށް ހުއްދަދީ، އދ ގެ ސަލާމަތީ މަޖިލީހުގެ ޤަރާރު 2735 އާ އެއްގޮތަށް ވަގުތުން ހަނގުރާމަ ހުއްޓާލުމަށާއި، ފަލަސްތީނު ދައުލަތަށް އޭގެ ފުރިހަމަ މަސްއޫލިއްޔަތުތައް އަދާކުރުމަށް މަގުފަހިކޮށްދިނުމަށެވެ.