އިޒްރޭލުން އީރާނުގެ އަސްކަރީ މަރުކަޒުތަކަށް ހަމަލާދީ، މެދުއިރުމަތީގެ މަސްރަހު އިތުރަށް ގޯސްވެފައިވާ ދަނޑިވަޅެއްގައި، އެޤައުމުގެ ނިއުކްލިއަރ ސިޔާސަތު އަލުން މުރާޖަޢާ ކުރާނެ ކަމުގެ އިޝާރާތެއް ދީފިއެވެ.
ދާދި ފަހުން އިޒްރޭލުން އީރާނަށް ދިން ހަމަލާތަކަށްފަހު، ހަނގުރާމަ އިތުރަށް ފުޅާވެއްޖެނަމަ އިޒްރޭލާ ކުރިމަތިލާން އީރާނުން ތައްޔާރުތޯ ހުކުރު ދުވަހު އަލް-މަޔާދީ ޓީވީ އިން ކުރި ސުވާލަކަށް ޖަވާބުދެއްވަމުން އީރާނުގެ އެންމެ މަތީ ވެރިޔާގެ އެޑްވައިޒަރ ކަމާލް ޚައްރާޒީ ވިދާޅުވެފައިވަނީ، އީރާނުން އަމިއްލައަށް ކަނޑައަޅާފައިވާ 2,000 ކިލޯމީޓަރު (1,250 މޭލު) ގެ ސަރަހައްދަށްވުރެ ދުރަށް ބެލިސްޓިކް މިސައިލްތަކުގެ ދުރުމިން އިތުރުކުރާނެ ކަމަށް ވަރަށް ބޮޑަށް ބެލެވޭ ކަމަށެވެ. އަދި ފަހަރެއްގައި ނިއުކްލިއަރ ސިޔާސަތުވެސް އަލުން މުރާޖަޢާކުރާނެ ކަމަށެވެ.
ޚައްރާޒީ ވިދާޅުވީ އީރާނަށް ނިއުކްލިއަރ ހަތިޔާރު އުފެއްދުމުގެ ޓެކްނިކަލް ޤާބިލުކަން ލިބިފައިވީނަމަވެސް، މިވަގުތު އެކަން ހުއްޓުވިފައިވަނީ 2000 ގެ އަހަރުތަކުގެ ކުރީކޮޅު އެންމެ މަތީ ވެރިޔާ އާޔަތުއްﷲ ޢަލީ ޚާމެނާއީ ނެރުއްވާފައިވާ ފަތުވާ ނުވަތަ ދީނީ ޙުކުމެއްގެ ސަބަބުން ކަމަށެވެ. އެ ފަތުވާގައި ނިއުކްލިއަރ ހަތިޔާރު އުފެއްދުން ވަނީ މަނާކުރައްވާފައެވެ.
އީރާނުން އަންނަނީ އެޤައުމުން ނިއުކްލިއަރ ހަތިޔާރު އުފައްދާ ކަމަށް ބުނެ ކުރާ ތުހުމަތުތަކަށް އަބަދުވެސް ދެކޮޅުހަދަމުންނެވެ. އެއާ އިދިކޮޅަށް އެޤައުމުން ބުނަމުން އަންނަނީ ނިއުކްލިއަރ މަސައްކަތްތަކަކީ ހަމައެކަނި ސުލްޙަވެރި ބޭނުންތަކަށް ކުރާ ކަމެއްކަމަށެވެ.
