ޑޮމެއިން ހިދުމަތް އަލުން ފަށަން ދަނީ މަސައްކަތްކުރަމުން - ޓްރާންސްޕޯޓް މިނިސްޓްރީ
ޑޮމެއިން ވިއްކުން މިދިޔަ އަހަރުގެ އޮގަސްޓް މަހުން ފެށިގެން އޮތީ ހުއްޓާލާފަ
ޓްރާންސްޕޯޓް މިނިސްޓަރު އަމީން
މިހާރު ހުއްޓިފައިވާ ޑޮމެއިން ހިދުމަތް އަލިން ފެށޭތޯ މަސައްކަތް ކުރަމުން އަންނަ ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޑޮމެއިން ވިއްކުން މިދިޔަ އަހަރުގެ އޮގަސްޓް މަހުން ފެށިގެން އޮތީ ހުއްޓާލާފައެވެ.
ޓްރާންސްޕޯޓް މިނިސްޓްރީން އާއްމުކޮށްފައިވާ ބަޔާނެއްގައި ބުނެފައިވަނީ އެއްގަމުގައި ދުއްވާ އުޅަނދުތަކުގައި ބޭނުން ކުރާ ޑޮމެއިން ނަންބަރުތަކާ ގުޅޭ ގިނަމަ މައްސަލަތަކެއް ފެންމަތިވެފައިވާތީ ނިމިދިޔަ ދައުރުގައި ޑޮމެއިންގެ ހިދުމަތް މެދުކަނޑާލާފައިވާ ކަމަށެވެ.
އަދި މި ހިދުމަތަކީ ދިވެހިންގެ މެދުގައި އަދި ވަކިން ހާއްސަކޮށް ޒުވާނުންގެ މެދުގައި މަގްބޫލް ޚިދުމަތަކަށް ވުމާއި އެކު ޑޮމެއިން ގަތުމަށާއި އެކަމާއި ގުޅުންހުރި ހިދުމަތް ޙޯދުމަށް އެ ފަރާތްތަކުން ބޮޑެތި ހޭދަތައް ކޮށްފައިވާ ކަން މިިނިސްޓްރީން ވަނީ ފާހަގަކޮށްފައެވެ.
އެހެންކަމުން އެ ހިދުމަތް އަލުން ފެށުމަށްޓަކައި މައްސަލަތަކަށް އަވަސް ހައްލެއް ހޯދުމަށް އިސްކަން ދޭ ކަމަށް އެ މިނިސްޓްރީން ވަނީ ބުނެފައެވެ. ވޭތުވެދިޔަ ތަނުގައި ޑޮމެއިން ރެކޯޑްތައް ހަރުދަނާ ގޮތެއްގައި މިނިސްޓްރީގައި ބެލެހެއްޓިފައި ނެތުމަކީ އެ ޚިދުމަތް ފަށަނަ އޮތް ގޮންޖެހުމެއް ކަމަށް މިނިސްޓްރީން ފާހަގަކުރެއެވެ. އަދި ހިދުމަތް ފޯރުކޮށް ދިނުމުގައި އަމަލުކުރާނެ ހަރުދަނާ އުސޫލުތަކެއް ނެތުމަކީ ވެސް ގޮންޖެހުމެއް ކަމަށް ވަނީ ބުނެފައެވެ.
މީގެ އިތުރުން ފާއިތުވެ 10 މަސްދުވަހުގެ މަސައްކަތުން އެކަމަށް ހައްލެއް ލިބިފައިވާ ކަމަށާއި އެ މަސައްކަތް ފަށާއިރު ރެކޯޑްތައް ބަލަހައްޓައި އަދި މޮނިޓާ ކުރާނެ ހަރުދަނާ ނިޒާމެއް ގާއިމްކުރާނެ ކަމަށް މިނިސްޓްރީން ވަނީ ބުނެފަައެވެ. ހަމައެހެންމެ ކުރިމަގުގައި ދިމާވެދާނެ މައްސަލަތައް މަދު ކުރުމަށް ފިޔަވަޅު އަޅާނެ ކަަމަށް ވެސް އެ މިނިސްޓްރީން ވަނީ ބުނެފައެވެ. އަދި އެ މަސައްކަތް އަލުން ފަށާ އިރު އެއްވެސް ފަރާތެއްގެ ހައްގަކަށް އުނިކަމެއް ނާންނާނެ ކަމަށް މިނިސްޓްރީން ވަނީ ބުނެފައެވެ.
