ސައުދީ ޕްރޯ ލީގުގައި އަލް ޝަބާބާ ދެކޮޅަށް ކުޅުނު މެޗުން އަލް ނަޞްރު މޮޅުވެއްޖެ އެވެ.

އަލް ޝަބާބާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 2-1ންނެވެ. މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނު ނަމަވެސް، ދެ ވަނަ ހާފުގައި ވަނީ ލަނޑު ޖަހައިފަ އެވެ.

މެޗުގެ 69 ވަނަ މިނެޓުގައި އަލް ނަޞްރަށް ލީޑު ނަގައިދިނީ އައިމެރިކް ލަޕޯޓް އެވެ. ނަމަވެސް އޭގެ ފަހުން މެޗުގެ 90 ވަނަ މިނެޓުގައި އަލް ޝަބާބަށް ނަތީޖާ ހަމަހަމަވީ، އަލް ނަޞްރުގެ އަލީ އަލް ޙަސަން އަތުން ބައި ކޮޅަށް ވަތް ލަނޑުންނެވެ. މެޗުން އަލް ނަޞްރު މޮޅުވީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ކެޕްޓަން ކްރިސްޓިއާނޯ ރޮނާލްޑޯ ޖެހި ލަނޑުންނެވެ.

މިއީ މި ސީޒަންގެ ސައުދީ ލީގުގައި ރޮނާލްޑޯ އަލް ނަޞްރަށް ޖަހައިދިން ހަ ވަނަ ލަނޑެވެ. މި ސީޒަންގައި ޖުމުލަ ރޮނާލްޑޯ ވަނީ އަލް ނަޞްރަށް ނުވަ ލަނޑު ޖަހައިފަ އެވެ. ޖުމުލަ މިހާތަނަށް އަލް ނަޞްރަށް ކުޅެދިން 54 މެޗުގައި ރޮނާލްޑޯ ވަނީ 55 ލަނޑު ޖަހައިފަ އެވެ. މީގެ އިތުރުން 15 ލަނޑު ޖެހުމަށް ރޮނާލްޑޯ ވަނީ ފުރުސަތު ވެސް ތަނަވަސްކޮށްދީފަ އެވެ.

މެޗުން މޮޅުވެ އަލް ނަޞްރު ވަނީ ލީގު ތާވަލްގެ ދެ ވަނަ މަޤާމަށް ޖެހިލައިފަ އެވެ. އެއީ މިހާތަނަށް ކުޅުނު ހަތް މެޗުން 17 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އޮތް އެންމެ ފަހުގެ ޗެމްޕިއަން އަލް ޙިލާލަށް ލިބެނީ 21 ޕޮއިންޓެވެ.