އިޒްރޭލަށް "ވޭން އިހުސާސް ކުރުވުމަށް" އައު ގޮތެއް ހޯދައިފި ކަމަށް ހިޒްބުﷲގެ ވަގުތީ ލީޑަރު ހާމަކޮށްފިއެވެ.
ހިޒްބުﷲގެ ވަގުތީ ލީޑަރ ނައީމް ޤާސިމް ޓީވީ މެދުވެރިކޮށް ދިން ޚިތާބުގައި ބުނެފައިވަނީ ފާއިތުވި ހަފުތާގައި އެ ޖަމާޢަތުން އައު ސްޓްރެޓެޖީއެއް ގެންގުޅެން ފަށާފައިވާ ކަމަށެވެ.
މި ސްޓްރެޓެޖީ އަމާޒުކުރެވިފައިވަނީ އިޒްރޭލުން "ވޭން" އިހުސާސް ކުރުވުމަށް ކަމަށް އޭނާ ބުނެފައިވެއެވެ. ނަމަވެސް އިތުރު ތަފްސީލެއް ހާމަކޮށްފައެއް ނުވެއެވެ.
އާދީއްތަ ދުވަހު ހިޒްބުﷲގެ ޑްރޯން ހަމަލާއެއްގައި އިޒްރޭލުގެ އަސްކަރީ ބޭސް އަކުން 4 އިޒްރޭލު ސިފައިން މަރުވެ އަތައް ބަޔަކަށް އަނިޔާވެފައިވެއެވެ. އެހަމަލާ ދީފައިވަނީ އިޒްރޭލުގެ ވަރުގަދަ ވައިގެ ދިފާއީ ނިޒާމު ފޫއަޅުވާލުމަށްފަހުގައި ކަން ފާހަގަ ކުރެވެއެވެ. އިޒްރޭލުން ބުނެފައިވަނީ އެކަން ހިނގި ގޮތް ތަހުގީގު ކުރަމުން ގެންދާ ކަމުގައެވެ.
އިޒްރޭލުން މިކަމާ ގުޅޭގޮތުން އަދި އެއްވެސް އެއްޗެއް ބުނެފައެއް ނުވެއެވެ. ކުރިން އިޒްރޭލުން ބުނެފައިވަނީ ލުބުނާނުގައި ހިންގާ އޮޕަރޭޝަންގެ މަޤްޞަދަކީ ހިޒްބުﷲގެ ޙަމަލާތަކާ ގުޅިގެން އުތުރު އިޒްރޭލުން ފައިބަން މަޖުބޫރު ވި މީހުން އަނބުރާ ގެނެސް ވަޒަންވެރިކުރުވުން ކަމުގައެވެ.
ޤާސިމް ބުނި ގޮތުގައި އިޒްރޭލުން ލުބުނާނުގެ އެކިތަންތަނަށް ޙަމަލާ ދީފައިވާތީ، ހިޒްބުﷲ އަށްވެސް އިޒްރޭލުގެ ކޮންމެ ތަނަކަށް ޙަމަލާދިނުމުގެ ޙައްޤު ލިބިގެންވެއެވެ.
އޭނާ ބުނީ އިތުރު އިޒްރޭލު މީހުން އެ ސަރަހައްދުން އަދިވެސް ފައިބައިގެން ދާނެ ކަމަށާއި، "ސަތޭކަ ހާހުން، އަދި ދެ މިލިއަނަށްވުރެ ގިނަ މީހުން ކޮންމެ ވަގުތެއްގައި، ކޮންމެ ގަޑިއެއްގައި، ކޮންމެ ދުވަހެއްގައިވެސް ނުރައްކަލުގެ ތެރޭގައި ތިބޭނެ،" ކަމަށެވެ.
ހިޒްބުﷲގެ ވަގުތީ ލީޑަރު މި މޭރުމުން ވާހަކަ ދެއްކި ނަމަވެސް، އޭނާ ބުނެފައިވަނީ މެދުއިރުމަތީގައި މިހާރު ހިނގަމުންދާ ހަނގުރާމައިގައި އެންމެ ރަނގަޅު ނަތީޖާއަކަށް ވާނީ އިޒްރޭލުން ލުބުނާނާއި ޣައްޒާއަށް ދޭ ހަމަލާތައް ހުއްޓާލުން ކަމަށެވެ.
"ޙައްލަކީ ހަނގުރާމަ ހުއްޓާލުން. އަހަރެމެން މި ވާހަކަ ދައްކަނީ ބަލިކަށި ޙާލަތެއްގައި ތިބެގެނެއް ނޫން. އިޒްރޭލުން އެކަމަށް ބޭނުން ނުވާނަމަ، އަހަރެމެން [ހަނގުރާމައިގައި] ކުރިއަށް ދާނަން،" ރެކޯޑުކުރެވިފައިވާ ޚިޠާބުގައި އަންގާރަ ދުވަހު ގާސިމް ބުނެފައިވެއެވެ.
"ޙައްލަކީ ހަނގުރާމަ ހުއްޓާލުން... ހަނގުރާމަ ހުއްޓާލުމަށްފަހު، [އިސްރާއީލީ] ރަށްވެހިންނަށް އުތުރަށް އެނބުރި އާދެވިދާނެ" އޭނާ އިތުރަށް ބުނެފައިވެއެވެ.
"ހަނގުރާމަވެރިން ދުވަހަކުވެސް ބަލިނުވާނެ. އެއީ އެއީ ބިމުގެ އަސްލު ވެރިން - އެމީހުން ހަނގުރާމަކޮށް ޢިއްޒަތްތެރިކަމާއެކު މަރުވާން ތިބީ ތައްޔާރަށް."
"ކެތްތެރިކަމާއެކު [ނަޞްރު] ކާމިޔާބު ލިބޭނެ." ހިޒްބުﷲ ގެ ވަގުތީ ލީޑަރު ބުނެފައިވެއެވެ.
