ގައްޒާއިން ހައްޖަށް ދާ ފަރާތްތަކަށް މިސްރުން ސަރަހައްދީ ރޮނގު ހުޅުވާލައިފި

ގައްޒާއިން ހައްޖަށް ދާ ފަރާތްތަކަށް ފަސޭހަ ކަމާއެކު މައްކާއަށް ދިއުމުގެ މަގު ފަހިކޮށްދިނުމުގެ ގޮތުން މިސްރާއި ގައްޒާ އާއި ދެމެދުގައިވާ ސަރަހައްދީ ރޮނގު މިސްރުން ހުޅުވައިފިއެވެ.

މިސްރާއި ގައްޒާ ގުޅޭ ސަރަހައްދީ ރޮނގު ހުޅުވާފައިވަނީ ހަތަރު ދުވަހަށް ކަމަށް މިސްރުގެ ކަމާބެހޭ ވުޒާރާތަކުން ހާމަކުރެއެވެ. މި ހަތަރު ދުވަހުގެ ތެރޭގައި 2500 މީހުން މައްކާއަށް ދިއުމަށް ސަރަހައްދީ ރޮނގު ހުރަސްކުރާނެއެވެ.

ބުދަ ދުވަހު ވެސް 800 މީހުން ސަރަހައްދީ ރޮނގު ހުރަސްކުރާނެ ކަމަށާއި މި ހުރިހާ މީހުންނަށްވެސް ސައުދީގެ ވިސާ ހަމަޖެހިފައިވާކަމަށް މައުލޫމާތު ލިބެއެވެ.

ސަރަހައްދީ ރޮނގު ހުޅުވި ކަމުގައި ވިޔަސް ގައްޒާއަށް އެއްވެސް މީހަކަށް އެތެރެ ނުވެވޭނެ ކަމަށް ހަމާސްއިން ހިންގާ ގައްޒާގެ އިންޓީރިއާ މިނިސްޓްރީގެ ޑައިރެކްޓާ އޮފް އިންފޮމޭޝަން ހިޝާމް އަދްވާން ވަނީ ހާމަކޮށްފައެވެ.

އޭއެފްޕީއަށް މައުލޫމާތު ދެމުން ސަރަހައްދީ ރޮނގު ހުރަސްކުރަން ހުރި މީހަކު ބުނެފައިވަނީ 2014 ވަނަ އަހަރުން ފެށިގެން އޭނާ މައްކާއަށް ދިއުމަށް މަސައްކަތްކުރަމުންދާ ކަމަށެވެ.

މި އަހަރުވެސް ހައްޖުވުމަށް ދުނިޔޭގެ އެކިކަންކޮޅުތަކުން ދެ މިލިއަން މީހުން ސައުދީ އަރަބިއްޔާއަށް ދަތުރުކުރާނެއެވެ.