ޞަލާޙުގެ ލަނޑުން މޮޅުވެެ، ލިވަޕޫލް އެއް ވަނައިގައި

އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން މޮޅުވެ، ލިވަޕޫލް އިން ލީގު ތާވަލްގެ އެއް ވަނަ އަށް ޖެހިލައިފި އެވެ.

ވުލްވްސްގެ ދަނޑުގައި ކުޅުނު މެޗު ލިވަޕޫލް އިން ކާމިޔާބު ކުރީ 2-1 އިންނެވެ. މެޗުގައި ލިވަޕޫލް އިން ކުރި ހޯދާފައި ވަނިކޮށް، ވުލްވްސް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ލިވަޕޫލް މެޗުން މޮޅުވީ އެ ޓީމަށް ލިބުނު ޕެނަލްޓީން ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ އިތުރު ވަގުތުގައި ލިވަޕޫލަށް ލީޑު ނަގައިދިނީ އިބްރާހިމާ ކޮނާޓޭ އެވެ. އެއީ ޑިއޭގޯ ޖޮޓާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ދެ ވަނަ ހާފު ފަށައިގެން 11 ވަނަ މިނެޓުގައި ވުލްވްސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް އެ ލަނޑު ޖަހައިދިނީ ރަޔަން ނޫރީ އެވެ. އޭގެ ފަހުން 61 ވަނަ މިނެޓުގައި ލިވަޕޫލަށް ލިބުނު ޕެނަލްޓީ ކާމިޔާބުކޮށް، މެޗުން މޮޅުވި ލަނޑު ޖެހީ މިޞްރުގެ ފޯވާޑް މުޙައްމަދު ޞަލާޙު އެވެ.

މޮޅާއެކު ލިވަޕޫލް އިން ވަނީ އެއް ވަނައިގައި ޕޮއިންޓެއްގެ ލީޑެއް ނަގައިފަ އެވެ. މިހާތަނަށް ލީގުގައި އެ ޓީމުން ހަ މެޗު ކުޅެފައިވާއިރު، ފަސް މެޗުން ވަނީ މޮޅުވެފަ އެވެ. އެއް މެޗުން ބަލިވެފައިވާއިރު، އެއް ވަނައިގައި އޮތީ 15 ޕޮއިންޓާއެކު އެވެ. ދެ ވަނައިގައި އޮތް އެންމެ ފަހުގެ ޗެމްޕިއަން މެންޗެސްޓަރ ސިޓީ އަށް ލިބެނީ 14 ޕޮއިންޓެެވެ.