ނޭޝަނަލް ޕީޕަލްސް ޕަވަރ (އެންޕީޕީ) ގެ ލީޑަރު އަނުރަ ކުމާރަ ޑިސަނަޔަކަ، ސްރީ ލަންކާގެ 9 ވަނަ ރައީސަކަށް ވެގެންދާނެ ކަމަށް ބެލެވެން ފަށައިފިއެވެ.

ހަތް އިންތިޚާބީ ދާއިރާއެއްގެ ޕޯސްޓަލް ވޯޓިންގ ނަތީޖާތަކުން ދައްކާ ގޮތުން އޭނާ އުޅުއްވަނީ އެހެން ވާދަވެރިންނަށްވުރެ ބޮޑުތަނުން ކުރީގައެވެ.

ސްރީ ލަންކާގެ ރިޔާސީ އިންތިޚާބުގެ ވޯޓުލުން ކުރިއަށް ދިޔައީ ހޮނިހިރު ދުވަހު ހެނދުނު 7:00ން ހަވީރު 4:00 އަށެވެ. 22 އިންތިޚާބީ ދާއިރާގައި 13،400ށް ވުރެ ގިނަ ވޯޓުލާ މަރުކަޒުތަކުގައި ވޯޓުލުމުގެ ކަންކަން ކުރިއަށް ދިޔައީ ސުލްހަވެރިކަމާއެކުގައި ކަމަށް ރިޕޯޓްތައް ބުނެއެވެ.

ސްރީ ލަންކާގެ އިލެކްޝަންސް ކޮމިޝަނުން އިއުލާން ކުރަމުންދާ ނަތީޖާތަކަށް ބަލާއިރު އުމުރުން 56 އަހަރުގެ ކުޑަ ޕާޓީއަކަށް ނިސްބަތްވާ ޑިސެނަޔަކަ ވަނީ އޭނާގެ ވާދަވެރިން ކަމުގައިވާ މައި އިދިކޮޅު ލީޑަރު އުމުރުން 57 އަހަރުގެ ސަޖިތު ޕްރެމަދާސާ އަދި މިހާރުގެ ރައީސް އުމުރުން 75 އަހަރުގެ ރަނިލް ވިކްރަމަސިންހަ ފަހަތައް ޖައްސާ ބޮޑު ތަފާތަކުން ކުރި ހޯއްދަވާފައެވެ.

ހަތް އިންތިޚާބީ ދާއިރާގެ ޕޯސްޓަލް ވޯޓިންގ ނަތީޖާތަކުން ދައްކާގޮތުގައި، އެންޕީޕީގެ ލީޑަރު ޑިސެނަޔަކަ ވަނީ 56 އިން ސައްތަ ވޯޓު ހޯއްދަވާފައެވެ.

ޕޯސްޓަލް ވޯޓިންގ ނަތީޖާތަކުން ދައްކާ ޓްރެންޑަށް ބަލާއިރު، ދިރާސާކުރާ ފަރާތްތަކުން ބުނާ ގޮތުގައި ޑިސެނެޔަކަ 50 އިން ސައްތަ އަށްވުރެ ގިނަ ވޯޓު ހޯއްދައިގެން ދެވަނަ ބުރެއްގެ ގުނުމަކަށް ނުގޮސް ރިޔާސީ އިންތިޚާބު ކާމިޔާބު ކުރައްވާނެއެވެ.